Titus 3

Kyat Kristene né mare tpe be ta métegélé né

Titusé, kyaté-kyat ta rdélé Jou pocé né, mfatélolmo si fafié bo lenglongori fié po riri kolano re wlón, re farimé kyat ta rkuasa si né. Bo rané yabé sói ta fié né, rdéréré ndimé. 2 Mécego si bo ma récegé kyat na, rfamngamo rdé kyat na, mayta rut farimé kyaté né fafié, riri méitén re sói le ta rpe po kyaté né mare gogoru bóto.

3 Ngané fis ta tdélé Jou Yesus pafule né, ité ma tuné wlor ta fié pa, lenglongor pa, tdéréré be ta sólé, ma tuné pa. Téyówé be tfasénangé rir diri, tdéréré be rir nafsu ta nkawasa keé ité. Ngénngan néya tpe be ta lé, tfatélengén isó re isó. Kyaté né riri lé ité, ité ma rir lé si.

4-5 Mayta, masike fajé ma, Jou Lahatala nfaftulo ni masié re féyfié po it ni, se nfasalamat ité. Salamaté njé, it pa ta tpe ta métegél sogado tduk i né. Mayta, I ni masié re ni féyfié né ta nfasalamat ité. Ni Rohé njé réniwéné keé wlor ta nlé njé se wloré né nóbén nmulé, beresi dolo yomya ta tagare rtubé né wlori. 6 Roh ta npo ité njé, npo né cuci-cuci pa, mayta npo keé ité ndimé. Jou ni Rohé njé tduk I po Yesus Kristus ta nfasalamat ité njé. 7 Jou Lahatala ni féyfié né pélóy po it ni, se nétén ité kyat ta wloré métegél po I ni. Né tabóngo tuné ta it re Jou nase sogado fajé néli le. 8 Ta kécego awé né fatuwé.

Se sói ta re kfaftulo awé né kéroré bo awé ma ta délé mfaftulo nim dél ta rdéréré Jou Lahatala né, mpe fafié bo rdéréré ndimé. Mfaftulo si né fafié, bo si ma rérénpe be ta fié. Farimé ta kané mewé né, bo fpe ndimé, nase reni ngale ta fié félé po kyaté. 9 Mayta kyat ta rfakotalé be ta reni ngale pa né, ma mdéréré si na. Si rfakotalé be riri gélé re gaé tatubé ngósnori, rfamngamo le, si re si ma rfakotalé be riri hukum agama Yahudi né, se ma mdéréré si na. Sababta bo rfakotalé le, né reni ngale ta fié facuci le ma tisé. 10 Bo reni kyat faisó nfajakem po jemaate wlólo, mécego i bo npe nóté na. Mayta bo npe lesu, mécego i nóté. Bo re mécego i fanuén luwé, nópé ga npe le, mélówé i su. 11 Kyat ta dolo njé nuné pa ta métegélé né. I nuné ta renó sélsólé né, mayta npe se npe le.

Paulusé nfawasé i

12 Ya nase kané Artemas pari Tikhikus néli po aw ni, bo niwén awé. Awé ga méyówé yéfén fawa sogado aw lima ya ni, po pnuw Nikopolise. Ya nase yai pote lesu sogado moré re meruwe ntóyne i. 13 Pocé po aw ni né reni kyat séluwé: Zenas, ta nuné hukum fié njé, i re Apolose. Si dórén luwé po riri fénfané lo né, iga róri yélén pari gina nfamwómo i pa, méyówé yéfén fawa bo mgali si bo rbósém kangelang na. 14 Ité rir dél ta rdéréré Jou né, mare rfasodoto riri diri bo rpe ta fié, bo i ni hasile né n-gali riri hidup ngénngan néya, re riri hidupé né nase reni ngale ta fié.

15 Farimé kyat ta ya re si pote né kfanaté mam tabea néli po aw ni. Re mfawómo nik tabea po rir dél ta rmasié it ta si ma rdélé Jou Yesus.

Jou ni féyfié né ndéréré mewé ndimé.