Bo tdéréré Jou Yesusé né, tdéréré fafié, ma wloré né nfatutén na
2
Antig ta awé, mdéréré Jou né, mfakuat awé re Jou ni féyfié ta re pélóy po aw ni né. 2 Dodoto ta re mlongé ya kfawómo aw po kyat kawasa usnori lo né, kané awé mfasodoto kyat faséfis néli, bo si ma rut po kyaté nóté. Kyat ta mfasodoto si né, mare kyat ta méngóto si né nase mngongano si, re runé rfasodoto fié.3 Masike kyaté rfakangelang aw ta dolo rfakangelang ya nte, ma mee Jou na. Adeade tentara faisó ni yabé né nfaperange, npo fié ni diri bo nduk kangelangé, nase neé ni yabé né pa. Ité ma tdéréré Jou né, tpo rir diri sogado tkangelangé, ma tee Jou na. 4 Adeade, bo tentara faisó nfafané ni yabé tentara né lesu, i nase nfasénangbe ni kepala njé wlo. Iga reni yabé nésé néli ta tentara né riri yabé pa, né npe pa, nlongé be ni kepala njé se. (It ta tpe Jou Yesusé ni yabé né ma, mare tlongé be Jou). 5 Fajé nóté re kyat ta rfabésé né, bo rduk hadia né, mare rdéréré ni fénfané né ndimé. (Ité ma bo tduk Jou ni hadia né, mare tdéréré farimé ta Jou nané ité né.) 6 Adeade esó nóté, kyat ta npe bété ga npe yabé ta délé npe yabé, bo sogado nó téntónémé né re nwómo i góo, i ta mare nduké ntubé nó téné. (It ma mare tpe Jou ni yabé né fatuw-fatuwé, pote se néli, Jou nase npo it ténténé ntubé.) 7 Méménuta ta kécego awé né, Jou nase n-gali awé bo msaé ndimé.
8 Timotiusé, mfatélolmo aw Jou Yesus Kristus. I nmóté, mayta Jou Lahatala nfapangén I nmulé. I ro ta kolano Daudé ntu re gbu i, ta Jou Lahatala néjaji tatubé bo nfasalamat ité. Habar ta Fié ta né ta kakenfawómo kyaté. 9 Kfawómo ta né, ta mulo kyaté né rfakangelang re rfakiko ya rante nte. Kyat ta né riri lé Jou Yesusé, se rpe ya dolo kyat léo ya. Mayta masike rpitén ya, Jou ni méiténé né rtébné pa, kyaté rfafané se rfafané le. 10 Se masike rfakangelang ya sói le ma, kfatentengen ya le. Ktébné pa kfawóm Jou ni Habar ta Fié né bo kyat ta Jou npili si né ma rduk salamaté. Fajé bo I re si po ni géwgów ta fié lo né sogado fajé néli le.
11 Meiten ésó ta délé fatuwé, ni glio né faje:
Iga tdéréré Jou sogado ité ma tmóté,
nase tpangéné nmulé
se it re Jou sogado fajé nénéli le.
12 Bo tduk kangelang sói néli ga tesuwe it pa,
pote se néli Jou ntolné ni kawasa né,
ité ma ttoléné tdé I.
Iga tmóé ité se técegé tfayal Jou pa,
I ma nase néceg ta ni kyat it pa.
13 Masike tdéréré Jou né métegél pa,
mayta Jou ndéréré ité né métegél,
sababta I néneniwén I wlo njé pa,
sói ta néjaji né npe ndimé.
Jou ni kyat ité né mare tpe it fafié
14 Ta kécego awé nte, mfawómo nim jemaate né re mfatélolmo si fafié po Jou usno lo, bo ndél pa rfakotalé méiténé né. Sababta, iga tfakotale, méitén ta né nase reni ngale facuci le ma tisé po it ni. Taga kyat ta rfaméylongé né, bo rdéréré méitén ta sólé, bóngo nut si po ta lé lo. 15 Awé ga, meyat aw fafié, bo Jou némnaw awé né ncéngé. Mpe ni yabé né fafié, re ma mmóé aw na. Jou ni dodoto né métegélé se mfasodoto fafié, ndél pa bo mpalte re miwéne. 16 Mayta, kyat ta réfétén méitén ta mgo Jou wlo pa, mati mbóng si na. Meiten ta né reni ngale ta fié pa po it ni. Pai le ta ndéréré kyat ta né, nase rbóng ta rpe be ta lé, ta mgo Jou wlo pa. 17 Ta si réféténé né, ta lé kfatailo dolo penyaket léo isó ta ngénngan néya nbóng ta nó rir wóngét re léló né. Kyat ta rut dodoto ta sólé né, po si ni reni séluwé, Himenius i re Filetuse. 18 Si re rélówé keé Jou ni dodoto ta métegélé né. Récegé cogo Jou re nfapangéné keé ni kyat ta re rmóté né ndimé, se pote se néli ité ga tmóté, tpangén pana. Riri dodoto ta né sogado kyat iglé ma rfakduko wlori pa bóngo rdéréré Jou pana. 19 Mayta masike kyaté rfasodoto ta sólé né, Jou ni méiténé né nmétegél ta fatuw-fatuwé, néneniwén i pa, dolo fandasi ta nmeyawén pa. Po ni méiténé wlólo né néceg faje, “Jou nfayal pai ta I ni kyat si,” re “Kyat pai le nfapélóy Jou ngósno, mare nfatoléné keé nó sélsólé né.”
20 Ya bo kpe adeade isó nte: Kyat isó ta reni renó, po ni umé wlólo né reni wódól félé. Reni wódól ta mulo pélóy ta rfakéwelo rpaké guraci re salaka, reni nóté wódól ta rfakéwelo rpaké ay re bétbété. Wódól ta rpe rpaké ay re bétbété né, étné ngénngané nyó se npake, mayta guraci re salaka né, mare reni beybaye ga ta ga nwagém si npake ta né. 21 Wódól guraci re salaka né, ni ngale, it ta tdélé Jou Yesus. I ga wloré né re télówé keé ta lé né, nase mulor pélóy po Jou ni, I ni kyat it ta fatuwé, se Jou bo npake ité tpe ni yabé né, bóngo sói le ta Jou nané ité, nase ité tpe.
22 Kécego awé bo mélówé aw po nafsu-nafsu ta lé, ta félé be móné mya né rarénpe. Mayta meyat awé bo mpe be ta métegélé, mdélé Jou ni dodoto né fafié, mmasié kyaté, re mfatute mdé kyat fafié. Ta kané awé nte, awé le pa, mayta aw re farimé kyat ta ffapélóy Jou Lahatala re wlomi ta beresi.
23 Kyat ta rfabtoblo be méitén ta reni ngale pa né, ma mdéréré si na. Sabab ta, awé re muné kyat ta rfabtoblo be ta né, ni wóré nópé né rfagarangé le. 24 Mayta, Jou ni nénan ité né, ndél pa bo tfagarangé tdé kyaté. Ité mare tuté kyaté né fafié ndimé, tuné tfasodoto ta fié po kyaté, re masike kyaté rpe sól po it ni, ma tisno wlor na. 25 Mayta kyat ta rfakotalé rdé ité, mare tfaftulo si ta métegélé, tpe né re gogoru bóto. Tfaftulo si ta né, solo ma ga Jou npo fié bo rngali si, bo rcae dodoto ta métegélé né. 26 Ie ga re rcae, tabóngo rfayalé róri sélsólé né bóngo rfatéfsal si po setané riri kolano njé ni kawasa né se rdéréré i wlo pana.