Titus 1

Titus

Surat ta Paulusé

nfanaté po Titus

1-4 Suraté nje lima Paulus ni. I Jou Lahatala ni nénan i, nénut Jou Yesus ngósno, bo kyat ta Jou Lahatala npili si né rduk salamat. Jou nané i nfakuaté wlori bo rdélé I ta fatuwé re nfaftulo si Jou ni dodoto, bo rpe be ta mgo Jou wlo. Nfaftulo si ta né, sababta ta Jou Lahatala ntulada dunia nje pafule, I re néjaji bo nfasalamat kyat ta rdélé I, bo si re I sogado fajé néli le. Néjaji né fatuwé, nlól pa. Se po ngénngan ta Jou re nfaréné né, Jou Lahatala nfawóm Jou Yesusé bo nfasalamat kyaté, necé I ni Habar Ta Fié. Habar Fio njé Jou Lahatala re ndélé Paulusé se nané i nfawómo kyaté né néli re lima. Ta nané Paulus néfétén ta néi, né I ro, Jou Lahatala ta nfasalamaté kyaté né.

Titusé, ya re awé tdéréré Jou Yesusé né wlor be pusó, se kyó aw dolo antig tuo awé.

Féyfié lima Jou Lahatala re Kristus Yesusé ni ntébtubo re ndéréré awé, bo wlemé njé nménóné i le.

Majelis po Jemaate wlólo

5 Titusé, ta mulo kfatolén aw po wéf Kreta né, bo mfatoteme rir yabé ta wóré pafule né, bóngo mfan néli po pnuwé-pnuw ta pocé né bo méftul penatua-penatua. Méftul si, mdéréré ta dolo re kécego awé né. 6 Bo rdadi penatua, né mare kyat ta dolo faje: riri fénfan re téltoléné né métegél se isó bisa néceg si pa, riri pégelé ma isó le. Nturi né ma mare rdéréré Jou Yesusé, ruté riri diri né fié re lenglongori fié bo réjaga riri délut ngósnori. 7 Sababta pai le ta bo rfaménawé Jou ni kyaté né, riri fénfan re téltoléné né mare métegélé bo ma isó néceg si pa. Ndél pa bo rpe riri diri dolo sié ro, ndél pa rmawasane, ndél pa rmafainém, ndél pa rmafamngamo, re ndél pa mtóri be néli po pipisé lo. Farimé ta né, ndél pa rpe. 8 Mayta si mare rpe ta faje: Rut fié kyat ta rwóm po riri umé lo, wlori ncuka rpe ta fié, rkuasa riri diri se ta lé né ma rdéréré pa, rpe be ta métegélé né, rpe ta nfamgo re Jou wlo, re riri fénfan re téltoléné né rdéréré ndimé Jou ni méiténé. 9 Si ma mare ta délé rétané re rdéréré Jou ni dodoto né, ta dolo ité tfasodoto né. Pocé ga nase runé rfasodoto kyat, re rfakuaté wlori bo rbóng ta rdéréré Jou Lahatala. Si ma runé rfaméteglo kyat ta rdéréré dodoto ta métegél pa né.

10 Sababta reni kyat félé ta lenglongori pa po Jou ni dodoto, se rfasodoto né rfambóngo dodoto ta reni ngale ta fié pa se rfalélólé be kyaté. Po si ni, reni kyat félé ta rdéréré agama Yahudi ta rfasodoto cogo bo tdéréré Jou Yesusé né, mare rcunat it su. 11 Riri dodoto né nfarwae keé kyat po um ay fis néli wlori, sogado dodoto ta métegélé né runé rpe pana. Si rfasodoto né, maduga mtóri be néli pipisé lo. Kyat ta né mare mécego si bo rtébné, bo riri dodoto né rfafané le na. 12 Rir dél Kreta isó ta guru agama i ma néceg si faje, “Kyat Kreta né rmalólé, wlori lé dolo haiwan ta ró be kyaté, re rbusu se rpe yabé pa, mayta rmamnómé.” 13 Ta i nécegé né, molen i. Se kyat ta rut dodoto ta sólé nesté, awé mare mané si bo rtébné keé ro, bo rdéréré be dodoto ta métegélé né. 14 Mécego si bo mati rlongé na, kyat Yahudi riri memumen re atoran-atoran agama ta kyaté né rpe, ta nfawlawang re Jou ni dodoto né. 15 Kyat pai le ta wlo njé nberesi, sói le ta npe né nase nfalélé i wlo pa. Mayta pai le wlo njé nberesi pa, sói le ta npe né nase reni ta fié esó pa. Kyat ta dolo né, rénuta be ta lé, se ta lé né récegé cogo fié se rpe. 16 Si récegé cogo rdéréré Jou Lahatala, momongo téngóto sói ta si rpe né sól bóto, rdéréré I pa. Kyat ta né ta délé rlé, lenglongori pa po Jou ni, re réfen pa rpe ta métegélé né.