Njosebu aataûra irooto biîrî
40
1 Nyumanyumaani, ûra eeyaga mûnene wa Miisiri biakûnyua na ûngî ûra aamûrugagîra mîgaate baathûûria mûnene wao. 2 Faraû aathûûra mûno n'aruti ngûgî babu baake baîrî, 3 na abaingîra nceera, nyomba ya mûnene wa akaria ba nceera, wa îra Njosebu aingîrîtwe. 4 Mûnene wa akaria abaneenkanîra kîrî Njosebu n'we abamenyeera.Nyuma ya bagûkara nceera kagiita kaganoona, 5 barî baîrî ûra airagîra mûnene wa Miisiri biakûnyua na ûra aamwiragîra mîgaate, bara baagwetwe nceera baaroota ûtugû bûmwe, na wa kîra kîrooto kîaugaga bwakîo.
6 Rîra Njosebu aayire kûboona rûkîîrî, oona barî na kîeba. 7 Abaûria, “I kî n'ûntû bûkwoneka bûrî na kîeba ûûgû îmunthî?” 8 Bamûcookia, “Wa kîra ûmwe wacietû nararootire, na gûtirî nwa ûmwe aaga wa gûtûtaûrîra bûra irooto bibu bikuuga.”
Njosebu abacookia abeera, “I Ngai wenka ûûmbithia muntû gûtaûra irooto, mbîîraani bûra bûrarootire.”
9 Kwoogu ûra airaga biakûnyua eera Njosebu kîrooto gîake. Amwîra, “Kîrootooni gîakwa ndaroonire mûcabiibû mbere yakwa, 10 na mûcabiibûûni ûyu i kûraarî na mpong'i ithatû, i kuuma mathangû warîo, yaraa, na kîgaro kîerua gîatuîka ncabiibû. 11 I ndaraarî na gîkombe gîa Faraû njaraani yakwa; ndaathûkia ncabiibû na ndaciitîîra rûûyî gîkombeeni gîa Faraû, na ndaanenkera mûnene.”
12 Njosebu amwîra, “Ûûgû i bu gîkuuga, mpong'i ithatû irîrûgamîîra ntugû ithatû. 13 Ndeeni ya ntugû ithatû, Faraû agakûruta nceera, na agûcookie kaanyaani gaaku. Ûkamûnenkeeria gîkombe gîake wa ta bûra waarûthaga mbereeni rîra wamweyaga biakûnyua. 14 Rîra mantû mamu monthe makaabua, itû ndakwereka ûmbîgue kîao ûgwete mantû maakwa kîrî mûnene, ûnteethie kuuma nceera îno. 15 N'ûntû ka ndaakamatirwe na taka kuuma nthîgûrû ya Aibirania, na kinya aaga gûtirî bu ndûthîîte bwa gûtûma mbingîrwa nceera.”
16 Rîra mûtongoria wa arugi ba mîgaate eegiirue ûtaûri i bwarî bwega, eera Njosebu, “Kinya niû i ndararootire, ndarakamatîîte ikabû bithatû bia mîgaate na kîongo gîakwa. 17 Gîkabûûni kîa îgûrû i kûraarî na mîthemba yonthe ya mîgaate îra yarugîrîîtwe Faraû, îndî nyoni iciamîrîîyaga kuuma gîkabûûni kîrî kîongo gîakwa.”
18 Njosebu amûcookeria, “Ûûgû i bu kîrooto gîkuuga, ikabû bithatû i ntugû ithatû. 19 Ndeeni ya ntugû ithatû Faraû agakûng'eera na agûcuurie mûtîîni. Na nyoni cia îgûrû ikaarîa nyama ciaku.”
20 Ntugû ya ithatû, îra yarî ntugû ya kûririkana gûciarwa wa Faraû, aarûthîra aruti ngûgî baake bonthe kîatho, na aaruta ûra aamweyaga biakûnyua na ûra aarugaga mîgaate nceera abarûngîka mbere ya aruti ngûgî baake. 21 Aacookia ûra aamweyaga biakûnyua kaanyaani gaake, 22 îndî acuuria ûra aarugaga mîgaate, wa bûra bungwa Njosebu aabataûrîrîte. 23 Îndî Amwe na ûgu ûyu eeyanaga ndibei ataaririkana Njosebu, n'aariganîîrue n'we.