1 Tesalonika 2

Paulusé nfafan Jou ni méitén po kyat Tesalonika né, npe riri ta fié ndimé

Anik délut, faftén re farémóné ta mewé, farimé ité tdélé Jou Yesus. Mewé re funé ta fakéjeré né kfawómo mewé Jou ni dodoto né, mewé re fdéréré fié, se ndél pa bo reni kyat ta récegé amam wémwómé né cogo reni ngale gélesó pa. 2 Mewé re funé ta am po pnuw Filipi lesu né, réswako mam wólé, rpitén am re rfaméymóy amé. Mayta Jou Lahatala nfakuaté wlomamé né se kfalów am néli po mew ni se kéfétno mewé nóté, Habar Fio, né Jou Yesusé ta nfasalamaté kyaté. Po mew ni ma reni kyat ta rcawan amé mayta ktébné pa, kéféténé le Jou ni dodoto né. 3 Amé kané mewé fdéréré Jou Yesusé. Farimé ta kécegé né, fatuwé ndimé, kakale mew pa, ta kécegé né ncópén po wlomam ta beresi lo. 4 Fajé nóté, ta kécegé né kpe kyaté wlo pa, mayta kpe be ta mgo Jou Lahatala wlo, sababta I ro ta nuné po wlomamé wlólo. I ta nané amé kfawómo mew habar ta fié sababta ndélé amé ta bo kfawómo mewé né fié. 5 Mewé re funé wlomamé né méteglo mew sababta nuéncó pafule ta kécegé né maduga be po sumomamé lo le pa, kméiténé né ma wlomam néli po nimi pipisé lo pa. Jou Lahatala ta nuné wlomamé né. 6 Amé, Jou Yesus Kristus ta néftul amé kenut Jou ngósno né se ndé fafié bo kané mewé fgali amé mnómé. Mayta amé kpe fajé pa, kpe mam diri dolo kyat ta pélóy pa, kéyówé teltail po mew ni pa, re po kyat nésé ni pa. 7 Amé kfamya wlomam po mew ni, se kuté mew fié dolo mépin isó ta nmasié ntu né se nut si fié. 8 Amam masié po mew ni né ta délé pélóyé, ta mulo kfawómo mewé Habar Fio né Jou Yesus ta nfasalamaté kyaté. Kmasié mewé né, kfawómo be méitén pa, mayta sogado wlomamé né ma kpo keé mewé bo kgali mewé sói le sogado kfatemóto. Ta délé kmasié mewé!

9 Nik délut, faftén re farémóné ta mewé, ffatélolmo mew fafié: Ta amé ktolno mewé né, masike amé kfafan Jou ni dodoto ma, amé kpe yabé nésé nóté, kéyówé mam pipisé, bo kfamétéw mew pa. Kpe yabé né ta délé météwé dorém re ngénngané. Necé farimé maduga bo kfawómo mew Habar Fio lima Jou Lahatala ni. 10 Mewé re funé amé, Jou ma re nuné amé, ta am po mew ni né, kpe be ta métegélé, ta nfamgo re Jou wlo, se mew ta fdélé Jou Yesusé né, amé remam sélsól gélesó pa po mew ni. 11 Mewé ma funé, amé kfasodoto mew isó-isó dolo légaé isó ta nuté ntu né fié. 12 Né, amé kané mewé bo nimi fénfan re téltoléné né farimé fpe be ta Jou wlo ncuka. Pua ta re fdéréré fié, amé re kécego mewé ma ftébné na. Pua ta ffafané féfen pafule, amé re kfakuaté wlomi né bo sogado fdéréré. Jou Lahatala ndadi kolano se nkakém ité tdadi ni kyaté ité, bo tbósémé ni féyfié ta pélóyé né.

13 Syukur fapélóy po Jou Lahatala ni sababta Jou Lahatala ni méitén ta amé kuto mewé né mewé flongé fié. Ta ga kéceg néya, mewé re ffayalé ro ta necé lima Jou Lahatala ni, lima am ni pa. Fatuwé, méitén ta né, Jou ni méitén, ta npe yabé po mew ta fdélé Jou né wlomi wlólo. 14 Necé ta mulo nimi dél fapnuwé né riri lé Jou Yesusé se rfakangelangé keé mewé. Mayta masike rfakangelangé mewé ma, mewé re tebtebnomi pa fdéréré Jou né. Se afténog re rémag ta mewé, mewé dolo Jou Lahatala ni jemaat-jemaat ta rdélé Jou Yesus po bótén Yudea né nóté. Kyat Yahudi ta rdélé Jou Yesus pa né rfakangelangé keé si ma, si reé Jou pa. 15 Kyat Yahudi né ro ta rfamóté keé Jou ni nénan-nénan ta rfawómo ni méitén tatubé né. Si ma ta rfamóté keé Jou Yesusé né. Ta ga rfanpuné re rfaungé keé am po nimi pnuwé lo. Ga riri lé farimé kyaté! Ta si rpe né Jou wlo ncuka facuci ma tisé. 16 Ta ga nte bo kwómo kyat ta Yahudi si pa né, mayta kyat Yahudi né rpo am fié pa nóté, si wlori pa bo kfafan Habar Fio ta nfasalamat kyaté né. Rpe ta necé i, sogado róri sélsólé né re nbaké, pocé ga ta ga nase rémnawé, ta Jou Lahatala bo nfasólé keé si!

Paulusé wlo ni déréro bo nfané neflengen jemaat Tesalonika né nóté

17 Anik délut, faftén re farémóné ta mewé, farimé it ta tdélé Jou Yesusé. Ta kyat ta riri lé Jou Yesusé né rfaungé am po nimi pnuwé lo né, masike mnuw pafule, mayta ta délé klolémé mewé. Kémnawé mew pa né, wlomamé né kangelang! Kénuta mewé le se ta délé kéyówé yéfén bo kfakduké kdé mewé nmulé. 18 Wlomamé bo kwómé kéflengéné mewé nóté. Ya, Paulusé ma, re kéyówé yéfén nuén fis néli bo kfakduké kdé mewé, mayta setané riri kolano njé nénfafaket amé, ta mulo ga kwómo mew pa né. 19 Mayta klolémé mewé le. Sababta bo mew pa, ga pai nóté? Mewé ta flongé amé né tabóngo re fdélé Jou ta fatuwé, se mam yabé ta kpe né, mulo né myangso am pa. Se pote se néli, Jou Yesusé nwómé nmulé, nase séngséngé bóto it po I usno lo, kéceg ta, “Alli, ta kfafan Jou ni méiténé né, ta kngongano né re ndadi óro, sababta kyaté né re rdéréré ta fatuwé.” Mewé ta re fdéréré ta amé kécego mewé né, se nase bo kduk mahkota. 20 Necé fatuwé, mewé ta fdéréré Jou fié ta mulo nase ngósnomam fié po Jou ni. Tagare mewé lenglongomi fié, ta mulo wlomamé né séngséngé bóto.