2 Timotius 4

1-2 Pote se néli Yesus Kristusé nase nwómé nmulé, bo nfajólo farimé kyaté, kyat ta rmót re ta rmót pafule, se I re si rfatébono. Ta rdéréré I pa né, nfasólé keé si. Ta rdéréré I né, I re ndadi riri kolano I se nkawasa si. Necé ta mulo bo kané awé nte, Timotiusé. Meméfétén Jou Lahatala ni méiténé bo kyaté né rdélé. Mfaléléyé wlemé njé fafié, dorém re ngénngané, bo masike po féyfié wlólo pari po kangelangé wlólo ma, mfafané le Jou ni méiténé né. Masike kyaté né bo rlongé pari tis pari, méyówé yéfén sói le bo sogado rlongé ta mécegé né. Kyat pai le ta renó sélsól po Jou ni, mécego i bo nuné ta fatuwé i renó sélsólé. Mécego i fafié bo n-ngali i. Mpo méitén ta fié bo nfakuaté kyaté njé wlo bo nbóng ta ndéréré Jou Yesusé. Masike farimé ta mécegé né bo dolo rlongé tuw pafule, mécegé né ma memgao si na. Mfasodoto si né ta métegélé ndimé. Ta kané awé nte, Jou Lahatala re Yesus Kristusé ma re rlongé ndimé. 3 Ta mulo ga kané aw fajé né, sababta pote se néli kyaté né nase wlori météo Jou ni dodoto né, se rlongé pana. Si wlori bo rpe sélsólé lesu se réyówé be riri guru agama ta nésé ta rfasodoto né rdéréré be kyaté riri mau. 4 Si rfapida si po Jou ni dodoto né. Mayta kyaté ni méitén ta ni ngale né fatuw pa ga wlori ncuka rfaméylongé. 5 Mayta masike Jou ni méiténé né rlongé pa, wlemé njé nkéyówén na, de. Pote se néli, bo kangelang sói néli le ma, mesuwe aw na. Méfétén Jou ni méitén bo kyaté né ma rdélé Jou Yesus. Mfafané ndimé yabé ta Jou re npo awé né.

6 Ta féléo i né kfaftóto awé, sababta nik métmóté nte rénérakéné. Kyaté bo rpuné rfamót ya. Nik diri nje kpe keé i sadaka po Jou ni. 7 Kfatailo ya dolo kyat ta rfabésé ta re bo rwómo garise njé. Né ni ngale, ya re keyat ya kdéréré Jou né, se re kpe ndimé ta I nané ya né. I ni dodoto né keé pa. 8 Se ta dolo kyat ta rfabésé né rfaduwo si hadia po béboko lo, ya ma re kuné nase kduké nik hadia ta Jou Lahatala re nfaléléy, sababta I re nuné wlegé nje nmétegél po I ni. Pote se néli po ngénngan ta I nwómé nmulé né nase npo ya. Ngénngan ta njéi ro ta bo nfara pai ta ndéréré I re pai ta ndéréré I pa. I nase nfara isó re isó né reni ta sól pa. Ta bo rduk hadia njé ya le pa, mayta farimé kyat ta fatuw-fatuwé ruta re rlolém Yesusé se réftón I ta bo nwómé nmulé né re wlori ta séngséngé bóto.

Paulusé nfaftóté Timotiusé bo nwómé

9-12 Timotiusé, ya re Lukasé kkumél am pote. Se méyówé yéfén fawa bo aw lima famla le, de. Sababta Demase wlo njé be po dunia ni haréta se nfatopo keé ya, bóngo nfan i néli po pnuw Tesalonika. Kreskese ma nfan i po bótén Galatia, Titusé ma nfan i po bótén Dalmatia. Tikhikusé ma re kané i nfan néli po pnuw Efesusé. Se bo mwóm lima né, mfauto Markuse sababta i n-gali ya fié bo kpe Jou ni yabé né. 13 Nik kabaya ta nbebtite njé ma mfauto i lima. Kabaya njé kfatolén i po pnuw Troas po légaé Karpus ni. Re mfauto nik buk-buké né nóté. Nik buk-buk haiwan liko ta kélile né ma ta délé ma mlupa na.

14-15 Kfabingo awé, Aleksander ta ni yabé né npe be salaka, i re npe ta lé né félé po ya ni. Jou ni dodoto ta ité tfafané né, i ta délé néyówé yéféné bo nfaketé keé. Se kécego awé, mpe aw fafié, mati naga npe po aw ni nóté. Mayta wóré i, Jou re nuné ta i npe né, se nase Jou ta nfarén po i ni.

16 Ya i po bui wlólo né, rut ya néli rfatébono ya re kolano ta npélóyé njé. Faiwóbno ta kegbóno i né, reni kyat isó pa ta ndé ya, rfatopo keé ya ndimé. Mayta kéroré bo Jou Lahatala nmasié si, mati nfasólo si na. 17 Masike rdé ya pa ma gélesó pa. Jou ndéréré ya, nfakuaté wlegé njé sogado kéféténé keé ndimé Habar Fio ta lima Yesus ni né, sogado kyat ta agama Yahudi si pa ma rlongé ndimé. Se kyat ta bo rfakangelangé keé ya né, Jou nfaketé keé si ndimé se rduk ya pa. 18 Ya kuné Jou nase nésólé keé ya po farimé ta lé ta bo rfakangelang ya né. I nase nfasalamaté keé ya, se nélóngé ya néya soroga po géwgów ta I nkawasa ni kyaté né. Necé ta mulo ité mare tfapélóy re ttail Jou sogado fajé néli le. Amin. 19 Mfawómo nik tabea néli po Priska i re Akwila ni, re Onesiforus i re ni dél po i ni umé wlólo né ndimé. 20 Erastuse i po pnuw Korintuse lesu, Trofimusé nlélété se kfatolén i po pnuw Miletuse lesu. 21 Méyówé yéféné bo ta mawruw pafule nte, re aw lima. Ebulus, Pudes, Linus, Klaudia, si re riri dél farimé ta rdéréré Jou Yesus pote né rfanaté riri tabea po aw ni.

22 Kéroré né, Jou ma ntéptubo re ndéréré awé re npo ni féyfié né po aw ni.