Yesusé négbono Pilatusé
23
Tabóngo férimé kyat ta rdéréré sidangé né rosélé se rut Yesusé bo rfatégbono I re gubernur Pilatusé. 2 Pocé ga réceg faje, “Kyat ta njéi re nané keé férimé rir kyat ta po bótén Israelé né bo ma rpólés pajak po pemerentah Roma na. Bóngo nécegé cogo I ta njéi Kristusé, ta ni ngale né, Kolano ta Jou Lahatala re néjaji bo nfasalamaté kyaté njé.”3 Tabóngo gubernur Pilatusé nutné I, “Moke, fatuw ta kyat Yahudi né riri Kolano Awé?”
Tabóngo I ncónglo, “Awé ro ta méceg fajé.”
4 Pocé gubernur Pilatusé néceg po agama Yahudi né riri imamé né riri kapala nesté, re kyat félé ta si pocé né, “Masike cuci le ma kduk pa, nó sélsólé né.”
5 Mayta kyaté ta si pocé né tadélé rbóng ta rfalélé Yesusé, se réceg faje, “I ta njéi, re nané keé kyaté-kyat ta po farimé bótén Yudea né, nfasodoto si bo rfakotalé re pemerenta né. Nfamdié po bótén Galilea, sogado re nwóm po kota Yerusalemé nte.”
Gubernur Pilatusé nané rut Yesus po Herodes ni
6 Waktu ta gubernur Pilatusé nlongé Yesusé re nfasodoto kyaté se nfamdié po bótén Galilea né, tabóngo nutné si, “Se fatuwé, I ta njéi kyat Galilea I?”
7 Pocé re nuné ta Yesusé njé kyat Galilea I, tabóngo nécegé si fajé, “Wóré fané bo fut I po Herodes Antipas ni, sababta i ta nkawasa po bótén Galilea.” Po waktu ta néi, Herodesé i po Yerusalemé.
8 Waktu ta némnaw Yesusé né, tadélé séngséngé bóto i, sababta re mnuwé wlo ncuka bo némnaw I. I re nlongé ta Yesusé re npe né, se wlo ncuka Yesusé npe mujizat faesó bo némnawé. 9 Se nutne I félé, mayta ncóngél facuci lé ma tisé. 10 Pocé bóngo imam ta rpélóyé né re guru agama ta runé Musa ni kitab abén limé nesté, si ma régbon pocé nóté, se rosélé ga rpétén Yesusé po Herodes ni re gliri ta pélóyé. 11 Tabóngo Herodesé i re ni tentara nesté, rfalélé re rfamia-mia keé Yesusé. Rewóré ta néi, rduo keé I re juba ta fié dolo kolano né rarénpake né, rewóré ga réléé keé I nmulé po Pilatus ni. 12 Tatubé gubernur Pilatusé i re Herodesé rfatut lé, mayta ngénngan ta néi óro si dórén luwé né rfatut fafié.
Yesusé nduk hukuman ta météwé
13 Rewóré ta néi, gubernur Pilatusé nkakém imam ta rpélóyé nesté, agama Yahudi né riri kyat tut ta rkawasa, re ta iglé nóté, bo rfajólo si po i ni. 14 Pocé tabóngo nécegé si faje, “Mewé re fut kyat ta nje I po ya ni, se fécegé cogo I re nané kyaté né bo rfakotale re pemerenta né. Mayta nte re fémnawé to! Ya re kutné I po nimi usnomi lo, mayta nó sélsól ta dolo mewé fécegé né kduk facuci le ma tisé. 15 Herodesé ma nduké nó sélsól gélesó pa, se kyat ta njéi néléé keé I lima nmulé po it ni. Fatuwé, I ta njéi npe sélsól gélesó pa, se bo nduk hukuman ta météwé né ma métegél pa. 16 Se ya nase kaswako nó wólé rewóré, ga kfabebasé keé I.”
[ 17 Gubernur Pilatusé nécegé bo nfabebasé keé Yesusé, sababta étné be tauné né iga kyat Yahudi né riri ngénngan masaraya ta pélóyé, Pilatusé mare ncópné kyat ta si po bui wlólo né faisó.] 18 Mayta kyat félé ta si pocé né rlongé ta néi, tabóngo férimé si rgélayé se réceg faje, “Fpuné keé I ro, fabebas Barabasé bo fpo i po am ni!” 19 Barabasé njé i po bui wlólo, sababta nngamo pemerenta Roma ta si po kota Yerusalemé né, bóngo re npuné kyaté sogado nfamóté keé si.
20 Mayta Pilatuse wlo bo nfabebas Yesusé, se nméiténé nmulé re gli ta pélóy po kyat ta pocé né. 21 Mayta si ma tadélé récegé né lebe rfakuat si nóté, se récegé, “Fsalipé keé I! Fsalipé keé I!”
22 Sogado nuén telé, Pilatusé nécegé si faje, “Pe sói se bo tpo I hukuman ta météwé? Sababta ya kduké nó sélsól facuci le ma tisé. Se bo kané si rpun I rewóré ga kfabebasé keé I.”
23 Mayta kyat ta pocé né rgélayé né tadélé rtébné pa nbóng ta rfakuat si, rané bo rcalipé keé Yesusé. 24 Ni wóré nópé, Pilatusé ndéréré keé ta rané i né. 25 Se nfabebasé keé Barabasé. Barabasé njé reni ta rfasungé keé i po bui wlólo, sababta n-ngamo keé pemerenta Roma né bóngo re npuné kyaté sogado nfamóté keé si nóté. Mayta Yesusé ga npo keé I néli po kyat ta félé né, se bo rpe I fanfawa le, Pilatusé ndéréré ndimé.
Bo rcalibé keé Yesusé
26 Rewóré ta néi, tentara Roma né rut Yesusé se rcópné keé I tóma kota Yerusalemé. Se rwóm po Yéfén fapéluno, rfapdipén re kyat isó ngósno Simoné. I ta njé kyat Kirene i, taga re nwómé se bo ncung néli po kota njé ni wlólo. Pocé tabóngo rtahané keé i se rané i npó salibé njé bo ntéptubo Yesusé.
27 Reni kyat félé ta rtéptubo I nóté. Pocé ma reni mépin-mépin ta rtangésé né tadélé rdodora, sababta wlori né kangelangé. 28 Mayta Yesusé nélolét I se néngóto si, bóngo néceg faje, “Ee, mépin Yerusalem ta mewé! Ma ftangso Ya na. Mayta ftangso menimi diri, re ntumi né! 29 Sababta nase bo reni kangelang ta lebe météwé nóté, se po ngénngan ta néi nase reni kyat ta réceg faje, ‘Ta séngséngé bóto si né, maduga mépin ta re nturi pa né, ta nuéncó pafule bo rmawyóyé, re rfasusé nturi myaku pa né.’ 30 Bóngo nase réceg po métété né, ‘Tatopésé óro bo mputo keé amé!’ 31 Sogado kéceg fajé né, sababta Ya ta re nak sélsól gélesó pa ma rcalibé keé Ya faje, ga bo mew ta fpe be sélsól félé né. Ya tadolo ay ta mang pafule, se masike rtapén i ma nase namgesé ndimé pa. Mayta mewé tadolo ay ta re mangé né se iga namgo luténé tabóngo namgesé ndimé.”
32 Po waktu ta néi, tentara Roma né ruté kyat léo séluwé nóté bo rcalibé keé si re Yesusé. 33 Se re rwóm po géwgów ésó ta ngósno, “Géwgów Gégegé,” bóngo rcalibé keé Yesus pocé. Re kyat léo séluwé nesté nóté, isó i po féspal wónéyé, ta isó i po féspal balété. 34 Pocé Yesusé nméiténé ndé Jou Lahatala né néceg faje, “Moke, mampong si sababta runé pa sói ta si rpe né.” Tabóngo tentara né répatén undi bo runé pai ta nase nduké ni kabaya njé.
35 Se kyat félé ta rosél pocé se rfanao férimé ta re ndadi i né, tabóngo agama Yahudi né riri kyat tuté nesté, rfamia-mia keé Yesusé. Bóngo réceg faje, “Kyat iglé I nfasalamat si, se nte iga fatuwé I Mesiasé, Kolano ta Jou Lahatala re npili I bo nfasalamaté kyaté njé, ta fié nfasalamaté keé ni diri né nóté.”
36 Pocé ga tentara Roma né, rfamia-mia I. Tabóngo rfarakné si néli ga rfainmo keé I re anggur ta manilé né. 37 Bóngo récegé I faje, “Iga fatuwé kyat Yahudi né riri Kolano Awé, nete óro, mfasalamat Anim diri!” 38 Bóngo po ni baboko néya né, reni fófén wómé né rlefo faje, “Neje kyat Yahudi né riri Kolano I.”
39 Pocé tabóngo kyat leo séluw ta rcalib si re I pocé né, isó njé nfamia-mia keé Yesusé se néceg faje, “Awé nte Kristusé to? Kolano ta Jou Lahatala néjaji bo nfasalamaté kyaté njé. Se coba mfasalamat Awé, re am dórén luwé nóté!”
40 Mayta ta isó njé ncawané ni délé njé, se nécegé i fajé, “Awé nte mémtat Jou Lahatala pa? Ité nte tduk hukumané bo tmóté. 41 It dórén luwé nte pantasé tduk hukumané né, sababta tpe be sélsólé. Mayta kyat ta njéi, pantas pa bo rpo I hukuman ta dolo faje né, sababta renó sélsól gélesó pa.” 42 Tabóngo nécegé Yesusé, “Yesusé, mfatélolmo ya, iga bo mwóm dolo Kolano Awé né.”
43 Tabóngo Yesusé nécegé i faje, “Ya kécego awé, ngénngan pésénte óro, aw re Ya nase it po Firdaus.”
Yesusé nmóté
44 Ta ngénngané nfapéluné né, nihale tok nuén yofésó re péluwé, bóténé njé ndérorémé ndimé sogado tok nuén tel mérimé, 45 sababta ngénngané njé re ntul pa na. Po waktu ta néi, po Um Sambayang ta npélóyé njé ni, reni ngalép isó ta msóyé ta nfaket Jou Lahatala góo re kyaté né góori. Ta Yesusé nmóté né, télél be ngalép ta néi némgawés abén luwé. 46 Tabóngo Yesusé n-gélayé né nfakwat I, se néceg faje, “Moke, Ya kserakané nik jiwa nje po Aw ni.” Néceg fajé rewóré, ta nmóté.
47 Pocé tentara né riri kapala njé némnaw sói ta re ndadi i né, tabóngo ntail Jou Lahatala ngósno se néceg faje, “Fatuwé, Kyat ta njéi renó sélsól gélesó pa!”
48 Se kyat félé ta rfajól pocé se rfénawé né, rémnaw sói ta re ndadi i né, tabóngo réléyé né rarénpés katnori né, sababta tadélé rmanyasalé. 49 Mayta po férimé kyat ta rféyal I fié, bóngo reni mépin ta rfadéréré re I lima Galilea né, si ma rosélé né lówé se rémnaw férimé ta re ndadi i né.
Yesusé rput I po legé wlólo
50 Pocé reni kyat Arimatea isó ngósno Yusufé. I ta njéi wlo fié, re ni hidupé né ma métegél po Jou Lahatala usno lo. 51 I nanéftón be waktu ta Jou Lahatala ndadi Kolano nkawasa ni kyaté né. Bóngo wlo pa nóté, ta Mahkama agama Yahudi nesté rpo hukuman ta météw po Yesusé ni né, wlo ncuka pa sói ta si rpe né. 52 Se nfané nékbon po gubernur Pilatus ni, néroré bo néyó Yesusé ni mayaté njé. 53 Pilatusé npo fié se ntébo mayaté njé po salibé lo se nópé né, tabóngo néyémo I re ngalépé mfus ta nalusé né, npe ta dolo kyat Yahudi né rput métmóté, tabóngo nput I po leg ta róléy po métét lóyé lo né. Kubur ta njéi reni métmót ta rput si pocé pafule. 54 Yesusé nmóté né, ngénngan Jumaté, mgo riri waktu ta rfasadia si raftóné riri ngénngan Sabat ta re bo nwómo i né. Se agama Yahudi né mare rfawóré farimé riri yabé po ngénngané njé ncep pafule né, sababta po ngénngan Sabaté né si bisa rpe yabé pana. Se ta Yusufé nput Yesusé ni mayaté njé né, re bo dorémé se ngénngan Sabaté né bo rfamdié óro.
55 Pocé mépin ta rfadéréré re Yesus lima bótén Galilea nesté, si ma rtaptubo Yusuf ta nfané bo nfalputé Yesusé ni mayaté njé né bo runé gówé. 56 Rewóré ta néi, mépiné nesté rpólén si nmulé po kota Yerusalemé, bo rfasadia rampa-rampa re yégét ta papu mnó bo ralulo Yesusé ni mayaté njé, ta dolo kyat Yahudi rarénpe né. Mayta ta ngénngané njé ncep nópé né, riri ngénngan Sabaté nje re nwómo i, se rfatóyné si rdéréré riri agama Yahudi ni aturané.