Kyat ta rénut
Jou Yesus ngósno né
Jou Yesusé nfatélolmo ni kyat ta rénut I ngósno né ta Jou ni Roh njé bo ntebé
1
Légaé Teofiluse, anik dél ta fié. Ya Lukasé, klefo méiténé nte kéfétno awé. Ya nik buk pusóa ta fakéjeré né re kéfétno aw ta féléo ta Yesus re npe re nfasodoto né, 2-3 sogado ga ngénngan ta térélóngé I néya po soroga lo né. Yesusé nmóté npangéné né, mayta térélóngé I pafule, I nfano ni kyat ta rut I ngósno néb, ta re npili si nesté. Nfaftóto si félé ta Jou ni Rohé njé nécego I né. Ta Yesusé nécegé né télél be ndadi i ndimé, pocé ga runé ta fatuw-fatuw I re npangéné. Ngané yóféfóté wlólo nénwómo si, néfétno si ta Jou Lahatala nase ndadi kolano nkawasa kyat ta rdélé I né.4-5 Nuéncó I re ni kyat ta rut I ngósno nesté rfajólo si, bóngo nfaftóto si faje, “Féléy Yerusalemé né, mati ffénfané mew su na. Féftón ta nik Moke Jou Lahatala néjaji mew tatubé né, ta ni Rohé njé bo ntebé po mew ni. Ta néi Ya ma re kéfétno mewé ro. Yohanes ta nbaptisé kyaté njé nbaptis mew re wóé, mayta góli ngané fis néli le, Jou Lahatala nase ntebo ni Rohé njé po wlomi wlólo.”
Yesusé térélóngé I néya po soroga lo
6 Ta Yesusé nmóté re npangéné se nfano i ngané yóféfóté né, pocé ga I re ni kyat ta rut I ngósno né rfajólo si po métét Zaitun, bóngo rutné I, “Légaé, ngané fisé ga taga mdadi kyat Israelé rir Kolano, bo kyat Roma né rkawasa amé nóté na? Nete ro pari mnuwé lesu?”
7 Pocé bóngo Yesusé ncónglo si, “Mewé fpe sói se futné? Ta féléo i né ndé be po ya nik Moke ni. 8 Mewé fféftón be Jou ni Rohé njé bo ncung po wlomi lo. I ncung po wlomi wlólo, ni kawasa nase n-gali mewé féfétén Ya po Yerusalem, néli re lima Yudea re Samaria, sogado bótén ta wómé ntit ta wómé.” 9 Yesusé nméiténé rewóré, tabóngo térélóngé I néya soroga lo. Ni kyat ta rut I ngósno nesté rémnaw ta térélóngé I né, réngóto I sogado ncung néya mété wlólo.
10 Rérékngól néya lesu, télél be kyat séluwé rosél po lapori lo. Kyaté nesté riri kebaya né mfusé, 11 bóngo récegé, “É, kyat Galilea ta mewé, fpe sói se fekngól néya? Yesus ta dolo mewé fémnaw I nawété njé, I nase ntebé nmulé, ndé mét ta dolo né nóté.”
Kyat ta rénut Jou Yesus ngósno né réyówé Yudasé ni iwno
12 Rewóré ta néi, kyat ta rénut Jou Yesus ngósno né si po métét Zaituné rduwen nópé, bóngo réléy néya Yerusalemé, ta ni lówo né nihalé ma kilo pusó. 13-14 Rwóm po Yerusalemé né, rcung po um ta rtolno i njé ni, bóngo rpak néya riri kamaré lo. Pocé rérénfajólo si, wlori be pusó bo rméitén rdé Jou. Si ta pocé né, ngósnori né fanfaje:
Petrusé,
Yohanesé,
Yakobusé,
Andreasé,
Filipusé,
Tomasé,
Bartolomeuse,
Matiusé,
Yakobusé (Alfeusé ntu i),
Simoné (ta i re ni délé né bo rfaungé keé kyat
Roma ta rkawasa po riri bótén Israelé né),
re Yudasé (Yakobusé ntu i).
Mépin ta réndéréré Jou Yesusé né ma rcung pocé nóté, si re Yesusé ni Neke re fténo nesté.
15 Nganesó ta si rméiténé rdé Jou né, kyat ta rfajól pocé né nihalé witéncó re yóféluwé. Pocé bóngo Petrusé nosélé se nméiténé, 16-19 “Anik délut, afténog re rémag ta mewé, it farimé re tuné rir dél Yudasé re nmóté. I ma dolo ité nte le, Jou Yesusé npili i nfafané ni yabé né. It re i tfadéréré néli re lima, nópé ga nwagé keé Jou Yesus po kyat ta rgó I né. Ni mulo né, ntuklo bétbét esó. Nfan néli nó bétbété lo né, bóngo nebebse i nópé se ni sno njé teporese, sogado ni tuté njé ma ntelólese, bóngo nmót i. Farimé kyat ta rtolén po Yerusalemé né rlongé, bóngo rfangósno bétbété njé Hakal-Dama, ta ni ngale bétbét léló. Ta Yudasé npe fajé né, masike lé, mayta fajé óro, sebabta necé tatubé Jou ni Roh re nfabingo kolano Daud. Se nete re ndadi i ro.
20 Se ta Yudasé re npe né, tatubé lima lesu kolano Daud re nlefo po ni Buk Mazmuré, i ni glio né faje, ‘Bo kyaté njé re nmóté, ni umé njé mati kyaté né rtolno i na, faisó le ma tisé.’ I nlefo ayat esó nóté ta i ni glio né faje, ‘I ni yabé né nase kyat nésé niwno keé.’
21-22 Se necé ta mulo ité nte mare téyówé kyat faisó bo niwén Yudasé. Kyat ta nejé i bo nbóng iti dórén yófésó re isó nte, bo it re i tfabémbingé ta Yesusé fatuw-fatuwé nmóté mayta npangéné nmulé. Se mare téyówé kyat faisó ta re némnaw farimé ta Yesusé re npe né. It re i tfadéréré re Yesusé, ta faiwóbno lesu ngénngan ta Yohanes nbaptisé kyaté né sogado Yesusé térélóngé I néya po soroga lo né. Kyat ta njéi ta téyówé i né.”
23 Petrusé nméiténé rewóré, bóngo rfaléyówé kyaté. Pocé, rduké kyat séluwé, Yusufé, i re Matiase. (Yusufé njé ngósno abén luwé nóté: Esó Barsabase, esó Yustusé). 24-25 Rkakém si lima, bóngo rméitén néya Jou ni, réceg ta, “Jou, Awé muné kyat farimé wlori né. Se Jou, kéroré bo mfaftulo amé: kyat séluwé nesté, pai ta bo méftul i bo niwén Yudasé. Kyat ta njéi nase ndéréré amé nfafané nim méiténé né, Yudasé re nfatopo keé nim yabé né se. Yudasé re nmóté, re nfan po géwgów ta Awé re mfaléléyé. I ni góo ta néi ta lé.” 26 Réror néya Jou ni rewóré, bóngo rlefo ngósén abén luwé né po lóy ta mya-mya lo. Rfalgigé rewóré ga répówsé nópé, pocé ga mnapo Matias ngósno. Pocé bóngo rélóngé Matiase, nbóng kyat ta rénut Jou Yesus ngósno yófésó re isó né, se néléy yófésó re séluwé nmulé.