Pote se néli nase reni ngénngan-ngénngan ta kangelangé
3
Mfatélolmo aw fafié ta bo kécego awé nte. Pote se néli po ngénngan-ngénngan ta dunia nje re bo nkiamaté né, nase reni kangelang félé. 2 Kyaté né nase rkalesang be riri diri le, wlori be po pipisé lo, rtail be riri diri re rfaséngé si. Rfakcegé be kyaté re lenglongori pa po kyat tuté. Kyaté ni féyfié re Jou ni féyfié ngénngan néya po si ni né ma rfayal pa. Farimé ta po Jou ni né rpeé sói pa. 3 Reriri masié esó pa, rfaisno wlori be po kyaté, re rmafatuté wóé re méiténé. Rkuasa riri diri né réfen pa se sói ta rpe né lé bóto. Riri lé kyaté se ta rpe né reni ta fié esó pa. Farimé ta métegélé né ma riri lé. 4 Po ngénngan ta re bo kiamate né ma kyaté né wlori ncuka rwagé riri délé. Tagare, sói néli ta bo rpe né rénuta pana tabóngo rpe keé. Rpe riri diri cogo sié ro. Si rdé fio né maduga si wlori né, mayta Jou Lahatala ni né rpeé sói pa. 5 Kyat ta né, iglé témnaw si né dolo rdéréré Jou fié, momongo wlori pa bo Jou ni kawasa ntolén po wlori wlólo. Kyat ta dolo né mélówé si.6-7 Kyat ta né, rcung um re umé, cogo rbayé, mayta néminé, bóngo rfasungé riri dodoto ta sól po mépin pocé ta runé folóy pa né. Mépiné né rbósémé róri sélsólé né météwé, ta riri nafsu ma félé, se rlongé dodoto ta sólé né tabóngo rdéréré keé. Si wlori bo runé félé, mayta nópé, rfakduko pa se réfen pa bo rfayal Jou ni dodoto né. 8-9 Kyat ta rut dodoto ta sólé né rfaket dodoto ta métegélé né. Rfakduko wlori pa se rcae gélesó pana, se réfen pa bo rdéréré Jou ta fatuwé né. Kyat ta né kfatailo si dolo sousou Yanes i re Yambres tatubé lima né. Musa nané kyaté rdéréré Jou ni dodoto ga Yanes i re Yambresé rfaketo si néli bo kyaté né rdéréré be si. Mayta, mnuw pa, tabóngo kyaté né runé ta si rpe né sólé se rlongé si pa na. Fajé nóté re kyat ta rut dodoto ta sólé né, mnuw pa, bóngo si ma, nase kyaté rlongé si pa.
Paulusé npo Timotius dodoto ta isem esó nóté
10 Mayta Timotiusé, awé re muné ya fié: re muné fié Jou ni dodoto ta ya kuté né, re nik tabeaté né. Awé ma re muné wlegé njé kdéréré Jou ni mau né ta délé wlegé métmóto, re anik masié ta kpe po kyaté. Masike kyaté né rmakotalé ma, wlegé mya pa, mayta kfasodoto si né léwlów-léwlówé le. Kdéréré Jou né re tebtebnog pa. Né awé re muné ndimé. 11 Kdéréré Jou né, kyaté rfakcegé ya, rfanpuné ya, re rfakangelang ya félé nóté. Awé re muné né farimé ndadi i po ya ni po pnuw Antiokhia, pnuw Ikonium, re pnuw Listra. Mayta masike rfakangelang ya ta féléo i né ma, Jou ndéréré ya se kpe gélesó pa. 12 Mayta fajé óro. Farimé kyat ta réyówé bo rpe be ta Jou Lahatala wlo ncuka né, nase rduk kangelang félé lima kyat ta riri lé Jou. 13 Kyat léo re kyat ta rmalólé né nase rbóng ta rpe be ta lé. Riri malól ta rpe po kyaté né, ta isem nópé, kyaté ma nase rlól si nóté.
14 Mayta, awé mare ta délé mdéréré be Jou Yesusé ni dodoto ta re mdéréré né. Dodoto ta njé re muné fatuw-fatuwé nmétegélé, sababta re muné fié kyat ta rfasodoto awé né. 15 Fajé nóté, ta awé mémyaku lesu sogado nte, re muné fié ta po Jou Lahatala ni Buké wlóloa né. Muné ta né, ta mulo ga mdélé Jou Yesus Kristusé sogado mduk salamat. 16 Farimé méitén ta po Jou Lahatala ni Buké wlólo né, Jou Lahatala ni Rohé njé ta nfaftulo kyaté se rlefo. Iga tbaca, ni ngale né fié po it ni: Dodoto ta métegélé né nase tuné fié se tfasodoto kyaté. Ité ma tuné rór sélsólé, kyaté róri sélsólé ma tuné se tane si rtébné. Nase kyat ité, isó-isó tfaméteglo rir diri. Ité ma tuné tdelo yéfén ta métegélé né, re tfaftulo kyat nésé. 17 Se Jou ni Buké njé ga tbaca i, bo tdadi Jou Lahatala ni kyat ité né re tfaléléy ité, se bo tpe ta fié sói lé, tuné ndimé.