Rir tétut re géwgéwété né mare Jou néngóto né wlo ncuka
4
1-2 Faftén re farémóné ta mew, ta farimé ité tdélé Jou. Masike re kéfétno mew ta né i, mayta nte bo kfaftóto mew ta nésé nóté. Ta am pocé né, re kfasodoto mew félé, bo nimi tétut re géwgéwété né Jou Lahatala néngóto ma wlo ncuka ndimé. Necé mewé re fdéréré fié, mayta nte amé kané re kfatélolmo mewé nmulé, bo mewé ta délé fbóngé fdéréré. Necé amé le pa ta kfaftóto mewé, mayta Jou Yesusé ta nané mewé. Sababta dodoto ta amé kut re Jou Yesus ngósno né, mewé ma re funé ndimé.3 Ta Jou Lahatala ni mau né ta nte: Mewé wlomi né fpo keé néli Jou ni bo beresi ndimé. Félówé keé farimé ta lé né. Mépin isó ni légaé be faisó, món isó ni mépin be faisó. Ta nimi mépin i pa pari món i pa, mati wlomi ntelen i na. 4 Isó-isó fpe nimi diri né fafié, bo Jou nuné ta I ni kyaté mewé, re kyaté né réngóto né ma fié. 5 Mati nimi nafsu pélóy na, sogado nimi diri né mati ndadi dolo kyat ta rfayal Jou pafule né na. 6 Tagare ndél pa bo fdéréré be nimi nafsu né ta ni wóré nópé nimi dél ta ffafayal fié ma wlomi néfeno, se fpe ta lé po si ni. Kyat ta rpe sélsól ta né, Jou Lahatala nase nfasól si. Necé amé re kécego mewé, se ndél pa bo fpe fajé. 7 Jou Lahatala nkakém ité né bo tdadi I ni kyat ité se bo tpe ta lé pa mayta tpe be ta I mgo wlo né. 8 Se ta kécego mewé né iga fdéréré pa, né, ffapida mew po ya ni le pa, mayta re ffapida mewé po Jou Lahatala ta npo ni Rohé njé po mew ni.
9 Nte bo ffamasié né, kéceg pa ma, gélesó pa, sababta mewé re ffamasié isó re isó. Ta mulo fpe fié né, necé yama Jou Lahatala ni. 10 Mewé ma re ffamasié néli re lima po farimé kyat ta rdéréré Jou po bótén Makedonia né. Mayta masike fajé ma, amé kéror po faftén re farémóné ta mewi, bo fbóng ta fpe nimi masié po kyaté né. 11-12 Féyaté mew fatuw-fatuwé bo ffatut fafié. Ta riri gétgité né mati ffafafto mew na. Fpe yabé bo fduké nimi hidupé. Necé amé ma re kécego mewé. Fpe ta dolo fajé bo mati fngongano kyat na, fajé nóté, bo kyat ta rdélé Jou pa né ma rémnaw ta mewé fpe né fié.
Mati fémtat na. Jou Yesusé nwómé nmulé né, bo nyó it farimé ta tdélé I né
13 Faftén re farémóné ta mewé, farimé it ta tdélé Jou Yesus. Kyat ta rdélé Jou Yesus pa né, iga riri dél si rmóté, wlori né kangelang, sababta re riri ngongano esó pa po soroga. Mati wlomi nkangelang dolo si na. Se ta mulo, bo kfabingo mewé ta Jou nécegé né bo funé, sói ta bo ndadi i po kyat ta re rmóté né. 14 Ta Jou Yesusé nmóté né, ité re tuné Jou Lahatala re nfapangén I. Fajé nóté re kyat ta rdélé Jou Yesusé né ga rmóté, né ma tuné ta I nase nfapangén si nmulé bo si re Jou Yesus sogado fajé néli le. 15 Jou ma nécegé: Pote se néli, nwómé nmulé né, it ta tmót pafule re ta re rmóté né, nase farimé ité tfatduké nóté. Se mati fémtat na. Rir dél ta re rmóté né nase rpangéné nmulé. Ité tfatopo keé si pa. 16 Nase reni gégliné isó ta npélóy yama soroga, re Jou ni nénan isó ta npélóy po soroga lo nméitén, re Jou Lahatala ni terompete gli, tabóngo Jou Yesusé ntebé yama soroga. Pocé kyat ta rdélé Jou Yesus Kristus ta re rmóté né rpangén néya nmulé. 17 Rewóré ga, it ta tmót pafule né, Jou Lahatala nase nfalyóle it néli lima, tagare nélóngé it re si néya tdéréré mété. Pocé ga taga tfatduk re Jou po ngawa-ngawa lo, bo I re ité sogado fajé nénéli le. 18 Se kécego mewé, ma fénuta be kyat ta rmóté né na. Si bo rpangéné nmulé. Ffabengbingo mew isó re isó ta kécego mewé né, bo wlomi mati kangelang nóté na.