1 Tesalonika 3

1-3 Se ya re Silwanus re Timotiusé klolémé mewé. Mewé re fduk penpun re kangelang félé lima kyat ta riri lé Jou Yesusé né se kdodato mewé. Wlomamé né néfen pana se nte kfanaté Timotius néli mew ni, amé ga kéftón pote po pnuw Atena. Timotiusé njé ndélé Jou Yesus dolo ité nóté se am re i kpe Jou Lahatala ni yabé, kenfawómo Habar Fio ta Jou bo nfasalamaté kyat ta rdélé I. Amé kané Timotius néli né bo n-gali nfakuat mew wlomi né, bo mewé futa le na nimi kangelangé né mayta fbóng ta fdélé Jou fatuw-fatuwé. Mewé ma re funé, Jou Lahatala nécegé, it ta tdélé I né, kyaté né bo riri lé ité se rfakangelang ité. 4 Ta am pocé po mew ni né, rfakangelang mew pafule ma, amé rekenfabingo mewé ntubé, “Bo tdéréré Jou Yesus ta fatuwé né, nase kyaté né riri lé ité se rfanpuné ité re tduk kangelang félé nóté.” Se kangelang ta ité re tduké nte, mewé ma re funé. 5 Né ta mulo sogado kané Timotiusé néli mew ni bo néflengéné mewé, bo nuné mewé fdélé Jou lesu pari fdélé I pana? Ya mare kuné ta né. Bo tisé, nase kékénuta be mewé le. Kdodato be setané riri kolano njé nfalélólé mewé bóngo fdélé Jou pana, se ta kfafan Jou ni méitén po mew ni né nase reni ngale esó pa.

Timotiusé nut kyat Tesalonika né riri Habar Ta Fié

6-7 Faftén re farémóné ta mewé, Timotius néléy lima nte, taga nuté nimi Habar Ta Fié: Mewé re fdélé Jou fié, nimi masié ma pélóy po Jou Lahatala ni, re ffamasié isó re isó. Taga mewé ma flolém amé, ta dolo amé ma klolémé mewé bo tfakduké nmulé. Ta néfétno amé né, klongé né kséngé. Nte kyaté né rfanpuné amé re kduk kangelang félé nóté. Mayta masike kduk ta né ma, klongé ta fdélé Jou fié né, wlomam ta kangelangé né delo kbósém tuw pa. Mewé ta ffakuaté wlomamé. 8 Wlomamé dolo mót pana, mayta ta délé kséngé, sababta mewé fdélé Jou né, fesuwe mew pa. 9 Béréga Jou sogado mewé fdélé I fié. Necé ta mulo séngséngé bóto am po Jou Lahatala usno lo, se kéceg syukur ta délé pélóy po I ni. 10 Se dorém re ngénngané kéror po I ni bo am re mewé tfapdipéné nóté. Kéror ta né fatuw-fatuw yama tutemamé lo. Ta bo kwómo mewé nte, amé bo kfaftulo mew ta mewé dolo funé pafule bo fbóngé fdéréré Jou né.

11 Amé kéror po rir Papa Jou Lahatala, re Jou Yesus ni, bo nówsé keé farimé ta bo nfaket amé né, bo amé kwómo mewé nóté. 12 Kéror po I ni bo nbóngé wlomi ta ffamasié isó re isó re farimé kyaté, ta dolo amé kmasié mewé né. 13 Amé kéror ta dolo fajé né, bo Jou nfakuaté wlomi bo fdéréré I fié, bo pote se néli dunia njé nkiamaté, mewé fégbono rir Papa Jou Lahatala né, renómi sélsól gélesó pa, sababta wlomi né re fpo keé néli po Jou ni ndimé se beresi. Ngénngan ta Jou Yesusé nwómé né, nfauto farimé kyat ta fatuwé I ni kyat si.