Njosebu na mwekûrû wa Potifa
39
1 Îîndî Njosebu n'aarî akwîndamua Miisiri. Potifa, Mûmiisiri ûra aarî ûmwe wa aruti ngûgî ba Faraû, mûtongoria, mûrûngamîîri wa akaria, amûgûra kuuma kîrî Aisumairi bara baamwirîîte noogo.2 Mwathani n'aarî na Njosebu na aathi aatuîka muntû wa kûûmbana, na aatûûra nyomba ya mûnene wake Mûmiisiri. 3 Rîra mûnene wake oonire Mwathani n'aarî n'we na Mwathani naamweyaga kûûmbana ûntûûni bunthe bûra aarûthaga, 4 Njosebu oona kwendeerwa meethooni ma mûnene wake na aatuîka mûteetheeria wake. Potifa amûtuîkithia mûcûûbîri wa mûciî wake na mûmenyeeri wa bira bionthe aarî nabio. 5 Kuuma kagiita kara aamûtuîkithiirie mûmenyeeri wa mûciî wake na bionthe bira aarî nabio, Mwathani n'aatharimire mûciî wa Mûmiisiri ûyu n'ûntû bwa Njosebu. Kîthaarimo kîa Mwathani kîarî îgûrû rîa gîntû kîonthe kîra Potifa aarî nakîo, mûciî kinya mûndaani. 6 Kwoogu eetîgia Njosebu na bionthe bira aarî nabio. Njosebu arî agu, ataamakagua n'ûntû nwa bûrîkû nwanga irio bia kûrîa.
Njosebu aarî ûmûthongi na ûmûrûûngaru. 7 Na nyuma ya kagiita kaganoona, mwekûrû wa mûnene wake aanjîîria kwîrirîria Njosebu na amûûria amaame n'we. 8 Îndî Njosebu aarega. Amwîra, “Thikîîria, ûtiiyî mûnene wakwa n'ambîtîgîîtie na bionthe bira arî nabio? Atimakagua n'ûntû nwa bûrîkû nyomba îno n'ûntû ndî aaga. 9 Gûtirî we mûnene nyomba îno nkûrûki yakwa. Gûtirî kîo mûnene atampeete tatiga woû, n'ûntû ûrî mwekûrû wake. N'ata îndî mbûmba kûrûtha ûntû bûûthûûku ta bûbu na wîyia kîrî Ngai?” 10 Kinya ûkeegua n'aakarire akîîraga Njosebu mantû mamu ntugû gwa ntugû, Njosebu ateetîgîîria kûmaama n'we. 11 Îndî ntugû îmwe, rîra aathûûngîîre nyomba kûruta ngûgî ciake na gûtirî muntû nwa ûmwe wa mûciî aarî gûku nyomba, 12 amûgwata nguo, akîmwîraga, “Maama naani.” Îndî amwe na ûgu, Njosebu aatiga nguo yake njaraani cia mwekûrû wa Potifa, na aamonyoka auma nyomba. 13 Îndî rîra oonire agûtiga nguo njaraani ciake na akuugia auma nyomba, 14 eeta aruti ngûgî ba nyomba yake abeera, “Eneeni bûbû! Mûibirania ûyû mûkûrû wakwa aareetire aaga nagûtûruma. Aayire nyomba yakwa na aageria kûûngwata kîa inya, îndî ndauga mbu nainya bûra nkîûmba. 15 Rîra eegiirue ndauga mbu, auma nja augia, aatiga nguo yake.”
16 Aiga nguo yake mwanka mûnene wa Njosebu aaya mûciî. 17 Rîru amwaa rûgono wa rûru. Amwîra, “Nkombo îra Mûibirania waareetire aaga araayire nyomba yakwa aageria kûngwata kîa inya. 18 Îndî nkuuga mbu, auma nja augia, aatiga nguo yake.”
19 Mûnene wa Njosebu aathûûra mûno. 20 Mûnene ûyu aaruta watho auga acikaarî bagwate Njosebu bamwingîre nceera, bantû ara agwate ba mûnene baingagîrwa, na aakara ku. 21 Îndî Mwathani n'aarî na Njosebu amwonia wendo bwake bûra bûtathiraga na amûthaarima, kwoogu mûnene wa nceera aakena n'we. 22 Kwoogu mûnene wa nceera aatuîkithia Njosebu mûnene wa agwate bara bangî bonthe na amûtuîkithia mûcûûbîri wa bûra bunthe bwatuîkîkaga nceera. 23 N'ûntû Mwathani n'aarî amwe na Njosebu na naamweyaga kûûmbana ûntûûni bunthe bûra aarûthaga, mûnene wa nceera ataatindanagîra na gîntû nwa kîrîkû kîra kîarî ûmenyeerini bwa Njosebu.