Jou Yesus bo nwómé nmulé se mare ffaléléy mewé
5
Mam délut, faftén re farémóné ta mewé, farimé ité nte tdélé Jou Yesusé. Bo kéfétno mewé ta Jou bo nwómé nmulé né, mayta i ni ngénngan ta bo nwómé né, ité kyat ité tuné pa, se ya bo kéfétno mew fawa. 2 Mewé re funé, Jou nase télél be nwómé. Kfatailo dolo kyat ta nwómé nfalewés po dorém fapéluno, se isó pa ta nuné i. Fajé nóté Jou Yesusé bo nwómé né nfabingo it pa, télél be nwómé. 3 Kyat ta rdélé Jou pa né nase rfaléléyé wlori pa se rfalécego, “Nte reni gélesó pana, re tentengen óro. Se tfasénang ité le.” Momongo télél be ta kiamate né se Jou Lahatala nfapóo si sélsól ta délé météwé. Necé kfatailo dolo mépin ta npe lapo se télél be sno nkiké bo nfantuné. Kyat ta rdélé Jou pa né ma ta dolo né, télél be rduk bolito.4 Mayta, faftén re farémóné ta mewé, mewé fdélé Jou, se mewé dolo si pa. Kyat ta rdélé Jou pa né si po dérorémé lo se rfaisno pa ta Jou bo nwómé nte. Mayta mewé re ffaisno fié. Bo i ni ngénngané nwómo i dolo kyat ta nfalewésé njé, ftélél pana. 5 It farimé re tpo wloré né néli po Jou Lahatala ni, se farimé ité re it po manano wlólo. Ité nte tdéréré setané riri kolano njé pa, se it po dérorémé lo pa. 6-7 Se mati tpe it dolo kyat ta rdélé Jou pa né na. Si wlori né dérorém i lé. Kfatailo si dolo kyat ta ryénéf si le, pari rémse, se runé gélesó pa. Ité tuné ta Jou bo nwómé nmulé, se téftón I né, mare tfaménawé it fafié re wloré ma nténgéné. 8 Ité kyat ta po manano wlólo se mare tuné rir diri, po dorém re ngénngané. Ité mare tdélé Jou fatuw-fatuw re tfamasié isó re isó, necé ndadi rir salawake, bo setané riri kolano njé ma néfen it na. Fajé nóté, tngongano be Jou ta bo nfasalamat ité njé. Tngongano be I, necé ndadi rir topi waja, bo setané riri kolano njé nfagayaso it sói néli, ma tlongé i pa. 9 Funé óro ta bo tduk salamat. Sababta ta mulo Jou Lahatala npili ité bo tdadi ni kyat ité né, bo nfapóo it sélsól pa, mayta bo nfayangésé rór sélsólé né bo tduk salamat ta ndé lima Jou Yesus Kristus ni. 10 I nmóté né npólésé rór sélsólé, bo pote se néli, nwómé nmulé, ta re tmót pari tmót pafule ma, nase it re I sogado fajé nénéli le. 11 Ta mulo né, mewé mare ffasung méitén ta fié po isó re isó ni, bo rbóng ta rdélé Jou. Necé mewé re fpe fié se fpe le, mati ftébné na.
Paulus écé riri faftóté
12 Faftén re farémóné ta mewé, it farimé tdélé Jou. Kyaté-kyat ta rdadi kyat tut po nimi jemaate wlólo né, si rpe nimi féyfié né rémgaori pa. Si ma ta rérénfasungo mewé méitén ta fié. Se kéror po mew ni, flongé re fut si fafié. 13 Flolmo si riri féyfié po mew ni né, bo fatuw-fatuwé flongé re fut si fafié. Ffatut fafié isó re isó.
14 Faftén re farémóné ta mewé, bo kané mew ta iglé nóté. Kyat ta rbusu se rpe yabé pa, fécego si bo rpe yabé ro. Kyat ta rdélé Jou mayta wlori mya, ffakuaté wlori né bo rdélé Jou fatuw-fatuwé. Kyat ta rkangelangé né, fgali si. Masike farimé kyaté né mnuwé ga rdélé mewé, ma ffamgao si na, fécego si re fgali si fafié le. 15 Ffaménawé mew fafié bo masike kyaté rpe nómi ta lé, mati fbalas si re ta lé na. Féyówé bo fpe be ta fié, po mew ni isó-isó, re po farimé kyaté.
16-18 Mewé Jou Yesus Kristusé ni kyaté mewé, se ta Jou nané mewé né ta nte: Wlomi né mare séngséngé bóto mewé, mati ftébné na. Fméiténé fdé Jou dorém re ngénngané. Mew po féyfié wlólo pari po kangelangé wlólo, féceg be syukur fapélóy po Jou Lahatala ni.
19 Jou ni Roh ta po wlomi wlólo né, flongé I fafié bo nbóng ta npe yabé po mew ni. 20 Iga kyat faisó lima néfétén, “É, flongé nte su, Jou Lahatala ta nécego ya nte”, ffaméylongé i fafié su. Ma fbablé fécegé nlól na. 21 Farimé ta nécegé né ffaménawé fafié su, fatuwé lima Jou Lahatala ni pari tisé. Ie ga fié, ffaisno fafié, bo fdéréré. 22 Ta lé sói le, félowé keé, mati fpe na.
23 Jou Lahatala ta nfaféyfié wloré né se ménóné. Kéroré bo I ro ta nfadadi mew I ni kyaté-kyat ta fatuw-fatuwé fdéréré be I. I bo nfaménawé mewé, farimé ta fpe, farimé ta fénuta re farimé ta fbósémé né, bo sogado Jou Yesus Kristusé nwómé nmulé, renómi sélsól gélesó pa. 24 Jou Lahatala fatuw-fatuw npe ta né, sababta I ro ta nkakémé mewé fdadi I ni kyaté mewé né, se I nase npe ndimé ta néjaji né.
25 Faftén re farémóné ta mewé, ta farimé tdélé Jou. Fméiténé fdé Jou né, ffatélolmo amé.
26 Ffawómo mam salam ta ndé yama tutomamé lo né po rir dél farimé ta rdélé Jou Yesus Kristus pocé Tesalonika né.
27 Kané mew re Jou ngósno bo fbaca suraté nje po farimé kyat ta rdélé Jou Yesusé né.
28 Jou Yesus Kristus ni féyfié né ntébtubo re ndéréré mewé.