Guru ta rmétegél pa
4
Jou Lahatala ni Rohé njé re nécegé keé: Pote se néli kyat iglé nase rdéréré Jou ta fatuw pana, rdéréré be riri roh léo ta nfalélólé si re setané né riri dodoto. 2 Dodoto ta né guru ta rmalólé né ta ruto si, récegé cogo rdéréré Jou, momongo rpe pa, se rpe ta sólé ma rbósémé né cogo sól pa. 3 Si rané kyaté, bo rdélé Jou né, mati réfsów na, tagare rfaboboso keé mnóm iglé. Momongo Jou ntulada mnómé né ndimé bo tó se it ta tdélé Jou re tuné dodoto ta métegélé né tó né téceg syukur po Jou Lahatala ni. 4 Sababta farimé mnóm ta Jou ntulada né fié se reni pa ta boboso né, asal ta tó né, téceg syukur po Jou ni. 5 Ta mulo farimé mnómé né halale, sababta Jou Lahatala ta re npo fié ndimé bo tó, re bo tó né téceg syukur po Jou ni.Paulusé nané Timotiusé bo i ma nuné ni yabé né
6 Timotiusé, mfawómo nik méiténé nte po rir dél ta rdéréré Jou. Iga re mfawómo si ta dolo né, necé re mdadi Jou Yesus Kristusé ni nénan ta fié. Awé ma re mdéréré fié Yesus ni méitén re ni dodoto ta métegélé ta re mlongé tatubé lima lesu. 7 Se mélówé keé farimé kyat tuté riri pitua re memumen ta mgo Jou wlo pa. Mayta, mfasodoto wlemé njé bo mpe be ta Jou mgo wlo né. 8 Sababta bo tlati be rir badané bo tkuaté, necé i ni ta fié né masolo cuci le. Mayta bo tfasodoto wloré bo tpe ta mgo Jou wlo né, né i ni féyfié nase ndéréré it pote fajé sogado fajé néli le. 9 Ta kécegé né fatuwé, se pai le ta nlongé mare ndéréré ndimé. 10 Necé ta mulo tfafané se tfafané le Jou ni yabé né, masike sói le ta nfatagaha ité, sababta ité tpeé rir ngongano be Jou Lahatala, Jou ta nhidupé njé. I ta npo yéféné bo farimé kyaté rduk salamat, i ni foloi, kyat ta rdélé I. 11 Farimé ta kécego awé nte, mfasodoto kyat ta pocé né, re mané si bo rdéréré.
12 Timotiusé, awé nte móné mya awé lesu se mati naga sogado kyaté né rétén aw pa. Se muté nim diri né fafié, bo kyat ta rdélé Jou né runé ta métegélé né bo rdéréré awé. Né, méceg re mpe be ta fié, mmasié kyat ta fatuwé, mdélé Jou mati mtébné na, re mejaga wlemé njé bo nberesi le. 13 Nte kané awé mbaca Jou ni méitén po kyat ta félé usnori lo, mfasodoto si re mfakuat si wlori bo rdéréré. Mpe ta né, ma mtébné na, sogado ya kwóm po aw ni. 14 Mfatélolmo aw ta nuéncó majelise né rétewlé faori néya po aw ni, pocé Jou nfabingo si ta ni Rohé njé bo npo awé karunia esó, ta bo nfakuat awé mfafané ni yabé né. Se kécego awé, bo mpe Jou ni yabé né, mpake karunia ta njé.
15 Mfatélolmo aw ta kané awé né, mdéréré ndimé, mati mtébné na. Meyat awé bo mpe ta né, bo kyaté né rémnaw re runé ta fatuw-fatuwé awé re mdéréré Jou fié. 16 Mejaga aw fafié bo nim fénfan re téltoléné né mdéréré Jou wlo. Jou ni dodoto ta muté né, mfatélolmo aw fafié bo mati mfabóngo ta sól na. Mpe ta né fafié. Sababta iga mpe ta né i, ga mtébné pa, nase awé le pa ta mduk salamat, mayta aw re kyat ta rlongé awé né ma rsalamat.