Kîambîrîria 38

Njunda na Tamari

1 Kagiitaani gaku, Njunda aatiga aruagina aathi Anduramu gûkara na muntû eetagwa Ira. 2 Njunda aakomana na mwarî Mûkanaani wa muntû eetagwa Sua. Amûgûra na aamaama n'we; 3 aagîa nda na aaciara kaana ga kaîyî, kara geetirwe Eri. 4 Aagîa nda kaîrî na aaciara kaîyî, na ageeta Onani. 5 Na aagîa na kaîyî kaîrî, ageeta Sera. Aarî Kesibu agîgaciara.

6 Na Njunda aagûranîra Eri mwan'wake ûra mûkûrû, mwarî eetagwa Tamari. 7 Îndî Eri, mwana wa Njunda ûra mûkûrû, n'aarî mwîyia mbere ya Mwathani, na Mwathani amûûraga. 8 Nyuma ya Eri agûkua, Njunda eera Onani, “Maama na mwekûrû wa mûruanyûkwe umûciarîre twana.” 9 Îndî Onani aamenya atî nciarwa inu itiîthîrwa irî ciake; kwoogu rîra aamaamaga na mwekûrû wa mûruagina aatûûraga mbeû nthî, atikaaye gûciarîra mûruagina twana. 10 Na bûbu aarûthire bûtaakenia Mwathani, na amûûraga kinya we. 11 Rîru Njunda eera Tamari mûkwamwan'wake, “Cooka kwa abaagu na ûkare ûtarî mûgûre mwanka mwan'wakwa Sera akûre.”

12 Nyuma ya îgiita rîîraaya ma, mwekûrû wa Njunda, mwarî wa Sua, aakua. Rîra Njunda aarîîkiirie kûmûrîrîra, aathi mwanka Timuna, kîrî antû bara beenjaga ng'ondu ciake, na mûcoore wake Ira Mûanduramu aathiiyania n'we. 13 Na rîra Tamari eerirwe, “Îthe wa mûkûrû waku n'athiîte mwanka Timuna kwenja ng'ondu ciake,” 14 aaruta nguo ciake cia ûntigwa, na eeguîkîra na gîtambaa, eekunîka ûthiû, na aakara mwîrîgaani wa kûthûngîra Enaimu, ûra ûrî barabaraani ya kûthi Timuna; n'ûntû noonire Sera n'aarî agûkûra, na ataarî kûnenkanîrwa kîrî we amûgûra. 15 Rîra Njunda aamwonire, aathûgaania aarî îrwaya, n'ûntû bwa bûra aakunîkîîte ûthiû bwake. 16 Njunda ataamenyaga kana aarî mûkwamwan'wake, kwoogu aathi kîrî we rûteere rwa barabara, amwîra, “Ncû tûmaame naawe.” Amûûria, “I mbi ûgaampa, kaingo ûmaama naani?” 17 Amûcookia amwîra, “Ngagûtûmanîîra kabûri kuuma ndîîthiani ciakwa.” Amûûria, “Ûgaampa wîrane ûkîîya gûgatûma?” 18 Amûûria, “I wîrane bûbi ngaakwa?” Aacookia, “Mbete yaku na mûnyoro na mûraagi ûra ûrî nau njaraani.” Kwoogu amwaa bio, aamaama n'we, na aagîa nda. 19 Tamari aathi mûciî, aaruta gîtambaa, na aacookia nguo cia ûntigwa.

20 Nyumaani, Njunda aatûma mûcoore wake ûra Ira Mûanduramu kuira kabûri kîrî mûka ûra na athûkia into bira eeyanîîte, îndî Ira ataûmba kûmwona. 21 Aûria antû ba Enaimu, “Rîrîkû îrwaya rîra rîakari aaga rûteere rwa barabara?”

Baacookia, “Gûtooro ethîrwa na îrwaya aaga.”

22 Kwoogu aacooka kîrî Njunda amwîra, “Ntiramwona. Antû ba gûntû gûku barambîîrire, gûtooro îthîrwa kûrî na îrwaya naagu.”

23 Na Njunda aacookia, “Ka aige into bibu, tûtikaaye kûthekeerwa. Indarageriirie kûmûrea, îndî ûtiraûmba kûmwona.”

24 Bantû a mîeri îthatû nyumaani Njunda eerwa, “Mûkwamwan'waku Tamari nararutire ngûgî ya ûmaraaya; Na nkûrûki ya ûgu arî na nda na njîra ya ûmaraaya.” Na Njunda auga, “Mûrute nja, abîîthue.” 25 Wa bûra aarutagwa nja, aatûmana kîrî îthe wa mûkûrû wake auga, “Mbirîîtwe nda i mwene into bibi. Raitha wegua n'ûkûmenya mbete îno, mûnyoro na mûraagi i biaû.”

26 Njunda abimenya auga, “Atibîtîîtie i niû ndûthîîte naaî, n'ûntû ntaamûnenkanîra kîrî Sera mwan'wakwa amûgûra.” Na Njunda ataamaama n'we kaîrî.

27 Kagiita gaake ga kûgîa na mwana gagûkinya, kwarî na maatha nda yake. 28 Na rîra eegagua ûrûrû bwa mwana, kamwe kaaruta njara nja; na mwekûrû ûra aamûteethagîîria oogeera njara yaako rûrigi rûûtuune, auga, “Gaka i ko kaumire mbere.” 29 Îndî rîra aacookiirie njara yake, mûruagina auma, mwekûrû ûra aamûteethagîîria auga, “Kwoogu ûûgû i bu weetemera njîra!” Kwoogu eetwa Peresi. Kuuga kuumagarûka. 30 Nyumaani mûruagina ûra aarî na karûrigi gaatuune njaraani yake aaciarwa, na eetwa riîtwa Sera.