Yesusé rut I néli po Gubernur Pilatus ni
(Mrk. 15:1; Luk. 22:66-71)
27
Po waktu ta tamamóné i lesu né, férimé imam ta rpélóyé nesté re kyat tut Yahudi né re rfajólo si bóngo rfasogaro si re wlori be pusó bo rpuné keé Yesusé. 2 Se pocé bóngo rpiténé keé I, ga rut I néli po gubernur Pilatus ni.aYudasé npuné ni diri
3 Yudas ta nwagé Yesusé njé némnaw ta bo rpuné keé Yesusé né, tabóngo nmanyasale. Se nfan néli imam ta rpélóyé né re kyat tut Yahudi né ni, bo nfamul pipis salaka yófételé né. 4 Néli, bóngo nécegé si faje, “Ya kwagé Yesus po mew ni né, ta délé re ksól pélóyé! Sababta I renó sélsól pa, ga ya kpo keé I po mew ni bo ffamóté keé I né.”
Mayta si ga rcónglo i faje, “O, amé re kuné pana. Necé awé!”
5 Nlongé ta néi, tabóngo nfan néli po Um sambayang ga ntéo keé pipisé né salaka né po Um Sambayang ta npélóyé njé ni. Rewóré ta néi, ga fané nésóbéyé ni diri se nmót i.
6 Imam ta rpélóyé né rfajólo pipisé né, bóngo réceg faje, “Pipis ta nte i, pipis léo, sababta nwagé kyaté se rfamót i né i mulo. Hukum Tauraté né npo fié pa bo pipis ta dolo fajé tfasung po um sambayangé ni sadaka góo lo.” 7 Pocé bóngo rfasogaro si se pipis ta néi rgono keé kyat ta nénpe kulen sepé njé nó bét isó. Rgon bétbét ta njé, bo rfaléléy kyat wémwómé né riri kubur góo i. 8 Necé ta mulo ga bétbét ta njé i, rfangósno i, “Bétbét léló.” Ngósén ta néi myangés pa sogado ngénngan péséwé nte. 9 Rgon bétbét ta néi, necé tatubé Jou Lahatala re nécegé rewóré ta bo ndadi i, se ni nabi Yeremia nlefo po ni Buké wlólo, ta i glio faje,
“Kyat Israelé né rgon kyaté njé né,
récegé i mulo pipis salaka yófétel.
Pipis ta né néléy po si ni nmulé,
10 se rgono bétbét po kyat ta nénpe kulene njé ni.
Necé ta Jou Lahatala nfaréné rewóré,
se nfawómo ya né.”b
Yesusé négbon po Gubernur Pilatus ni
11 Yesusé negbon po gubernur Pilatus ni, bóngo gubernure njé nutné I, “Fatuwé, ta Awé nte kyat Yahudi né riri kolano Awé?”
Yesusé ncónglo i, “Ta dolo awé mécegé né.”
12 Pocé, imam ta rpélóyé né re guru agama né rpe nó ta lé po Pilatus ni nuén fis néli, mayta Yesusé ncóngél gélesó pa. 13 Pocé ga Pilatusé nutné Yesusé nóté, “Mlongé pa?, ta rfabingé aw po ya ni ta féléo i né?”
14 Mayta Yesus ta délé ncóngél facuci ma tisé, sogado gubernure njé nénuta, “Tabeu, rfabingé I ta féléo ta né, ga ncóngél pa né!”
Gubernur Pilatusé néyówé yéféné bo nfasópén Yesusé, ma ndadi i pa
15 Gubernure njé nuné pana bo npe sói nóté. Mayta, iga mgo po kyat Yahudi né riri ngénngan ta pélóyé né, i nénfasópéné riri kyat bui faisó, kyat pai ta si wlori ncuka rfasópén i. 16 Pocé fajé reni kyat sélsól isó i po bui lo ngósno Yesus Barabasé. Kyat félé né runé i kyat léo i. 17 Kyaté né re rfajólé bóngo gubernure njé nutné si, “Ya bo ksópné kyat bui faisó, se pai ta mewé wlomi ncuka bo kfasópén i? Barabas pari Yesus ta rkakmé I Kristusé njé?” 18 Sogado gubernure njé nutné si fajé né, i nuné kyat ta rkuasa po agama Yahudi né rtelengen Yesus, ta mulo rpo I néli po i ni né. Mayta Pilatusé nénuta masike rtelengen I ma, kyat ta félé né nase rfasópén Yesusé.
19 Pocé ta gubernure njé ntolné ni kawasa né lesu, ga ni pégelé nfaftóté néli i ni, “Kyat ta njé I péséwé kbélisé I se ta délé kémtaté. I ncól pa, se mati ma mpe I gélesó esó na!”
20 Mayta, imam ta rpélóyé né re kyat tut Yahudi né rérfasungo kyat ta félé né méiténé, réceg faje, “Féror po gubernure njé ni bo nfasópén Barabas bo Yesusé ga rpuné keé I!”.
21 Gubernur Pilatusé nutné kyaté né nuéncó nóté, “Si dórén luwé nte, pai ta ya bo kfasópén I?”
Bóngo kyat ta félé né rcónglo i, “Msópné Barabasé.”
22 “Pana fajé, Yesusé ta rkakmé I Kristusé njé bo kpe I fawa?”
Si rcóngélé, “Msalibé keé I.”
23 “Mayta I ncól sói se?”
Pocé rbóng ta rgélayé rfakuat si, “Msalibé keé I!”
24 Kyaté né réceg be ta né, se guburnere njé ma nfakduko i pa. Bo ndé Yesusé ma, ndodato nase kyat ta félé né rlongé i pa, tagare némnawé kyaté né re bo rngamo néli re lima. Se nésué i néli, néyó wóé, nut néli po kyat kawasa usnori lo se néus fao bóngo néceg faje, “Kyat ta njé I nmóté né, ya kuné pa. Necé mewé!”
25 Farimé kyat ta pocé né rcónglo i, “Fajé óro! Wóré ga am re ntumamé né ta kpó ni sélsólé né!”
26 Bóngo Pilatusé ndéréré kyaté né wlori se ncópné keé Barabasé. Yesusé ga, nané ni tentara né réswaké I re wólé. Rewóré, npo keé I néli bo rsalib I.
Tentara né rfaméngmongo keé Yesusé
(Mrk. 15:16-20)
27 Gubernure njé ni tentara né rut Yesusé se rcungé I némin Gubernure njé ni umé lo, bóngo farimé si rfajól néli Yesus ni. 28 Pocé résólé keé Yesusé ni kabaya njé, ga réngalno I juba mékót isó ta dolo kolano né riri né. 29 Bóngo ryóném wólé ta reni gémgaméné, rpe dolo kolano né riri dailoke, se rduo i nóp Yesus béboko lo. Rfatano i teton isó, ga rétig nóp usno lo né se rfasedu-sedu I, “Jou Kolano, ksuba Awé, kyat Yahudi né riri kolano ta Awé.” 30 Pocé bóngo rfatitfo I, re ryó teton ta po fao lo njé ga rfaspésé nóp béboko lo. 31 Rfaméngmóngo I rewóré, résólé keé juba njé ga rfaisno I ni kabaya njé nmulé. Rewóré ta néi, ga rcópné I nóté, bo rut I néli po géwgów ta bo rsalib I lo né.
Yesusé résóbéy I po salibé lo
32 Po riri fénfané lo lesu né, ga rfapdipén re kyat Kirene isó ngósno Simoné bóngo rerose i lima, se rané i npó Yesusé ni salibé njé. 33 Rfané rwóm po géwgów ta ngósno Golgota, ta ni ngale né “gegegéy góo”, bo rsalib I pocé. 34 Pocé, tentara né rdo Yesus anggur ta rfangbóngo re urém diréncó, bo rpaku I né, ma nbósém pisé na. Mayta taga neflep cuci tabóngo wlo niném pa. 35 Rewóré ta né, bóngo rpaku I po salibé lo ga rfawoslé salibé njé néya. Rewóré, répatén lotreye bo runé pai ta nduké ni kabaya né. 36 Pocé bóngo réntolén si se réjaga I. 37 Po ya béboko lo né reni fófén isó rlefo faje, “Neje Yesus, kyat Yahudi né riri kolano I!” Meiten ta né i ta npe sogado kyaté né rfamót I. 38 Pocé faje ma reni kyat ta rmafalewés séluwé rsalib si re Yesusé né, isó i po ni faspal wónéyé, isó i po ni faspal balété. 39 Kyat ta rwetco po salibé njé ni né rfamia-mia I bóngo rfakcegé I faje, 40 “Cogo Awé ro ta bo megene keé Um Sambayang ta npélóyé njé, ga ni ta ngané telé le re mfawoslé i nmulé! Bo Awé ro ta Jou Lahatala ntu Awé, mtebo Aw po salibé njé ni, bo mfasalamaté nim diri!”
41 Fajé nóté re imam ta rpélóyé né, guru-guru agama, re kyat tut-kyat tut Yahudi né ma rfagcegé Yesusé. Réceg faje, 42 “Ie nfafié kyat félé se rmót pa, mayta I ni diri né ga n-gali néfen pa! Bo I kyat Israel amé mam kolano I, ntebé po salibé lo ro, né ga tagare amé kdélé I! 43 I nécegé ni ngongano be po Jou Lahatala ni sababta I cogo Jou Lahatala ntu I. Se ta fié Jou nfasalamat I bo témnawé.”
44 Kyat léo séluw ta rsalib si re Yesusé nesté ma réceg I fajé nóté.
Yesusé nmóté
45 Ta ngénngané nfapéluné né, télél be bóténé njé ndérorémé ndimé i, i mnuwo jam nuén telé wlólo. 46 Hale ma tok nuén tel pa? Bóngo Yesusé n-gélayé, ta délé nfakwat i néceg faje, “Eli-Eli, lama sabakhtani?” Necé ni ngalé, “Ya nik Jou Lahatala! Ya nik Jou Lahatala! Mpe sói se mfatopo keé Ya né?”c
47 Kyat séfis néli ta rwosél pocé né rlongé gégliné ta njéi, bóngo réceg ta, “Eh, flongé ó? Nkakém nabi Elia!”
48 Rlongé ta né tabóngo riri dél isó ncéreré néli, néyó gémuné diréncó ta ncilét wóé fié, se ncowlé nóp anggur ta nménile lo. Rewóré, netepse i po ay tubo lo ga néyété i néya bo nfainmo Yesus. 49 Kyat ta iglé né ga réceg ta, “Ma mfainmo I su na. Téftón facuci su. Nkakém Elia, se ma ga Elia bo ntebo I po salibé lo.”
50 Pocé Yesusé n-gélayé nóté, nfakwat I, bóngo wlo mwetésé.
51 Mélil be Yesusé nmóté né, bóngo fafaket ta résóbéy po Um Sambayang ta npélóyé njé ni né ma némgawés abén luw po ya ntit pópé.d Taga reni suy ta pélóyé se bóténé njé ngéwgiwe ndimé, lóy ta pélóy-pélóyé né ma fatepówo i. 52 Kubur-kuburé né ma fatepilo i, se Jou Lahatala ni kyat ta wlori métegél ta re rmóté né ma, rpangéné nmulé se rcópén si lima kuburé lo. 53 Kyat ta nesté, pote se néli Yesusé nmóté se npangén nmulé né, sié ta rfan po pnuw Yerusalemée se kyat félé rémnaw si.
54 Tentara né si re riri kapala ta réjaga Yesusé né, rbósém suyé re rémnaw ta féléo ta ndadi i né, pocé ta délé rémtaté, se réceg faje, “Fatuwé né ga, Ie Jou Lahatala ntu I!”
55 Pocé fajé, reni mépin félé ta rfataw si se rfaléngóto sói ta ndadi i né. Ta Yesusé nfan po Galilea lesu sogado waktu ta né, mépin ta nesté si ta réndéréré Yesusé se rén-gawénéy I. 56 Po mépin-mépin ta né ma reni Maria ta i lima Magdalena, Maria Yakobusé i re Yusufé riri mama, re légaé Zebedeusé ni pégelé.f
Yusufé nput Yesusé
57 Pocé reni kyat Arimatea isó ngósno Yusufé. Ie ma ndédéréré Yesusé. Kyat ta njé reni renó félé. Ta re bo dorémé né, 58 nfan po gubernur Pilatus ni, néroré bo nyó Yesusé ni bangke njé bo nput I. Néli, Pilatusé ma npo i fié se nané ni kyaté né rpo i. 59 Yusufé nyó Yesusé ni bangke njé, bóngo néyémo I re ngalépé mfus ta nóbéné. 60 Rewóré bóngo nut I néli po i ni kubur ta tagare nedoke i po métété mya isó ni. Nput Yesus po kubur njé ni bóngo nfalilis lóy pun lóy pusó se nfaketo kuburé njé ni gbonog. Rewóré bóngo re néléy i. 61 Mayta mépin séluwé réréntolén si pocé régbon néli kuburé njé ni: Maria ta i lima Magdalena, i re Maria Yakobusé ni mama.
Tentara né réjaga Yesusé ni kuburé njé
62 Ni tómémóné ta mgo ngénngan Sabaté néh, imam ta rpélóyé né re kyat Farisi né rfané régbono Gubernur Pilatusé, 63 bóngo récego i faje, “Légaé, amé kfatélolmo amé, ta kyat ta nmalólé njé nmót pafule né, re nécegé, bo nmóté né, ni ngané telé, nase npangéné nmulé. 64 Se ta mulo kfabingo awé né, mati na ga ni motemote né néli rlewésé keé ni bangke njé ga réfétén cogo re npangéné nmulé. Bóngo nase kyaté né nbóng ta félé ta rdéréré ni dodoto ta sólé né. Se nte amé kéroré, bo mané tentara né néli réjaga ni kuburé njé fafié fa-ngané telé wlólo.”
65 Pilatusé ncónglo si, “Iya, se nete kpo mew tentara nesté. Ffané ro bo féjaga kuburé njé fafié!”
66 Pocé ta rfan néli kuburé lo. Néli, kuburé njé ni, tentara né rfamétuwé kuburé gbono njé bo isó ma néfené népil i na. Bóngo réjaga kuburé njé.