Irooto bia Njosebu
37
1 Njakubu aatûûra Kanaani nthîgûrû îra îthe aatûûraga arîîkia kuuma kwa Rabani.2 Rûrû i ru rûgono rwa mûciî wa Njakubu.
Njosebu arî na ûkûrû bwa mîanka îkûmi na mûgwanja, naarîîthagia mbûri na ng'ondu barî na aruagina, aana ba Mbiria na ba Ciripa, eekûrû nkombo; na Njosebu neeraga îthe mantû maathûûku mara aruagina baarûthaga. 3 Îndî Njakubu neendeete Njosebu nkûrûki ya aana baake bara bangî bonthe, n'ûntû kaarî kaana gaake ga ûkûrû; na amûtumîra kabuuti kaarî na njara indaaya. 4 Îndî rîra aruagina boonire îthe n'amwendeete nkûrûki ya aruagina bonthe, bamûthûûra, na batikîûmba kûmwarîria na thîîrî.
5 Njosebu aaroota, na rîra eerire aruagina, bamûmena nkûrûki. 6 Abeera, “Thikîîriani kîrooto gîkî ndararootire: 7 Tûraarî mûndaani, tûkîogaga imanja bia ngano. Warîru kîmanja gîakwa kîarûngama, imanja bienu biakîîthîranîra na biakîthiûrûûkîra na biakîîndamîîra.”
8 Aruagina bamwîra, “Nûkûthûgaania ûgaatuîka mûnene ûtwathe?” Kwoogu bamûmena kinya nkûrûki n'ûntû bwa irooto biake na bûra augîîte.
9 Rîru Njosebu aroota kîrooto kîngî eera aruagina, “I ndararootire kîrooto kîngî, kîra ndaroonire riûa, mweri, na nthata îkûmi na îmwe ikîîmbîndamagîîra.”
10 Eera kinya îthe kîrooto gîku, na îthe amûgondokera, amûûria, “I kîrooto kîa mûthemba mûbi gîku? N'ûkûthûgaania nyûkwe, aruanyûkwe, na niû tûkaaya tûkwîndamîîre?” 11 Aruagina bamwîgîîrua rûriitho, îndî îthe aiga mantû mamu nkorooni akîmathûgaanagîria.
Njosebu eendua n'aruagina
12 Îîndî aruagina baathi kûûraaya mûno kûrîîthia mbûri na ng'ondu cia îthe akubî na Sekemu. 13 Njakubu eera Njosebu, “wa ta bûra wiyî, aruanyûkwe i barîthîîtie mbûri na ng'ondu akubî na Sekemu. Ncû, ingûgûtûma kîrî bo.”
Aacookia, “Gûtirî na thîîna.”
14 Kwoogu amwîra, “Îthi wone wegua aruanyûkwe na mbûri na ng'ondu i beega, na ûcooke ûmbîîre.” Kwoogu amûtûma kuuma kîbondeeni kîa Eburoni.
Rîra Njosebu aakinyire Sekemu, 15 muntû amwîthîra akîriûngariûnga naagu kîthakaani amûûria, “I mbi ûgûcwaa?”
16 Amûcookeria, “N'aruayia ngûceria. Waûmba kûmbîîra naara barîîthîîtie mbûri na ng'ondu ciao?”
17 Muntû ûyu amûcookeria amwîra, “Ibaraumire aaga, ndareegiirue bakiuga, ‘Ga tûthi Ndothani.’ ”
Kwoogu Njosebu aathiingata aruagina abeethîra akubî na Ndothani. 18 Îndî bamwona arî kûraaya, mbere abakinyîîra, bamûbîndîra njûri ya kûmûûraga.
19 Beerana, “Mûrooti ûra akûûya! 20 Ncûûni îîndî, ga tûmûûrage na tûmûgere îrinyaani rîmwe rîa mama; na tuuge i nyamû ya kîthaka îramûûragire. Rîru tûkoona irooto biake ara bigaakinya.”
21 Rîra Rubeni eegiirue ûgu, aageria kûmwonokia kuuma njaraani ciao. Auga, “Menya tûmûruta mwoyo. 22 Menya tûtûûra nthakame yake. Mûgereeni kîrinyaani gîkî naaga rwanda, îndî bûtikaamûtonge.” Rubeni augire ûgu akîmwonokia kuuma kîrî bo na amûcookia kîrî îthe.
23 Kwoogu rîra Njosebu aakinyire kîrî aruagina, bamûruta kabuuti 24 na bamûthûkia bamûgera îrinyaani. Rîarî rîtheri; gûtaarî na rûûyî ndeeni.
25 Bakûrîîkia kûrûtha ûgu baakara nthî baanjîîria kûrîa; na bakîraitha boona gîkuundi gîa antû ba Aisumairi baayîîte baumîîte Ngiriandi. Nkamîîra ciao ciakamatîîte tûnyamû tûra tûnuunkagia irio bwega, baarî njîraani beendamîîte babiirîîte bwa Miisiri.
26 Njunda eera aruagina, “I baita mbi tûkoona kuumania na kûûraga mûruayia na rîru tûgerie kwitha gîkuû gîake? 27 Bantû a kûmûûraga, ga tûmwenderie abiacaara baba Aisumairi. Menya tûmûûraga, n'ûntû i mûruayia, nthakame yetû yongwa.” Na aruagina beetîgîîria.
28 Kwoogu rîra abiacaara ba Mindiani baayîîre agu, aruagina baamûruta îrinyaani na bamwendia kîrî Aisumairi Sekeri mîrongo îîrî cia thaabu, na Aisumairi babu baira Njosebu Miisiri.
29 Rîra Rubeni aacookire kîrinyaani na oona Njosebu atirî ku, aatembûranga nguo ciake. 30 Aacooka kîrî aruagina abeera, “Mwana ûra atirî oogo! N'ata nkûrûtha îîndî?”
31 Rîru baathûkia kabuuti ka Njosebu, baathîînja mbûri na baatombeka nguo înu nthakameeni. 32 Bairîra îthe nguo înu bamwîra, “I tûramîonire. Raitha wone wegua n'ya mwan'waku kana t'yo.” 33 Amîraitha amîmenya auga, “Nguo îno n'ya mwan'wakwa; nyamû ya kîthaka nîramûrîîre; gûtirî nkanja Njosebu n'aratembûrangirwe tûcuncî tûcuncî.” 34 Njakubu ateembûranga nguo ciake i kîeba na eekîra mathango. Aarîrîra mwan'wake kwa îgiita rîîraaya. 35 Nthaka ciake cionthe na aarî baake baûkîîra kûmûbooreria; îndî aarega kûboorerua, auga, “Nkeendama nthî ya akuû wa nkîrîragîra mwan'wakwa.” Kwoogu aathi na mbere kûrîrîra mwan'wake Njosebu. 36 Kagiitaani gaku Amindiani i baarî bakûmwendia Miisiri kîrî Potifa, mûrûngamîîri wa aruti ngûgî ba Faraû.