Paulusé nfaftulo kyaté bo rfapélóy Jou ngósno
2
Se ta faiwóbno fafié, ya kéror po mew ni, fméiténé fdé Jou, fut farimé kyaté wlori po I ni, féror re felal bo npo ni féyfié po farimé kyaté, re ftail Ngósno né pua ta I re npe ta fié po mew ni. 2 Ta féroré né, bóngo fut kolano né wlori po Jou ni nóté, si re farimé kyat ta rkuasa ité né, bo riri bala re kawasa ité nte ma, nase rut it fié, se ité ma tfaténgóto fié, gélesó esó pa ta nfarwai ité, se bo tpe ta mgo re Jou wlo né, ma ndadi i, re wloré né ma métegél po kyat ni. 3 Fdéréré ta né, necé fié, Jou Lahatala ta nfasalamat ité njé nase ncéngé. 4 I wlo déréro bo farimé kyat ité tduk ni salamaté njé re tuné ni dodoto ta métegélé né. 5 Sababta Jou Lahatala né Isó le. Fajé nóté, reni Isó le ta nfayfio it po Jou Lahatala ni, Njé Kristus Yesusé. 6 I ndadi kyat i, se npo fié ni diri nmóté npe yéfén bo farimé kyaté rór sélsólé né nfayangésé keé. Jou Lahatala npe ta né po ngénngan ta I re nfaréné, bo nfaftulo kyaté né ta I wlo déréro bo kyat farimé né rduk salamaté. 7 Habar ta fié ta necé i, ta Jou Lahatala néftul ya se kfafan po pnuwé-pnuw ta lówé, kfafan Ngósno po kyat ta Yahudi si pa, bo sié ma rdélé I ta fatuwé. Ta kécegé nte ta délé fatuwé.8 Ya kéror po farimé món po géwgów sói lo le: fméiténé fdé Jou. Bo fméiténé fdé Jou né, félóngé faomi ta beresi néya Jou ni, ffawsawno na re ma ffaisno kyaté wloné na.
9 Fajé nóté, mépin-mépiné né, bo réngalén si, ma réyówé bo kyaté rtail si na, mayta réngalén si ta métegél, ta Jou néngóto né pantas. Mécego si bo rfanyónme riri uté né na, re mati refreo si guraci pari mutiara pari kabaya ta mulo pélóyé né na. 10 Riri fié né mati ndé po riri fre lo né na, mayta mare ndé po riri féyfié ta pélóy po kyaté, nece ta Jou nécegé né pantas bo mépin ta rdélé I fié né rpe.
11 Iga kyaté rfasodoto Jou ni méiténé, mépin-mépiné né mare rfaméylongé le, re rdéréré sói ta récegé né. 12 Ya kpo fié pa bo mépiné né rfasodoto pari rkuasa móné. Si mare rfaténténgén si, bo rfaméylongé le. 13 Ta mulo kané fajé né, sababta tatubé lima lesu Jou Lahatala ntulada Adamé ntubé, rewóré ga Hawa. 14 Taga Adam pa ta nlongé guwé njé ni malólé né. Mayta mépiné njé ta ndélé i sogado npe sélsól po Jou ni. 15 Selsól ta né ta mulo mépin si rfantuné né rkangelangé, mayta si ma nase rduk salamaté, asal ta rtébné na rdélé Jou, re riri masié, re wlori né rpo keé néli Jou ni se beresi. Rpe ta né, ma rfaséngé si po kyat pa.