Jou Yesusé nwóm pafule mayta ni fayalé re ntubé
2
Mam délut, faftén, re farémóné ta mewé, farimé it ta tdélé Jou. Ité tuné ta dunia nje bo nkiamaté né, Jou Yesus Kristusé bo nfajólo ni kyat ité, bo it po I ni sogado fajé néli le. 2-3 Mayta taga nte, mewé flongé ta récegé cogo Jou Yesusé re nwómé ro. Kécego mewé, mati fdélé na, mati wlomi nfatutén na, sababta Jou Yesusé nwóm pafule. Masike kyat ta récegé cogo Jou ni Rohé njé ta nécegé, pari amé kéceg, pari amé ta klefo, né ma mati fdélé si na, rfalélólé mewé le. Sababta, Jou Yesusé nwóm pafule, Jou Lahatala re nfatubé ni fafayal abén luwé. Fafayalé né esó ta nete: Kyaté né ta délé félé nase re lenglongori pa po Jou Lahatala ni se rngamo. Fafayal ta esó né ga, kyat isó ta délé kyat léo i nase nfaftulo ni diri. Kyat ta njéi, ta dunia nkiamaté né, fatuw-fatuwé Jou nase npawélé keé i po naraka lo. 4 Kyaté njé, i ni lé ta lé Jou Lahatala, re pai le ta kyaté né rfapélóy si né, ni lé si ndimé. I nfapélóy be ni diri, nécegé cogo i ro ta nkawasa, se nase ncung némin Jou Lahatala ni Um Sambayang ta npélóyé njé ni, ga ntolén nópé se néceg faje, “Ffapélóy be ya, ya nte Jou Lahatala”.5 Kécego mewé, mati fdélé i na. Bo funé ta bo ndadi i né, Ya re kécego mewé, ta ya re mew pocé né. Ffatélolmo mew pa? 6 Kyat Leo njé, nte témnaw i pafule. Sababta ni waktu nwómo i pafule. Reni ta nfaket i lesu, necé mewé ma re funé. 7 Mayta masike ta témnaw i pafule ma, i ni kawasa léo né re npe yabé ntubé, se kyat félé re rlongé Jou pana. Pote se néli, Jou Lahatala nase nésólé keé ta nfaket Kyat Leo njé né. 8 Pocé ga taga farimé kyaté nase rémnaw i. Mayta Jou Yesusé nwóm re ni manano njé, tabóngo Kyat Leo njé reni kawasa pana. Yesusé nméiténé le tabóngo Kyat Leo njé nmót i.
9-10 Ta Kyat Leo njé nwómé né, nase nfaftulo ni kawasa ta pélóyé, npe urémé né nae ta usé, kyat isó ta néfen i pa. Kyaté né rémnaw ta i npe né, bóngo récegé, “Tabeu, nó urémé né ndé i fié! Hale Jou Lahatala ni kawasa!” Bóngo félé ta rdélé i. Momongo runé pa, necé setané riri kolano njé ni kawasa. Kyat ta rdélé i né, Jou nase bo nfamóté keé si falówé. Kyat ta né, ta Kyat Leo njé tiso i lesu ma, si re rlongé pana, Jou ni méitén ta fatuw lima Jou ni, 11 se Jou Lahatala nfakéyówéne keé wlori né, bóngo rdélé keé ta sólé né. 12 Ni wóré nópé, Jou Lahatala nase nfasólé keé farimé kyat ta rdélé pa, dodoto ta fatuw lima Jou ni né. Kyat ta né ta wlori ncuka rpe be ta lé.
Fdélé Jou fatuw-fatuwé, mati ma fentébné na
13 Faftén re farémóné ta Jou nmasié mewé. Kenfatélolmo mewé, amé kékéceg syukur ta pélóy po Jou Lahatala ni, sababta Jou Lahatala ntulada dunia nje pafule, I re nfaréné rewóré ta mewé bo fduk salamaté. Mewé re fdélé Jou ni méitén, re Jou ni Rohé njé ma re nfadadi mew Jou ni kyat ta fatuwé I ni mewé. Se mewé nase bo fduk salamat. Bo kéceg syukur pa po Jou ni, nase métegél pa. 14 Amé ma kéceg syukur sababta, ndé lima Habar Fio ta kuto mewé né, Jou Lahatala nkakémé mewé bo fdadi I ni kyaté mewé bo fduk salamaté. I re nélóngé Jou Yesusé bo kyaté né rémnaw i né fié, se mewé ma nase nélóngé mewé bo fduk ta dolo né. 15 Se faftén re farémóné ta mewé, kécego mewé, ffakuaté wlomi bo fdélé Jou né ta fatuw-fatuwé, ma fesuwe mew na. Fisno po wlomi lo fafié Jou ni dodoto ta tfatébono se kfawómo mewé né, re ta kfawómo mew po mam surat ta kfanaté néli né. Mati feé na.
16-17 Rir Papa Jou Lahatala ni féyfié né pélóy po it ni: I re nmasié ité se npo Ntu njé po it ni. Néjaji ité bo tduk salamaté, bóngo npe sogado ité tuné ta fatuw-fatuw nase tduké. I ma n-gali ité né re tébtébno pa bo tdéréré be I wlo. Necé ta mulo nte amé kéror po I ni re po Jou Yesusé ni, bo n-gali mewé bo wlomi né néli I ni le. I ma bo nfakuaté wlomi bo mewé fpe re féceg be ta fié.