6
Timotiusé, kané awé bo mfawómo nte po farimé kyat yabé néa, bo mare lenglongori fié po riri tuangé né ni, bo Jou ngósno re dodoto ta tfasodoto né ma sogado ga kyaté rfakcegé na. 2 Ma ga reni kyat yabé ta néceg faje, “É, nik tuangé njé ndéréré Jou se masike kgawene i fafié pa, nase ncawan ya pa.” Mati néceg fajé na, sababta si dórén luwé rdéréré Jou Yesus ndimé, se Jou néngóto si dolo rfafténé, se kyat yabé njé mare nmasié ni tuangé njé bo ta délé nbóng ta nlongé re ngawene i fafié.Iglé rfafané riri agama né, réyówé be riri pipisé
Farimé ta kané awé né, mfawómo re mfatélolmo nim jemaate njé. 3 Kyat ta ruto mew dodoto ta sólé né, ma flongé si na. Mayta flongé be Jou Yesus Kristusé ni dodoto ta métegélé né, ta nfasodoto ité tpe ta Jou wlo ncuka. Iga reni kyat ta rfasodoto dodoto ta nfalcól re ta né, 4 kyat ta né rpe riri diri cogo sié ro, momongo runé gélesó pa. Si wlori ncuka rfabtoblo be méitén sogado rfamfónésé kyaté wlo sogado si re kyaté rfaktoké. Rfabtoblo be méitén ta né, sogado si re kyat iglé ma rfatélengéné, re rfateylongo isó re isó pana. Si re si ma rfakceg néli lima, re rfatpéténé. 5 Kyat ta rut dodoto ta sólé rfagarangé rde kyaté né re téptébnori pana. Si runé rpe be ta lé, sogado ta métegélé né ma rfakduko pana. Kyat ta dolo né récogoma bo rdéréré Jou né nase rduk pipis félé.
6 Mayta bo fatuw-fatuwé tpe be ta Jou wlo ncuka né, nase sói le ta Jou npo ité né tcéngé, masike rérór gélesó pa, mayta tbósémé né dolo kyat ta rerir rérór. 7 Sababta ité ttub nétó né, tut gélesó pa. Pote se néli, tmóté né ma nase tut gélesó pa. 8 Se ta thidupé lesu nte, bo re tduké róré mnóm re rir ngelngaléne, né fié ro. 9 Mayta kyat ta réyówé be pipis ta félé né, sen si. Si reyat si bo réyówé be pipisé né sogado rémnap po sélsólé lo, rfakduko si pana bo réyówé ta fié né. Kyat ta dolo né, riri nafsu né félé sogado réyówé be ta reni ngale pa, rdéréré be wlori ta lé né se ta lé né ma récegé cogo fié se rpe. Farimé ta né, nut si po métmóté lo re rduk sélsól sogado fajé néli le. 10 Sababta kyat pai ta wlo njé be po pipisé lo, nut i po sélsól ta félé lo. Kyat iglé rmajongo pipisé né sogado rdélé Jou pana. Ni wóré nópé né, rduk kangelang félé ta maduga nfajakem be wlori.
Paulusé nfaftulo Timotiusé dodoto iglé né nóté
11 Timotiusé, awé re mdadi Jou Lahatala ni kyat awé. Se iga mémnawé kyaté bo rpe ta lé ta kécego awé né, ma mdéréré si na, mélówé aw po farimé ta lé. Mayta mare meyat awé bo wlemé njé nmétegél po Jou ni, bo mpe be ta Jou wlo ncuka né. Mdélé Jou né ta délé mbóng ma mbóng ta fatuwé, re mmasié kyaté. Nim méitén re sói ta mpe po kyaté né mare gogoru bóto. Masike sói le ta bo nfatagaha awé, Jou ni yabé né mfafané se mfafané le. 12 Ngané fis ta Jou Lahatala nkakém awé bo mdadi ni kyat awé né, awé re mécegé bo mdéréré I. Ta mécegé né kyat ta félé ma rlongé. Se kécego awé nte, masike mduk kangelangé, mdéréré I né maméntébné na. Mpe dolo kyat ta rfabésé né ta rfakuat si bo rduk juara. Awé ma mare mfakuaté wlemé njé bo mdéréré Jou né ta délé fatuw-fatuwé, bo aw re I sogado fajé néli le ta dolo I re néjaji awé né. 13-14 Timotius, ta kané awé nte, Jou Lahatala i re Yesus Kristusé ma rlongé. Jou Lahatala ta npo nafas po farimé kyat re haiwané né. Yesus Kristus ta negbóno Pontius Pilatusé né néceg ta fatuwé, némtat pa. Se nte kécego awé, mdéréré ndimé Jou Lahatala ni dodoto ta kfawómo awé né. Mpe né mfamétegélé ndimé, bo kyaté né ma rduké nam sélsól pa ta bo réceg awé né. Se mdéréré ta néi fafié, sogado po ngénngan ta ité rir Jou Yesus Kristusé nwómé nmulé. 15 Jou Lahatala re nfaréné rewóré ngénngan ta I bo nwómé né. Jou Lahatala ta mare tfapélóy Ngósno. I ta nkawasa keé dunia njé. Po farimé kolano né, maduga I kolano ta fatuwé nkawasa. Po farimé jou ta kyaté né rcuba né maduga I le ta fatuwé nkawasa. Reni ta nésé pa. 16 Ta faiwóbno lesu, Jou re I pocé. I nase I pocé sogado fajé néli le. I ta ntolén po ni manano wlólo. Manano ta njé i ta délé ncage néli re lima se bo terakén i ma tefen pa. Reni isó pafule ta re némnaw i. Téngóto I ma bisa pa. Maduga I le ta tfapélóy Ngósno njé. I ro ta nkawasa ndimé sogado fajé néli le. Amin.
Kyat ta rkayangé
17 Timotiusé, mfawómo kyat ta rkayang po dunia nte, mécego si bo mati rfaséngé si na. Mécego si nóté ndél pa bo rngongano riri pipisé né, mayta mare rngongano be Jou Lahatala le. Sababta pipisé né, tduk lima, nganesó paluwé le bóngo nase dolo ta tufo yafe. Mayta sói néli ta Jou Lahatala npo ité né nase nkurang pa se séngséngé bóto ité. 18 Mfawómo kyat kayangé né nóté, bo rpe ta fié fafélé po kyaté, re riri sói néli né mare rfanténo kyaté, re wlori nfatutén na, taga ndél pa bo nfasngape, mayta mare sogado kyaté né rcéngé. 19 Bo rpe fajé, riri féyfié né nwóm néya po Jou ni, néliwé keé riri pipis ta néntofu i né. Se pote se néli, bo rmóté se rpangéné nmulé, riri féyfié ta né Jou nase nfamulo si re hidup ta fatuwé.b
20 Timotiusé, Jou re npo aw ni dodoto, bo mfawómo kyaté. Se kécego awé bo mejaga dodoto njé fafié bo ma ta riwén i na. Mélówé keé aw po méitén-méitén ta mgo Jou wlo pa. Ma mdéréré na dodoto ta nfalcól re Jou ni dodoto né. Dodoto ta né récegé cogo ta mógé, momongo reni ngale pa. 21 Kyat iglé rdélé dodoto ta né, sogado re rdélé Jou ta fatuw pana.
Suraté njé kwóm pote su. Timotius aw re nim jemaate njé, Jou ni féyfié né ntéptubo re ndéréré mewé.