Kyat ta rfaménawé jemaate né mare rdéréré Jou fié
3
Ta bo kécegé nte fatuwé. Kyat pai ta wlo bo réftul i nfaménawé jemaate, né fié. Necé yabé ta Jou wlo ncuka. 2 Kyat ta bo téftul i nfaménawé jemaate njé, i ni fénfan re téltoléné né mare ta dolo faje: Wlo njé mare nmétegélé bo isó ta néceg i na. Ni dél pégelé isó le. Wlo njé mare nténgéné, re nkawasa ni diri bo ta lé né npe pa. Kyat ta njé mare nuté ni diri fafié sogado kyaté né ma rlongé i fié. Kyat ta rwóm po ni umé lo ma, nut si fié. Re, nfasodoto kyaté né ma fié. 3 Kyaté njé nmafainém pa. Nmasawan pa, mayta katno bebobélé. Nmafamngamo ndé kyat pa, re i ma wlo njé be po pipisé lo pa. 4 I ma mare nfaménawé kyat ta po ni umé wlólo né fafié. Ntu né ma mare rlongé i fié re rémtat i. 5 Sababta bo kyat ta po i ni umé wlólo né nfaménawé si néfen pa, kyat ta rdéréré Jou Yesusé né ma nase néfen pa bo nfaménawé si né. 6 Kyat ta bo réftul i nfaménawé jemaate njé mare re n-ngali i se ndéréré Jou né re némnuw facuci. Iga tagare ndéréré Jou, ta fié né réftul i su na. Mati na ga rélóngé i néya rewóré ga npe ni diri cogo ie ro. Nase Jou nfasól i ta dolo re nfasól setané riri kolano njé né. 7 Kyat ta njé mare npe be ta fié bo ngósno né fié po farimé kyaté. Kyat ta runé Jou Yesus pa né ma rtail i. Sababta, bo npe sólé, bóngo kyaté né réceg i, tabóngo setané riri kolano njé nbóng ta nkawasa keé.Samas-samase né
8 Fajé nóté re samas-samase né ma, mare ruté riri diri fafié bo kyaté né rlongé si fié. Pepleori né ma nésagél i na. Riném anggur folói na, re si ma mati réngóto be pipis na. 9 Mayta si wlori né mare beresi, fatuw-fatuw ta rdélé Jou ni dodoto ta I re nfaftulo ité né. 10 Se bo rdadi samase, mare jemaate né rfaléngóto si su. Iga riri fénfan re téltoléné né re métegélé, ga tagare rélóngé si. 11 Fajé nóté riri pégelé né ma mare ruté riri diri né fafié bo kyaté né rlongé si fié. Rfatuté wóé re méitén na, rkuasa riri diri bo ta lé né rpe pa. Sói néli né, récegé le pa, maytabóngo rpe, se farimé kyaté rdélé si. 12 Kyat pai ta bo rpili i ndadi samase, mare ni pégelé be isó le. Ntu re kyat ta po ni umé wlólo né ma mare nfaménawé si fafié ndimé. 13 Sababta bo rfafan riri yabé po jemaate né métegélé, jemaate né ma nase rlongé si fié, se nase rbóng ta rdélé Jou Yesus Kristusé, re rémtat pana réfétén I néli re lima né.
14 Timotiusé, masike mnuw pana bo kfan néli aw ni, klefo suraté nje po aw ni, 15 ma ga kduk lawange se mnuw cuci ga kfané. Klefo suraté nje bo funé sói re sói ta mare jemaate rpe ta nfamgo re Jou wlo. It ta tdélé Jou né, Jou Lahatala ni kyat it ndimé, Ité tfapélóy Jou ta nhidupé njé. Kyat ta dolo né, ta Jou ni jemaat ité. Dolo teptibé po um fapéluno ta nfakuat umé njé, jemaate né ma mare tétané Jou ni dodoto ta Jou re npo ité né, bo rfasodoto jemaate né fafié, matinaga jemaate né rlongé riri dodoto ta nésé. 16 Jou Lahatala ni dodoto ta ité tdéréré né, fié. Masike tatubé lima lesu kyaté runé pa, mayta nte Jou Lahatala re nfaftulo ité se tuné. Ta tuné né faje:
Yesus ta re nwóm yama soroga ndadi kyat i.
Jou ni Rohé njé re nfaftulo ta I nmétegélé.
Jou ni nénan ta yama soroga né ma re rémnaw I.
I ni kyaté né ma re rfafan ngósno né po pnuw re bótén,
sogado kyat ta si po bótén sói lo le ma rdélé I.
I re térélóngé i néya re Jou Lahatala ni kawasa re manano wlólo.