Paulusé nané Timotius nfaménawé Jou ni kyaté né fafié
5
Timotiusé, bo kyat tut ta móné né rpe sólé, ma msawan si na, mayta mpe si dolo nim délut tuo si se mécego si fafié bo rtébné, ma rpe fajé nóté na. Ta móné mya si lesu né ma, iga rcólé, mécego si fafié, mpe si ta dolo fténom si. 2 Fajé nóté, kyat tut mépiné né ma, mpe si ta dolo nim délut tuo si nóté. Ta mépiné mya si lesu né, mpe si dolo rémam si. Farimé ta mécego si né, méceg re wlem ta nberesi.3 Mépin balo ta re nturi regburi pa, mare méngóto si fafié. 4 Mayta bo mépin balo ta renturi regburi, nturi re gburi ta né ta mare réngóto i. Sababta si mare rfaftulo ta fatuwé rdéréré Jou Lahatala, si ma mare rfatélolmo riri déluté né riri féyfié po si ni né bo rpe ta fié po si ni. Iga rpe ta dolo né, Jou Lahatala wlo ncuka. 5 Kéceg faje né sababta bo mépin balo ta fatuwé nkumél i, i n-ngongano isó pa, maduga Jou Lahatala le. Dorém re ngénngané rméitén rdé Jou, réroré bo Jou n-gali si. 6 Mayta mépin balo ta wlori né réyówé bo rfasénang si le, masike rmót pafule ma, kfatailo si né dolo re rmóté sababta wlori né po Jou ni pa. 7 Timotiusé, farimé ta kécego awé né, mfawómo nim jemaate né bo rdéréré, bo kyat nésé rémnaw si né, re róri sélsól pa. 8 Sababta bo kyat pai ta ni gélé re gaé, ni tua re ni baba né ga néngóto si pa, ni foloi, kyat ta po ni umé wlólo né ma néngóto si pa, kyat ta njé re ntekile keé Jou. Se bo tfatailo i re kyat kafire né, kyat kafire né ta fié cuci.
9 Mépin balo ta riri umuré né re taun nuén yófé woném re gle, mlefo ngósnori né po Buk Kemurahane lo, bo jemaate njé n-gali si. Mépin ta bo mlefo si né, mare réfsów be nuéncó le. 10 Si riri féyfié né mare kyaté re rémnaw ta dolo faje: Rgawéné nturi né fié sogado rpélóyé. Kyat ta rwóm po ni umé lo né, rut si fié. Kyat ta rdélé Jou Yesusé né si rgawéné si fié rerfawlo né pélóy si pa. Wlori ncuka rgali kyat ta rkangelangé. Ngénngan néya, rpe ta fié né re tebtebnori pa.
11-12 Mayta mépin balo ta riri umuré né taun nuén yóféwoném pafule, ngósnori né ma mlefo su na po Buk Kemurahane lo né. Sababta, bo mlefo si, si mare réjaji bo réfsów pana, bo rgali be Jou ni yabé. Si róbene lesu, se mati na ga néli-néli ga wlori bo réfsówé. Iga re mlefo si ga réfsówé nóté, ta re réjaji po Jou ni né reni ngale pa se Jou nase nfasól si. 13 Fajé nóté, mépin balo wóbno né, iga jemaate njé re n-gali si, tabóngo nase rpe yabé pana, mayta rénbay si le. Taga né le pa, nase rfatuté wóé re méitén néli re lima re wlori ncuka rfafafto si ta riri gétgité, bóngo rfasópén be méitén ta i góo pa. 14 Necé ta mulo kécego awé, bo ya, mépin ta rbalo wóbno né, ta fié, réfsówé nóté, bo rduké nturi re rgawéné be riri umé wlólo né fafié. Rpe ta né, fié, bo kyat pai le ta riri lé si né, bo rfalélé si ma, rduk yéfén pa. 15 Sogado ya kéceg fajé, sababta reni mépin balo wóbno iglé nte re rtékilé keé Jou, se rdéréré be setané riri kolano njé.
16 Se ta dolo re kécegé né, mépin pai ta ndéréré Jou ga reni dél tuo ta nbalo, i ro ta mare n-gali i, bo mati nfamétéw jemaate njé na, se jemaate njé maduga n-gali mépin balo ta rkumél si.
Penatua né riri yabé
17 Penatua ta rfafan yabé po jemaate lo fié, jemaate njé mare nlongé si fié, mayta né le pa, bóngo rgali si riri hidup ngénngan néya, lébé-lébé penatua ta rémgaori pa rfasodoto re rfawómo Jou ni méitén po jemaate njé ni. 18 Sababta po Jou Lahatala ni Buké lo, reni méitén esó ta i glio faje, “Sapi ta neimes gandumé né, mati tpitén sumo né na, mayta mare tefay i, bo néimésé né fié”. Reni méitén esó nóté ta glio né faje, “Kyat pai ta npe yabé sogado ni maméekété ncelé, i mare nduké nó ténténé.” Méiténé né ta né. 19 Kyat pai ta nkélak penatua isó po aw ni, ma mdélé i su na. Mare kyat faséluw pari sételé ta rémnawé nó sélsólé né, ga taga mlongé si ta bo réféténé né. 20 Iga pai ta fatuw-fatuw ncólé, mécegé i nó sélsólé né po jemaat usnori lo bo kyaté né ma rémtaté se rpe pa ta dolo i npe né.
21 Timotiusé, ta kécego awé nte, fatuw-fatuwé kéroré bo mdéréré ndimé. Masike nim dél tuo, pari kyat ta nésé, mati ma mfarfara si na. Mdéréré be ta kécego awé nte bo mpe po farimé kyaté. Sababta, ta kané awé nte, Jou Lahatala, Yesus Kristusé, I re ni nénan ta I npili si ta po soroga lo né, si ma farimé re rlongé.
22 Iga bo méyówé kyat faisó ta bo nfafané Jou ni yabé po jemaate wlólo né, mare mfaménawé i fafié su. Mati mbable métewlé faomé néya bo mélóngé i su na. Sababta iga mbablé mpe ta né, nópé ga npe sólé, i le pa ta ncólé né mayta aw re i fsólé ndimé. Mejaga wlemé njé fafié bo nberesi.
23 Timotiusé, ya klongé cogo snomé njé dolo bo néncanang pa, re awé ma mlelélété. Se kécego awé bo miném be wóé le na, maytabóngo minémé nam anggur facuci bo n-gali snomé njé.
24 Kyat iglé róri sélsólé né répiné réfen pa se Jou nfasól si pafule ma, re tuné keé róri sélsólé né. Kyat iglé ga róri sélsólé né tuné pafule. Pote se néli, ga taga tuné. 25 Fajé nóté re kyat ta rpe ta fié. Iglé, riri féyfié po kyat ni né, re témnawé se tuné keé. Iglé masike riri féyfié né témnaw pafule, mayta pote se néli nase tuné keé.