Yesusé nmóté mayta re npangéné nmulé
24
Po ngénngan Minggu ta tamamóné i lesu né, mépiné nesté rfan po Yesusé ni kuburé lo, rut yégét ta papu mnó ta si re rpe né. 2 Se re rwómé ntali, rémnaw lóy ta rfaketo kuburé ni gbono njé re namlilés i. 3 Se rcung némin po legé njé ni wlólo faje, rémnaw Yesusé ni mayaté njé re tiso I. 4 Pocé tabóngo rdéngó sababta rémnaw férimé ta re ndadi i né, néga télél be reni kyat séluwé riri kabaya né tadélé gégléwé ndimé, rosél si néya po lapori lo né. 5 Se rbóng tadélé rémtaté, bóngo rcuba sogado usnori né nétit nóp po bétbété lo. Tabóngo si dórén luwé né récegé si faje, “Iga kyat ta rmóté ga re rpangéné nmulé, ma féyówé si po géwgów ta njei le na, sababta pote maduga kyat ta re rmóté né góori. 6 I pote pa, I re npangéné nmulé! Coba fatélolmo mew fafié, sói ta I re nécego mew po Galilea né. 7 I re nécegé, ‘Kyaté Ntu ta nwóm yama soroga wlólo njé bo rserakané keé néli po kyat ta re róri sélsól félé né, bo rcalibé keé I. Mayta nase ngané telé le, re npangéné nmulé.’ ” 8 Mépiné nesté rlongé ta néi, ga rfatélolmo si sói ta Yesusé re nécego si né.9 Rewóré ta néi, rpólén si lima kuburé lo, se réfétén férimé ta re ndadi i né po Yesusé ni motemote yófésó re isó nesté ni, re po kyat nésé nóté ta si pocé né. 10 Mépiné nesté: Maria i lima Magdala, Yohana, re Maria Yakobusé ni neke, bóngo reni ta iglé nóté. Si ta néi ta rfébingé po rasul ta nase bo rfané rfawómo Habar ta Fié yama Jou Lahatala ni né.
11 Mayta rlongé né rdélé si pa, sababta racogoma rlólé si.
12 Tabóngo Petrusé nosélé, se nbable ncéreré po kuburé lo. Néli, tabóngo nlik nópé se nlengné néminé, mayta némnaw maduga ngalépé mfus ta réyémo Yesusé ni mayaté njé né. Pocé néléyé se nanénutné po wlo wlólo, sói ta re ndadi i né.
Yesusé nfapdipén re kyat séluw ta rfan po Emaus
(Mrk. 16:12-13)
13 Po ngénngan ta néi óro, reni kyat séluw ta rarénfadéréré re Yesusé nesté rfan po pnuw isó ngósno Emaus. Ta nfawlóo re kota Yerusalemé né nihalé kilo yófésó re pusó. 14 Si rarénfané né, raréfétén férimé ta re ndadi i po Yesus ni né. 15 Se waktu si rfapépoé méitén faje, télél be Yesusé nwómé ga nérakén si bóngo rfané rfadéréré. 16 Pocé rémnaw I, mayta reni sói néli ta nféketé keé mtóri né se rféyal I pa. 17 Se télél be nécegé si faje, “Ta ffanfané nte, féfétén sói?”
Tabóngo rwoslé pocé né wlori né kangelangé sababta rénuté ta re ndadi i po Yesusé ni né. 18 Po si dórén luwé nesté, isó ngósno Kleopasé, i nécegé Yesus faje, “Moke, maduga Awé le ta mwóm po Yerusalemé mayta muné pafule, sói ta re ndadi taga re nte né?”
19 Tabóngo I nutné si nóté, “Sói se ta re ndadi né?”
Bóngo si rcónglo, “Nete re ndadi i po Yesus ta I lima Nazareté njé ni. Nejé Nabi ta nanénfawómo Jou Lahatala ni faftóté njé. Bo nfasodoto kyaté bo npe mujizaté, I ni kawasa né tadélé pélóyé. Jou Lahatala re férimé kyaté récegé nóté, sói ta I npe né fatuwé ndimé.
20 Mayta amé agama Yahudi né, amam imam kapala re kyat tut ta rkawasa amé né re rserakané keé I néli po pemerenta Roma né bo rpo I hukuman ta météwé se rcalibé keé I. 21 Padahalé amé kngongano I ta bo nfasalamat bangsa Israel po tentara Roma ta rkawasa keé amé né. Ta I nmóté se lima né re ngané telé.
22 Mayta reni mépin séfis néli ta rfadéréré rdé amé né re rfatélél amé, sababta po tamémóne i lesu né si rfan po kuburé lo, 23 néli né rémnawé ni mayaté njé re tiso I pocé. Tabóngo rpólén si lima nmulé se rfébingé ta rémnaw Jou ni nénan yama soroga wlólo nesté po kuburé lo. Se rfébingo si ta Yesusé re npangéné nmulé. 24 Se rlongé ta néi, tabóngo mam dél séfis néli rfané nóté po ni kuburé njé ni. Néli faje, rémnaw férimé ta dolo mépiné nesté réféténé né. Si ma rémnaw I pa nóté.”
25 Pocé tabóngo Yesusé nécegé si faje, “Alli, se mewé nte tadélé funé nimi gélesó pa. Ta re mnuo i nte ga fdélé pafule né, ta nabi nesté re rlefo po Kitab ta nfié njé ni wlólo né. 26 Nabi nesté re récegé, Mesias Kolano ta Jou Lahatala re néjaji bo nfasalamaté kyaté njé, I mare nduk kangelang su, ga tagare nduk féyfié po soroga lo.” 27 I néceg fajé rewóré, tabóngo nfébingo si sói ta re rlefo po Kitab ta nfié njé ni wlólo né, nfamdié po ta nabi Musa nlefo, sogado po nabi ta iglé né.
28 Po waktu re rérakén pnuw Emaus, ta si dórén luwé bo rfano i njé, néli faje Yesusé wlo ntilé pa se bo nfalów I le. 29 Mayta si dórén luwé né tadélé wlori pa, se récegé I faje, “Mtilé bo am re Aw pote su, sababta rebo dorémé.” Tabóngo ncung néminé se I re si pocé.
30 Po waktu rtoléné rémnómé, tabóngo nyó roti né se néceg tarima kase po Jou Lahatala ni rewóré, ga nékelésé se nfanténé si dórén luwé né. 31 Se po waktu ta néi óro, si runé ta nejé Yesusé. Mayta télél be tiso I po riri fapéluné. 32 Pocé tabóngo rfalécego faje, “Tamulo ga nméiténé ndé it po yéfén fapéluno, bóngo re néfétno it Jou ni Méiténé né, wloré né séngséngé bóto!”
33 Rewóré ta néi, si dórén luwé rosélé se rpólén si nmulé po Yerusalemé. Néli faje, rfakduk re Yesusé ni motemote yófésó re isó nesté, re kyat iglé nóté ta rfajólo si pocé né. 34 Kyat ta pocé né réfétno si dórén luwé né fajé, “Fatuwé! Jou Yesusé re npangéné nmulé, I re nfaftulo I po Simon Petrus ni.”
35 Pocé si dórén luwé ma, réféténé keé sói ta re ndadi i péséw ta si po yéfén fapéluno né. Réfétén ta rfayal Yesus pafule, mayta ta I nékelés roti se ndo si né, pocé ga rfayalé keé I.
Yesusé nfaftulo I po ni motemote nesté ni
36 Pocé, raréfétén farimé ta re ndadi i né faje, télél be Yesusé nosél I néya po riri fapéluné né, bóngo néceg faje, “Tabea, kéror po Jou ni bo wlomi né nténténgéné!”
37 Bóngo rtélél re rémtaté, sababta si racogoma rémnaw hantu.
38 Mayta I nécegé si faje, “Fpe sói se fémtat re dolo bo fdélé pa? 39 Coba fémnaw faog re sóogé nte, Ya óro. Lima bo fétané, renik wóngét re momé, nfalcól re hantu né.” 40 I néceg faje, tabóngo nfaftulo fao re sóo né po si ni.
41 Po waktu ta néi, tadélé séngséngé bóto si, mayta tadélé rherané lesu se dolo bo rdélé pafule. Bóngo nutné si, “Reni mnóm sói pote mew ni nte?” 42 Pocé, rdo nó in ta sinanga wómé. 43 Bóngo nyó iné né lima, se nó pocé po riri fapéluné né bo rémnawé.
44 Bóngo nécegé si faje, “Nete Ya re kécego mewé, ta Ya re mewé tfadéréré lesu né: Férimé po Musa ni Kitab abén lim, re nabi ta iglé né riri kitab-kitabé né, re po kitab Mazmuré, férimé ta po kitabé-kitabé wlólo né mare bo ndadi i ndimé.” 45 Pocé tabóngo I n-gali si sogado rcae Kitab ta nfié njé ni ngale né. 46 Se nécegé si faje, “Po Kitab ta nfié njé ni wlólo né, re rlefo Mesiasé, Kolano ta Jou Lahatala néjaji bo nfasalamaté kyaté njé, mare nduk kangelang sogado nmóté. Mayta ni mnuo ngané telé le, re npangéné nmulé. 47 Se flongé fafié, Ya niké kyaté né nase kpo si kawasa bo rfané réfétén po férimé bangsa ta po dunia nje ni wlólo nte, bo kyaté né rngali si bo róri sélsólé né Jou Lahatala nfayangésé keé. Si nase réféténé né, rfamdié po kota Yerusalemé. 48 Farimé ta re ndadi i po Ya ni se re fémnawé né, mare féfétén po kyaté-kyaté. 49 Bóngo Ya bo ktebo Roh ta nfié njé po mew ni né tadolo nik Moke re néjaji mew po tatubé lima né. Mayta mare ftolén po kota ta njéi su, sogado Jou Lahatala ni kawasa né re ntebé se nkawasa keé mewé.”
Yesusé teralóngé I néya po soroga wlólo
(Mrk. 16:19-20; Kis. 1:9-11)
50 Tabóngo Yesusé nuté kyaté-kyat ta rdéréré I nesté se rfatoléné keé kota Yerusalemé. Po waktu ta re rérakén po pnuw Betania, pocé ga Yesusé nélóngé fao né se barakat si. 51 Waktu I nbarakat si lesu, télél be teralóngé I néya po soroga lo, se nfatoléné keé si pocé. 52 Se pocé, tabóngo rtiki buku nópé se rcuba Jou Lahatala sogado usnori né nétit nóp bétbété lo. Rewóré ta néi, ga réléy si po Yerusalemé né tadélé séngséngé bóto si. 53 Étné be ngénngané rwóm po Um Sambayang ta npélóyé njé ni kintalé lo, se rcuba re rtail Jou Lahatala.