Njosebu aataûra irooto bia mûnene
41
1 Nyuma ya mîanka îîrî, Faraû aroota arûngi rûteere rwa muuro wa Naero. 2 Oona kwauma ng'ombe mûgwanja inoru muurooni wa Naero, na cianjîîria kûrîa nyaki wagu îkumbo. 3 Nyuma ya inu, iingî ciaya mûgwanja, inthûûku na i nceng'u, ciauma muurooni wa Naero na ciarûngama rûteere rwa inu ciarî îgombeeni rîa muuro. 4 Na ng'ombe ira ciarî inthûûku na i nceng'u ciarîa ira mûgwanja ciarî imbega na inoru. Rîru Faraû aindûkîra.5 Nyuma yoogu aamaama aroota kaîrî, na kîrooto kîa biîrî gîakari ûûgû, oona ithuke mûgwanja bia ngano biûyûri na biîru, bikûrîrîîte mûbwani ûmwe. 6 Nyuma yaabio, biaumîra bingî mûgwanja biibûûyu na bibîîthîîtue i kîbuubani kîa uumîîro bwa riûa. 7 Na ithuke bira bibûûyu biameria bira mûgwanja biûyûru na biîru. Rîru Faraû aindûkîra na aamenya kîrîîrî kîrooto.
8 Rûkîîrî mathûgaania maake i maatangîkîîte, kwoogu aatûmana aringi biama bonthe na antû bara baûgî ba Miisiri. Faraû abeera irooto biake, îndî gûtirî we aûmba kûmûtaûrîra bio.
9 Rîru ûra airaga ndibei eera Faraû “Nwa mwanka mbuumbûre îmunthî i ndûthîîte mabîtia. 10 Rîra wathûûri i niû na mûrugi wa mîgaate, na watwingîra nceera nyomba ya mûnene wa akaria, 11 ûtugû bûmwe tûrî baîrî i twarootire, na irooto biarî na mûtaûrîre mwanya mwanya. 12 Mûthaka Mûibirania ûra aarî nkombo ya mûnene wa akaria, n'aarî ku amwe naati. Itwamwîrire irooto bietû, na atûtaûrîra. 13 Na mantû monthe maakarîkire wa bûra augîîte magaakarîka. Ndaacookua kaanyaani gaakwa, îndî wacuuria mûrugi wa mîgaate.”
14 Faraû aatûmana eetîrwa Njosebu, na nthûti îmwe, bamûretera we kuuma nceera; akûrîîkia kwenjwa na acencia nguo ciake, aaya agu mbere ya mûnene. 15 Faraû eera Njosebu, “I ndararootire, na gûtirî we ûkûûmba gûgîtaûra; ndareerirwe nwa ûûmbe gûtaûra irooto.”
16 Njosebu aacookia Faraû amwîra, “Arî, ntiûmba mûnene, îndî Ngai akaa Faraû îcookio rîra akwenda.”
17 Rîru Faraû eera Njosebu, “Kîrootooni gîakwa ndararûngi îgombeeni rîa muuro wa Naero, 18 rîra ng'ombe mûgwanja inthongi na inoru, iraumire muurooni, na cianjîîria kûrîa nyaki. 19 Nyuma yacio, ciaumîra ingî mûgwanja i nceng'u na inthûûku. Ntoona ng'ombe i mbûûtu na i nceng'u ûgu kaîrî nthîgûrû ya Miisiri. 20 Na ng'ombe inu nceng'u ciarîa ira cia mbere mûgwanja inoru, 21 îndî wana i gûcirîa gûtirî we akîmenya wegua i gûcirîa, n'ûntû ciabûûtîîte wata mbereeni. Rîru ndaindûkîra. 22 Ndoona kaîrî kîrootooni ithuke mûgwanja bia ngano biîru bikûrîrîîte mûbwani ûmwe. 23 Nyuma yabio, ithuke biingî mûgwanja biibûûyu bibîîthîîtue i kîbuubani gîa kuuma bwa uumîîrooni bwa riûa biaumîîra. 24 Ithuke bira bibûûyu bia ngano biameria bira biega mûgwanja. Ndeera aringi biama ûntû bûbû, îndî gûtirî we araûmba gûntaûrîra bio.”
25 Njosebu eera Faraû, “Irooto birî biîrî biriuga ûntû bûmwe; ka Ngai agûkwîra bûra athiîte kûrûtha. 26 Ng'ombe mûgwanja inoru na ithuke mûgwanja bia ngano bionthe birîrûngamîîra mîanka mûgwanja ya ûnoru. 27 Ng'ombe mûgwanja i nceng'u na imbondu ira ciaumîîre nyumaani i mîanka mûgwanja, na kinya ithuke bia ngano biibûûyu bira biabîthîîtue i kîbuubani kîa uumîîro bwa riûa: I mîanka mûgwanja ya yûûra.
28 “Nwa ta bûra nkwîrire mûnene, Ngai n'akwoneetie bûra arî akubî kûrûtha. 29 Ûkeegua kûrî na mîanka mûgwanja ya mpaa nthîgûrû yonthe ya Miisiri, 30 nyuma yoogu, kwîgue kûrî na mîanka mûgwanja ya yûûra, na mîanka ya mpaa yonthe îkaariganîria nthîgûrû ya miisiri. Yûûra rîrî rîkainyîîria nthîgûrû îno. 31 Mpaa nthîgûrû îtiiririkanwa, n'ûntû yûûra rîra rîkaaya ûkeegua rîrî rînene mûno. 32 Gîtûmi gîa kwonua kîrooto maita maîrî n'atî Ngai n'abangîîte ûntû bûbû na aakûrûkia, na Ngai akabuûyûria îgiita rîtarî rîraaya.
33 “Kwoogu îîndî ceria muntû ûmûûme na arî na ûmenyo, ûmwaige kaanyaani ga kûraithîra nthî ya Miisiri. 34 Nwa mwanka kinya ûthuure aruti ngûgî bangî ba nthîgûrû ba kûthûkagia gîcuncî kîmwe kîa bitaano kîa maketha ma Miisiri kagiitaani ka mîanka mûgwanja ya maketha maingî. 35 Bae watho bwa kwîthîrania irio kagiitaani gaku ka mîanka ya mpaa na babiaige taûniini ciaku. 36 Irio bibu bionthe bikaigwa n'ûntû bwa antû ba nthîgûrû îno kaingo barîa rîra mîanka mûgwanja ya yûûra îkaaya, na gûkari ûgu antû batiibûûta.”
Njosebu atuîkithua ngabana wa Miisiri
37 Faraû na aruti ngûgî baake bonthe beegua rwaria rûru rwa Njosebu na beetîganîîria naru. 38 Kwoogu abeera, “Tûtiona muntû ûngî ûmwega nkûrûki ya Njosebu, muntû arî na Kîrundu wa Ngai.” 39 Kwoogu Faraû eera Njosebu, “N'ûntû Ngai n'akwoneetie mama monthe, gûtirî ûngî ûrî na ûûme na ûmenyo ta woû; 40 Ûkeegua ûrî mûnene wa nyomba yakwa ya ûnene, na ûkaatha antû baakwa bonthe; nwa niû akî nkeegua ndî mûnene kîrî woû.” 41 Na Faraû eera Njosebu, “Raitha, ngûkûthuura ûrî mûnene wa nthîgûrû ya Miisiri yonthe.” 42 Faraû aaruta mbete ya ûnene kuuma njara yake na amîîkîra njara ya Njosebu, na amwîkîra nguo cia ûnene cia gatani îmbega, na amwîkîra mûkathî wa thaabu nkingo yake; 43 rîru amwîtîgîîria aatwa nkaarîîni yake ya ûnene îra yarî ya mûniini wake; na antû baathi bakiugagîîria mbere yake bakiugaga, “Rûthaani njîra mbere yake.” Kwoogu Njosebu atuîkithua mûnene wa nthî ya Miisiri yonthe. 44 Faraû eera Njosebu, “Kinya wegua ndî mûnene, gûtirî we akaarûtha ûntû nwa bûrîkû Miisiri ûtamwete rûûtha.” 45 Na Faraû eeta Njosebu riîtwa rîa kî Miisiri Safenathi-Panea; na aagûra Asenathi, mwarî wa Potifera, mûthînjîri ndeeni ya ntûûra ya Oni. Kwoogu Njosebu aariûnga Miisiri yonthe.
46 Njosebu aarî na mîanka mîrongo îthatû akîanjîîria gûtûmîkîra Faraû mûnene wa Miisiri. Na Njosebu auma agu Faraû aarî, aathiûrûûka nthîgûrû ya Miisiri yonthe. 47 Kagiita ka mîanka mûgwanja ya maketha meega, nthî n'yagîîre na irio biingî mûno. 48 Njosebu eethîrania gîcuncî kîa irio bionthe bira biaketheetwe mîanka înu mûgwanja ya mpaa ndeeni ya Miisiri na abiaiga mataûniini. Ndeeni ya wa kîra taûni aigaga irio bira biaumîîte mîndaani îra îmîthiûrûkîrîîte. 49 Njosebu aiga irio biingî mûno, ta mûthanga wa îria, mwanka aatiga kûthima n'ûntû bitikîthimîka.
50 Mbere ya mwanka wa yûûra ûkinya, Njosebu na Asenathi mwarî wa Potifera, mûthînjîrî ngai wa Oni, baarî na aana baîrî ba antû arûme. 51 Eeta kara gakûrû Manase,a n'ûntû augire, “Ngai agûtûma ndiganîrua i thîîna ciakwa cionthe na cia mûciî wa baaba.” 52 Ga twîrî ageeta Eburaimu, auga, “N'ûntû Ngai agûtûma nthagaya nthîgûrû ya mathîîna maakwa.”
53 Mîanka mûgwanja ya mpaa Miisiri yaakinya mûthia, 54 na mîanka mûgwanja ya yûûra yanjîîria, wa ta bûra Njosebu augîîte. Kwarî na yûûra nthî ira ingî cionthe, îndî nthî ya Miisiri yonthe i kwarî na irio. 55 Rîra Miisiri yonthe yanjîîrie kwîgua yûûra, antû baarîrîra Faraû n'ûntû bwa irio. Rîru Faraû eera Amiisiri bonthe, “Ithiini kîrî Njosebu na bûrûthe bûra akaabwîra.”