Fméitén fdé Jou né, ffatélolmo amé
3
Mam délut, faftén, re farémóné ta mewé, farimé it ta tdélé Jou. Bo kfaftóto mew ta nete nóté. Fméiténé fdé Jou né, féroré bo Jou n-gali amé kfafané ni dodoto né, bo famla kyaté né rlongé néli re lima, bóngo re rdélé se rfapélóy Jou, ta dolo mewé re fpe né. 2 Bóngo féroré bo Jou nélówé keé kyat léo ta bo rfawetésé keé mam yabé né, sababta farimé kyat pa ta rdélé rir Jou Yesusé ni méiténé né.3 Momongo, rir Jou nfatuwo ndimé ta I néjaji né. Se I ma nase nfakuaté mew wlomi né sogado fdélé I né re tebtebnomi pana. Setané riri kolano njé bo nfalélólé mewé ma nase néfené mew pa. 4 Jou ta nfaménawé mewé se amé kuné ta fatuwé mewé re fdélé ta kfasodoto mewé né re mewé ma nase fbóng ta fpe. 5 Amé kéror po Jou Yesus ni, bo mewé ta délé fbóng ta funé re fsaé Jou Lahatala ni masié po mew ni né. Kéroré Jou nfakuaté wlomi bo fdélé I né re tebtebnomi pa, ta dolo Jou Yesusé ma ndélé Jou Lahatala le. Masike kyaté rfanpuné I re rfatitfo I ma, I ndélé Jou Lahatala né re tébtébno pa.
Farimé kyat ta rdélé Jou mare rpe yabé
6 Mam délut, faftén re farémóné ta mewé, farimé it ta tdélé Jou. Kécego mew re Jou Yesus ngósno: Kyat ta rdélé Jou Yesusé ga rpe yabé pa se rngongano be kyaté, ma férakén si na. Necé si rdéréré pa ta amé kfasodoto né. 7 Mewé re funé ta mewé mare ftalko amé. Amé kenbusu pa, ta amé ktolno mewé né. 8 Iga ta róri mnómé ga kpolés pa, kó pa. Masike amé kfafan Jou ni méiténé ma, amé kpe mam yabé nésé nóté. Kewakse amé né dorém re ngénngan se kduk pipis, bo mati kfamétéwé mew na. 9 Mayta, iga bo kané mewé fgali amé mnómé, né ma sól pa, sababta kyat ta rfafan Jou ni méitén ta dolo amé nte, Jou nané kyaté né rgali si mnómé. Masike fajé ma, amé kéror pa. Amé kpe be mam yabé bo mewé ftalko amé bo mati fbusu na. 10 Ta am po mew ni né, amé re kané mew nuén fis néli: “Pai le, i ga nbusu se npe yabé pa, mati fdo i mnóm na.” Fajé bo kyaté njé n-ngali i se npe yabé.
11 Sogado kéceg fajé né, klongé pocé mew ni reni kyat iglé ta rbusu, wlori ncuka rémomso si be ta riri gétgité, re rérénpe yabé gélesó pa. 12 Re Jou Yesus ngósno, amé kané kyaté nesté re kfatélolmo si nmulé bo rtébné keé riri ta sólé né bo rpe yabé ro, bo réyówé róri mnóm re riri pipisé.
13 Faftén re farémóné ta mewé, farimé it ta tdélé Jou. Fpe be ta fié le, mati rémgaomi na. 14 Ffawómo ta amé kané po suraté wlólo nte rewóré ga, kyat pai le, i ga lenglongo pa, ffabingo kyat ta po jemaate wlólo né bo mati ffambóngo mew re i su na, necé nase nmóé i se n-ngali i. 15 Mayta ndél pa ta bo nimi lé i. Ffatélolmo i bo ndéréré suraté nje, fécego i né fafié, fmasié i dolo fténom i.
16 Jou ta nfaféyfié wloré né se ménóné. Se nte kéroro I bo nfaféyfié mewé, bo masike sói le ta bo nfarwae wlomi ma, wlomi né ménóné le. Jou ntébtubo re ndéréré mewé.
17 Nte, ya Paulusé, kfanaté nik salam po mew ni. Ya ro ta klefo nte, ya faog óro, ta dolo kakenlefo po farimé nik suraté lo né. Se funé óro suraté nje i lima ya ni.
18 Jou Yesus Kristusé nfaftulo ni féyfié né po mew ni farimé.