2 Timotius
Surat ta kedua ta Paulusé
nfanaté po Timotius
1
1-2 Suraté nje i lima Paulus ni, Jou Lahatala ni nénan ta nut Kristus Yesus ngósno. Jou ta npo i yabé nfabingo kyaté Jou ni jaji po si ni né, bo rdéréré Kristus Yesusé né, nase si re I sogado fajé néli le. Suraté njé i glio né ta nte: Timotiusé, wyói ta kmasié awé. Masie re féyfié né lima rir papa Jou Lahatala re rir Jou Yesus Kristus ni ndéréré re ntébtubo awé se masike sói le ta nfamétéwé awé ma wlemé njé nménóné i le.Paulusé nfakuat Timotiusé wlo bo nbóng ta fatuw-fatuwé ndéréré Jou Yesusé
3 Ya kéceg syukur ta pélóy po Jou Lahatala ni. Dorém re ngénngan, kfatélolmo awé se kfatesóngle ngósnom po I ni. I ro ta ya kdéréré, kpe ni yabé re wleg ta nberesi, ta dolo nik gélé re gaé né rdéréré I né. 4 Make, ya klolém awé. Kfatélolmo ta iti dórén luwé tfaeé se nim yowéné ma ncelé né. Se nte ta délé kéyówé bo tfapdipéné nmulé. Bo sogado tfapdipéné, nase ta délé kséngé. 5 Kfatélolmo ya ta awé fatuw-fatuwé mdéréré Jou. Tatubé lima lesu, anim gele Lois, i re nim mama Eunike re rdéréré I, re awé ma kuné awé mdéréré Jou fié. 6 Ta mulo kfatélolmo awé nte. Ngané fis ta kétéwlé faoge né néya aw ni, se kuté nim doa né, Jou re npo aw karunia esó, ta nfakuat awé mfafané ni yabé né. Se kécego awé, ma wlemé mya na, mayta mfafan karunia njé bo ta délé mpe Jou ni yabé. 7 Sababta Jou npo ni Rohé njé ntolén po it ni né, roh ta nfatat it pa. Mayta Rohé njé n-gali nfakuaté wloré bo tfafané ni yabé né, n-gali ité se tmasié kyaté, re n-gali ité tkuasa wloré né bo tétóf ta lé se tpe be ta Jou néngóto né fié.
8 Se nece ta mulo kécego awé, ta awé mdéréré Jou Yesusé né, méfétén po kyat kawasa né, ma mémtat re móé aw na. Nte sogado rfasung ya bui né, I mdio be kdéréré Jou Yesus, mayta awé ma mmóo ya na. Mfafané le Jou Yesus ni Habar ta Fié, masike mduk kangelang dolo ya. Jou Lahatala nase npo it kawasa sogado téfené. 9 Jou Lahatala ta nfasalamat ité, se nkakém ité bo tdadi I ni kyat ta fatuwé. Ta mulo nfasalamat ité né, i mdio né ité rir féyfié né pa. Mayta i mdio Jou ni féyfié ta pélóy po it ni. Né, faiwóbno Jou ntulada dunia njé pafule, I re nmasié ité se re npe po wlo wlólo bo nané Yesus Kristus ntebé yama nfasalamat ité. 10 Ni féyfié ta njé nte re nfaftulo ité, né I re ntebo rir kolano Jou Kristus Yesus, ta nfasalamat ité njé. Kristus Yesusé ni kawasa né ta nfayangés sélsól ta bo nfamót ité né sogado fajé néli le, se nfaftulo it yéféné bo it re Jou sogado fajé néli le. Ta nfaftulo ité né, necé Habar ta Fié. 11 Jou nélóngé ya kdadi ni nénan ya ta kenut I ngósno, bo kfawómo re kfasodoto Habar ta Fié né. 12 Kfafan Habar ta Fié nte, ta mulo ga kduk kangelang. Mayta masike ya i po bui wlólo, ya kmóé ya pa. Sababta ya kuné fié Jou Yesus Kristus ta ya kdélé I njé, se ya ma kuné fié ta I nase nfaménawé nik yabé ta re npo ya né, sogado dunia njé nkiamaté, se I nwómé nmulé.
13 Dodoto ta mlongé po ya ni né, necé dodoto ta métegélé. Se mfaisno fafié bo ndadi anim dodoto nóté. Mfafan né, mdélé Kristus fatuw-fatuw re mfaftulo Jou ni masié né po farimé kyaté. 14 Dodoto ta Jou Lahatala npo ité né fié ndimé. Se mfaménawé fafié, bo mati isó niwén na. Jou ni Roh ta ntolno ité né nase n-gali ité se tfaménawé dodoto njé fié.
15 Awé re muné, farimé rir dél po bótén Asia né re rfatopo keé ya. Figeluse i re Hermogenese ma rdé ya pana. 16-17 Onesiforuse ga, sen i, masike ya i po bui wlólo ma, nmóé i pa. I nwóm lima po pnuw Roma se nfaléyówé ya né re téptébno pa sogado ga nduk ya. Étné be nwómé, npo ya méitén ta fié sogado nfakuaté wlegé njé. Se kéror po Jou ni, bo nmasié i, i re ni dél po ni umé wlólo né ndimé. 18 Awé ma muné fié ta féléo ta i re n-gali ya po pnuw Efesusé né. Se kéror po Jou ni, bo néli-néli dunia njé re nkiamaté se Jou nwómé nmulé, Onesiforuse nase nduk ta fié po ngénngan ta njéi.