Paulusé nané Titusé nfasodoto jemaat ta po wéf Kreta
2
Titusé, awé ga, kané aw mfasodoto kyaté né fafié. Sói ta mfasodoto si né, mare nfamégo re Jou ni dodoto, sababta Jou ni dodoto né nmétegélé. 2 Mfaftulo légaé-légaé né bo rkuasa riri diri bo rpe ta lé pa, mayta rpe be ta fié bo kyaté rlongé si fié. Wlori né mare nténgéné. Rdélé Jou ni dodoto né fafié re rmasié kyaté. Masike rduk kangelangé, rdéréré Jou né réréntébné pa.3 Fajé nóté, mfaftulo pegele-pégelé né bo riri fénfan re téltoléné né rpe ta dolo kyat ta fatuw-fatuwé rdéréré Jou, rfatuté wóé re méitén na, rmafainém na re rfasodoto ta fié. 4 Mfaftulo pégelé né fafié, bo si ma rfaftulo mépin-mépin ta si pópori né nóté, rfaftulo si, bo si ma rmasié riri légaé re nturi né, 5 rkuasa riri diri né fafié bo ma rpe ta lé na, wlori né réjaga bo beresi, rpe yabé fafié po riri umé wlólo né, re riri féyfié félé po kyaté, re lenglongori fié po riri légaé né. Mépiné né rpe ta fié ta néi, bo mati rfaméymóy Jou ngósno na.
6 Fajé nóté, mfaftulo món-móne né bo si ma rkuasa riri diri bo rpe ta lé na. 7 Titusé, farimé ta mpe né, mpe fafié bo si rémnawé bóngo rdéréré ta fié ta mpe né. Ta mfasodoto kyaté né, wlemé njé mare nberesi, mécegé né fatuw-fatuwé, bo kyaté né rlongé dodoto njé. 8 Mfawómo Jou ni dodoto né mfamétegél fafié sogado reni ta sól na, bo kyat ta riri lé ité né, rduk yéfén pa bo rfalélé ité né. Nase rmóé si se rfaténténgén si.
9 Fajé nóté, mfaftulo kyaté-kyat yabé né bo lenglongori fié po riri tuangé né ni.a Sói le, mare rpe fafié bo rfamégó i wlo njé. Ndél pa bo rmangsóngélé. 10 Ndél pa rlewés riri tuangé né riri wódólé. Mayta farimé ta rpe né mare métegélé, bo riri tuangé né ma rdélé si fié. Kyat yabé né mare rpe ta fié dolo né, bo kyaté rémnaw ta rpe né, bóngo rtail dodoto ta lima Jou Lahatala ni, ta nfasalamat ité.
11 Titusé, awé mare mfaftulo kyaté rpe ta néi, sababta Jou Lahatala re npo Yesus Kristusé bo nfasalamaté kyaté, nece Jou Lahatala ni féyfié po farimé kyaté. 12-13 Jou ni féyfié né nfaftulo ité bo tétóf rir nafsu-nafsu né re sói le ta Jou wlo ncuka pa. I ni féyfié né ma npo ité tkuasa rir diri, bo tpe be ta métegélé né, re tpe be ta Jou wlo ncuka né. Tpe ta necé i, re téftón Yesus Kristusé bo nwómé nmulé. I ro, rir ngongano ta nfasalamat ité njé, rir Jou Lahatala. Nwómé né nfauto farimé ni kawasa re manano né se séngséngé bóto ité. 14 Jou Yesus re npo fié ni diri nmóté, ndadi rir pélpólésé, bo nésólé keé it po kawasa léo ta npitén ité né. I ma nfaféyfié ité se tdadi I ni kyat ta I ni it óro, ta wloré ncuka tpe be ta métegélé.
15 Farimé ta re kécego awé né, mfaftulo kyaté né bóngo mfakuat si wlori bo si ma rdéréré fafié. Kyat pai le ta ndéréré pafule, mécego i fafié bo i ma ndéréré. Mfaftulo si né, mpe sogado kyaté né rlongé aw fié, mati sogado réngóto awé memya na.