2 Tesalonika
Surat ta kedua ta Paulusé
nfanaté po jemaat Tesalonika
1
Mam délut, faftén re farémóné ta mewé, mew ta fdélé Jou Yesus po pnuw Tesalonika. It farimé rir Papa Jou Lahatala I re Jou Yesus Kristus ni kyat ité. Ya Paulus, Silwanus re Timotiusé kfanaté mam suraté nje po mew ni.Féyfié lima rir Papa Jou Lahatala re Jou Yesus Kristus ni, ntébtubo re ndéréré mewé se wlomi né ménóné i le.
Paulus ecé riri syukur po Jou ni
2-3 Mam délut, faftén re farémóné ta mewé, farimé ité nte tdélé Jou. Kenfatélolmo mewé, amé kékéceg syukur ta pélóy po Jou Lahatala ni. Amé mare kéceg syukur ta né, bo tisé, dolo métegél pa. Sabab ta mewé fdélé Jou Yesusé né, ta délé nbóng ta nbóng i. Mewé ma ta délé re famasié isó re isó. 4 Né ta mulo amé ktail mew po farimé Jou Lahatala ni jemaate né. Amé kséngé kécego si ta mewé fdélé Jou Yesusé né fatuw-fatuwé, re tebtebnomi pana. Kyaté rfanpuné mewé re rfakcegé mewé sababta fdélé Jou Yesusé, re fduk kangelang félé nóté, mayta masike fajé ma, mewé ftébné pa fdélé Jou Yesusé le.
5 Tlongé ta necé i, bóngo tuné fatuw-fatuw, ta Jou Lahatala npe po it ni né, métegélé ndimé. Mewé re fdélé Jou Lahatala se ndadi nimi kolano I. I mdio be ta néi, ta mulo kyat félé riri lé mewé se mewé re fduk kangelang félé. Mayta, nimi kangelangé né ndadi i bo mewé férakén be I le, bo pote se néli I ma nase néténé mewé fatuw-fatuw ta fdadi I ni kyaté mewé. 6 Fatuwé, Jou Lahatala nmétegélé, se kyat ta rfakangelangé mewé né I nase nfasemulo si riri ta lé né. 7 Mew ta fkangelangé né ma nase nésólé keé nimi kangelangé né, se nfasemulo mew ta ménóné re ta fié, fajé nóté re amé. Necé nase ndadi i po ngénngan ta I ntebo Jou Yesus yama soroga lo, ta nfauto ni nénan ta riri kawasa pélóyé né re ni lutén ta nénléblobe njé. 8 Pocé kyat ta rfayal Jou Lahatala pa né, nfapóo si róri sélsól ta météwé, si re farimé kyat ta lenglongori pa po Habar Fio ta Jou Yesusé bo nfasalamat ité. 9 Kyat ta né nase Jou nfasólo si sogado fajé néli le. Nwóté keé si lówé se nélówé keé si, sogado rémnaw pa I ni manano re kawasa ta pélóyé né. 10 Ngénngan ta néi, ngénngan ta Jou Yesusé nwómé nmulé, bo I ni kyat ta rdélé I né nase réntail re rénfapélóy I. Remétné I ni féyfié né po farimé kyat ta rdélé I né. Mewé ma nase mew pocé sababta mewé fdélé ta amé kéfétén I po mew ni né.
11 Necé ta mulo, kméiténé kdé Jou né, kékéror nimi ta fié. Jou ta nkakémé mewé se fdadi ni kyaté mewé, se kéroré bo N-gali mewé fpe ta I wlo ncuka. Po wlomi wlólo félé ta bo fpe ta fié, se kéroré, I ni kawasa né nfatemam farimé ta bo fpe né. Fajé nóté wlomi bo fdélé Jou ta fatuwé, se kéror po I ni, ni kawasa né n-gali mewé bo fpe né fafié ndimé. 12 Ta mulo kéroro Jou ta né, bo kyaté né rémnaw ta mewé fpe né, rfayal Jou ni kawasa ta ndadi i po mew ni, bóngo kyaté né ma rtail re fapélóy Jou Yesusé. Mewé ma Jou nase ntaile mewé nóté sababta mewé I ni kyaté mewé. Farimé ta néi, it pa ta tpe, mayta Jou ni féyfié sogado ndadi i.