1 Timotius
Surat ta faiwóbno ta Paulusé
nfanaté po Timotius
1
1-2 Suraté nje lima Paulus ni, i Kristus Yesus ni nénan i se nénut I ngósno. Ta nané i né, Jou Lahatala ta nfasalamaté kyaté né, I re Jou Yesus Kristus, Jou ta tpeé rir ngongano I njé. Suraté njé i glio né ta nte:Timotiusé, kyó aw dolo antig tuo awé, lenglongom fié po Jou ni se. Féyfié re masié lima rir Papa Jou Lahatala re Jou Yesus Kristus ni, ntébtubo awé se wlemé njé nménóné i le.
Kyat po Efesusé rfasodoto kyaté né dodoto ta sólé
3-4 Nuéncó ta kfan po bótén Makedonia né, né re kécego awé, nte ma bo kécego awé nóté, Mtolén pocé po pnuw Efesusé ro, ma mluwé aw su na. Sababta po Efesusé né reni légaé séfis néli ta rfafan Jou ni dodoto, mayta rfabóngo re riri dodoto ta sólé. Si ma réfétén be riri memumen ta reni ngale pa, re remétné be riri wes re félbawé né. Kané awé mtolén pocé ro bo mané si ma rpe ta dolo né nóté na. Sababta, bo kyaté né rlongé dodoto ta né, nase rfakotalé le bóngo ta Jou npe bo nfasalamat si né nase runé pa. 5 Ta mulo bo mané si rtébné né, bo rfamasié isó re isó. Sababta bo fatuw ta tfamasié, mare ncópén po wlor ta beresi, ta tpe né ma mare ndé po wlor ta métegél po Jou ni, re ité ma mare tdéréré Jou né ta fatuw-fatuwé. 6 Kyat ta rut dodoto ta sólé né runé pana masié ta dolo fajé né, sababta réréfétén be ta reni ngale gélesó esó pa. 7 Si wlori ncuka bo rfasodoto kyat re hukum Taurat ta Musa nlefo né. Momongo ta réceg néya né runé ni ngale pa. Réfétén ta délé ndé yama wlori lo bo kyaté né rpe ta dolo né, momongo runé pa Jou ni tujuan sogado npe hukum Tauraté njé.
8 Hukum Tauraté njé fié, asal ta tcae ni ngale bo tpe né ta ndéréré Jou wlo. 9 Ité mare tuné, ta mulo sogado Jou npo hukum Tauraté njé, néyówé kyat ta rmétegélé né pa, mayta néyówé kyat ta dolo faje: kyat léo ta rémtat hukum pa né, kyat ta re lenglongori pa, kyat ta rémtat Jou pa, kyat ta róri sélsólé né félé, kyat ta rdéréré be dunia njé, kyat ta rkafiré lesu, kyat ta rpuné keé riri papa re mama, re kyat ta rpuné keé kyat nésé. 10-11 Fajé nóté, néyówé kyat ta ryó sólé re ta rfayéul néli re lima, kyat ta rfagégóé kyaté se rwagé keé si, kyat ta rmalólé, re kyat ta rmasasi mayta rlól bóto. Farimé kyat ta rpe ta né, hukum Tauraté njé néyówé si ndimé, sogado kyat pai le ta ndéréré pa Jou ni dodoto né, i ma hukumé njé néyówé i. Jou ni dodoto ta njé Habar ta Fié i mdio ta Yesus nwóm yama Jou Lahatala ni. Dodoto ta njé nmétegélé ndimé. Ya kfafan dodoto ta njé, Jou Lahatala ta nané ya. Jou ta njé ta mare kyat farimé né ttail I.
Jou ni féyfié né po Paulus ni
12-14 Tatubé ta kdélé Jou Yesus pafule, ya kfakcegé I, kfakangelangé ni kyaté né, sogado kpuné keé ni kyat iglé. Mayta masike kpe ta lé ta né i ma I nmasié ya le, sababta I nuné ta ya kpe né kfayal I pafule se kuné nik gélesó pa. Pocé bóngo npo ni féyfié né pélóy po ya ni sogado nfasalamat ya, ta mulo nte Ya ma kdélé I re kmasié kyat ta dolo I re npe po ya ni né. Ya kécegé nik syukur félé po ité rir Jou Yesus Kristus ni, sababta, ta ya kpe ta lé lesu né, I némnawé wlegé njé nuné ta I ga nané ya né, nase kpe. Necé ta mulo nkakém ya bo kfafané ni yabé né. I ma nfakuaté wlegé njé sogado kefené kpe.
15 Meiten ta nte fatuwé, aw re nim délé né mare fdélé ndimé méiténé njé, i glio né faje: Kristus Yesusé nwóm yama soroga bo nfasalamaté keé kyat ta re róri sélsól. Farimé kyat ta re róri sélsólé né, ya nak sélsólé né ta délé pélóyé. 16 Ta mulo né, Jou nfaftulo ni masié né po ya ni se nfamót ya pa mayta néftón sogado kngali ya se kdéréré I. Nfaftulo ni sabar ta né po ya ni ta nak sélsólé né pélóy po farimé kyaté. Pocé nase kyaté né runé ta si ma, masike róri sélsólé né félé, mayta bo rdélé I ta dolo ya kpe né, nase si ma nfayangésé keé róri sélsólé né se si re Jou sogado fajé nénéli le. 17 Se nte it farimé mare ttail Jou Lahatala, téceg faje, “Jou Lahatala, Awé ro ta mdadi mam kolano sogado fajé nénéli le. Awé Jou ta kémnaw Aw pa. Po sói lo le, Awé, Aw pocé. Reni Jou ta nésé pa. Amé ksuba re ktail Aw fajé ro sogado fajé néli le. Amin.”
18 Timotiusé, antig ta awé. Kécego awé nte. Tatubé lima lesu, Jou bo npake awé se ni nénané né rfawómo awé ta awé nase bo mpe. Mfatélolmo aw méitén ta né, bo ta délé mfakecile awé mfafan Jou ni yabé né. Mdélé Jou ta fatuw-fatuwé, ma mesuwe aw na. Métóf ta lé, ga mdéréré be ta fié re wlem ta beresi. 19 Sababta reni kyat séfis néli ta rétófé keé ta fié né se ryó riri ta lé né, wlori né re kékóné, sogado rdélé Jou né fatuw pana. 20 Po si ni reni kyat séluwé, Himeneus i re Aleksanderé. Setané ni kolano njé re nkawasa si se fajé si óro, néli-néli nase rfayalé riri dodoto ta lé né se rfakcegé Jou Lahatala pa na.