1 Tesalonika
Surat ta faiwóbno ta Paulusé
nfanaté po jemaat Tesalonika
1
Faftén re farémóné ta mewé, mew ta fdélé Jou Yesus po pnuw Tesalonika. Ya Paulus, Silwanus re Timotiusé, kfanaté mam suraté nje néli po mew ni, mew ta fdadi rir Papa Jou Lahatala I re Jou Yesus Kristusé ni kyaté mewé.Jou ni féyfié né ntébtubo re ndéréré mewé se wlomi né ménóné i le.
2-3 Amé kméitén kdé Jou Lahatala né, kenfatélolmo mewé ndimé. Kécegé mam syukur ta pélóy po Jou ni sababta mewé re fdélé I ta fatuwé, se re fpe I ni yabé né. Mewé ma re ffamasié isó re isó sogado fgali kyaté né rémgaomi pa. Mewé ma re fngongano ta fatuw-fatuw Jou Yesus Kristusé bo nwómé nmulé se féféntébné pa fdéréré I né.
4 Mam dél-dél ta Jou Lahatala nmasié mewé, Jou re npili mewé fdadi I ni kyaté mewé. Né amé re kuné 5 sababta ta faiwóbno amé kfawómo mew habar ta fié ta bo fduk salamat lima Jou ni né, amé kméiténé le pa, mayta Jou ni Rohé ni kawasa ta ndadi i. Ni Rohé njé ma npe se mewé funé fatuw-fatuwé méiténé né ndé lima I ni. Ta am pocé mew ni né, mewé ma fémnaw amam fénfan re téltoléné, kpe ta féléo i né maduga kgali mewé bo fdélé Jou.
6 Ta mewé flongé re fdélé Habar Fio ta kuto mew né, necé re fdéréré ta amé kpe, re ta Jou Yesusé npe né: Né, masike kyaté rfakangelang re rfanpuné mewé, Jou ni Rohé njé nfakuaté mewé se wlomi né séngséngé bóto ta flongé Habar Fio njé né. 7 Sogado kyat néli lima po bótén Makedonia sogado lima bótén Akhaya né ma réyówé bo rpe ta dolo mewé fpe né. 8 Jou ni Habar Fio né mewé flongé ntubé, sogado ga kyat félé po bótén Makedonia re po bótén Akhaya néli lima rlongé rdime. Géwgów pua le ma, kyat ta rdélé Jou né farimé re rlongé ta mewé fdélé Jou Lahatala fié. Se masike amé kéfétén mew po kyat pana. 9 Sababta kyat félé ta réfétén mew po am ni. Réfétén ta kwóm po nimi pnuwé lo, kuto mew Habar Fio ta bo fduk salamat lima Yesus ni, pocé bóngo mewé fséngé amé. Masike tatubé fógé re tófélé né mewé fpe nimi jou ma, nte mewé re flongé amam méiténé né, tabóngo ffatopo keé se fdéréré be Jou Lahatala. Jou ta fatuwé né Jou ta njé I óro. I nénmót dolo tófél re fógé né pa. Se nete mewé re ffapélóy Jou re fpe ta I wlo ncuka né. 10 Mewé ma re tebtebnomi pa, féftón I Ntu Jou Yesusé ta bo nwómé nmulé yama soroga. Yesusé nmóté né, Jou Lahatala re nfapangén I nmulé. I bo nfayangés itérór sélsólé bo Jou Lahatala ma nfasól it na.