Zakheusé ntarima Yesus po ni umé lo
19
Yesusé ncung po kota Yerikho, mayta nfalów I le bo nwetco pocé. 2 Po kota ta njéi reni kyat isó ngósno Zakheusé. Kyat ta rarénfalutno pajaké né riri béboké i, bóngo reni renó félé. 3 I néyówé yéféné bo némnaw Yesusé mayta bisa pa, sababta kyaté né félé ga nkatobé. 4 Pocé ga ncéreré ntubé po kyat ta félé né se npak i po ay ara isó ni bo némnaw ta Yesusé nwetco pocé né.5 Waktu ta Yesusé re nwóm po géwgów ta néi, néngóto néya, némnaw Zakheusé bóngo nécegé i faje, “Zakheusé, famlale mtebé yama óro, sababta po ngénngan pésénte, Ya mare ktolén po nim umé lo.”
6 Zakheusé nlongé ta Yesusé néceg fajé né, tabóngo nbable ntebé se ntarima Yesus po ni umé né, tadélé séngséngé bóto i. 7 Férimé kyaté né rémnaw ta néi, tabóngo rfafeto se réceg faje, “Cekede, ga bo ntolén I po kyat léo njé ni umé lo né!”
8 Mayta Zakheusé nosél néya se nécegé Jou Yesus faje, “Moke, férimé nak haréta né bo kpo keé kfaiglé po kyat ta reriri reróri pa né. Re pai le ta ya re kakal si né, nase kfamulo si nuén fót néli.”
9 Pocé tabóngo Yesusé nécegé i faje, “Po ngénngan pésénte óro, Jou Lahatala re nfasalamaté keé férimé ta mew po umé wlólo nte, sababta awé ma fatuw-fatuwé Abrahamé ni ntu re gbu awé nóté. 10 Ya kéceg fajé né, sababta kyaté ntu ta nwóm yama soroga wlólo né bo néyówé kyat ta ralówé Jou Lahatala né bo nfasalamaté keé si.”
Adeade pipis guraci yófésó
11 Yesusé re nérakén po kota Yerusalemé. Pocé kyat félé récogoma Jou Lahatala bo nkawasa dolo Kolano po I ni kyaté-kyat óro, tadolo I re néjaji po tatubé lima né. Po waktu kyaté-kyaté né rlongé I lesu né, I ntómé ni méiténé né se néfétno si adeade isó nóté. 12 Pocé nécegé si faje, “Reni kolano né nturi re gburi isó, nfan po bótén tadélé nalówé, sababta rlantik i bo ndadi kolano. Iga rewóré ga néléyé nmulé po ni pnuw re bóténé lo. 13 Po waktu ta i bo nfané ro né, nkakémé ni kyat ta rpe yabé né si dórén yófésó, se npo si pipis guraci kyat isó pusó bóngo nécegé si faje, ‘Fpaké pipisé nte bo falwagé sogado kpólén ya pote nmulé.’
14 Mayta kyaté-kyat ta i re si rtolén bótén be isó né, wlori ncuka i pa. Se waktu ta re nfané né, rané riri nénané né rféjalé i bo réceg faje, ‘Amé wlomam pa bo kyaté ta njéi ndadi kolano po am ni.’
15 Mayta masike fajé ma ralóngé keé i se ndadi kolano le. Po waktu ta re npólén i nmulé né, nané ni kyaté né rfané rkakémé ni kyat ta re npo si pipisé nesté bo nutné si, ta rfalwagé né reni bangbóngo pari tisé.
16 Pocé ni kyat yabé ta faiwóbno njé nwómo i se néceg faje, ‘Moke, pipis guraci pusó ta mpo ya njé kfafan i se re ndadi yófésó.’
17 Tabóngo, kolano njé nécegé i faje, ‘Awé kyat yabé ta mfié, sababta cuci ta néi le ma, npe sogado félé. Se nte kalóngé awé bo mkawasa kota yófésó.’
18 Rewóré ta néi, isó njé nwómé nóté, bóngo nécegé i faje, ‘Moke, pipis guraci pusó ta mpo ya njé, kfafan i se re ndadi pélimé.’
19 Tabóngo kolano njé nécegé i faje, ‘Pana fajé, awé mkawasa kota fasélimé.’
20 Pocé reni kyat yabé ta iglé nóté nwómé se néceg faje, ‘Moke, nje nim pipis guraci pusó ta mpo ya njé kiséné keé i po tuala wlólo bo ma némyangés na. 21 Sogado ya kpe fajé né, sababta re kuné awé kyat isó ta wlemé njé nmatué se kémtaté. Sababta iga mané kyaté rpaké nim pipisé bo rfafané, necé re mngongano ni bangbóngo né félé. Re iga mané kyaté rfatónémé, necé mngongano bo rfalingété né ma félé nóté.’
22 Tabóngo kolano njé nécegé i faje, ‘E, awé nte kyat yabé tadélé mlé! Ya nase kfasól awé né tadolo nim méitén ta re mécegé né. Iga re muné, ya nte kyat ta wlegé matué: se kyó be kyaté nó sói néli ta ya nak pa, re kyó keé róri téntóném bét ta ya któném pa. 23 Iga awé re muné fajé, pe sói se miséné keé po bangé lo pa. Bo iga re kpólén ya lima nmulé, bisa kduké ni bunga nóté.’
24 Tabóngo kolano njé nécegé kyaté-kyat ta rosél pocé né, ‘Fyó keé pipis guraci pusó ta po i ni njé, bo fpo ta reni yofésó njé.’
25 Mayta si réceg faje, ‘Kolano, pe sói se fanfajé? Kyat ta njéi reni yófésó.’
26 Tabóngo kolano njé nécegé si faje, ‘Fatélolmo mew fafié ta ya kécegé nte. Kyat pai ta nlongé Ya nik méitén sogado ncaé fié, Jou nase nbóngé se nuné lebe félé nóté. Mayta pai ta re nlongé ga nisén po wlo wlólo pa, sói le ta po i ni né, masike cuci le, nase nyó keé nmulé. 27 Mayta nik réwé-réwé ta wlori pa bo rlatik ya kdadi kolano po si ni né, nte óro fgó si bo fut si lima pote, ga fpun si sogado famóté keé si!’ ”
Yesusé nwóm po kota Yerusalemé se kyat félé rcéngé I
28 Yesusé néfétén adeade njé rewóré, tabóngo nfané nanéntubé po kyat félé ta I re si rdéréré né, bo nfan néya po kota Yerusalemé. 29 Se re rérakén pnuw Betfage re pnuw Betania, po métét Zaitun papo lo, pocé bóngo nané ni motemote séluwé rfané rtubé. 30 Se nfaftóto si faje, “Ffan po pnuw ta tagbono si néli né ro. Iga fsung pocé, nase fduk keledai wóbno isó rpitné i. Keledai ta njé i isó ncaplo i pafule. Bo fasupété keé ni wólé né ga fut i lima pote. 31 Iga reni kyat ta rutné mewé, ‘Fpe sói se fasupété keé ni wólé né?’ Féceg faje, ‘Jou bo ncaplo i.’ ”
32 Pocé rlongé ta nécegé né rewóré, tabóngo rfané. Néli faje, sói ta Yesus re nécego si né, ndadi i ndimé. 33 Se rarésupét ni wólé né faje, télél be ni wlóné njé nécegé si faje, “Fpe sói se fasupété keé keledayé njé ni wólé né?”
34 Tabóngo si rcónglo, “Jou bo ncaplo i.” 35 Pocé ga rut i néli po Yesus ni. Se ryéfo riri juba né po too lo, ga rcaplé Yesus néya. 36 Po waktu ta I ndé pocé né, kyaté rasólé riri juba né se ryéfo keé po yéféné lo bo raftón I. 37 Se rebo ncung po kota Yerusalem, po yéfén ta rarénduén yama métét Zaituné né, tabóngo kyat félé ta raréndéréré I né tadélé rcéngé re gliri ta pélóyé, bóngo rtail Jou Lahatala. Si rpe fajé né, sababta férimé mujizat ta Yesusé npe né, si re rémnawé ndimé. 38 Se réceg faje,
“Ttail I, sababta Jou Lahatala re nané I nwóm lima dolo Kolano I!
Nte Jou Lahatala ta I po soroga, re kyat ta po dunia wlólo nte, re rfaifio si ndimé.
Se lima bo tail re tcuba Jou Lahatala tadélé nkawasa njé!”
39 Mayta reni kyat Yahudi séfis néli ta rdéréré dodoto Farisi né ma si pocé po kyat ta félé né, se récegé Yesus faje, “Guru, mané kyat ta rfadéréré rdé Awé né bo rfaténténgén si.”
40 Tabóngo I ncónglo, “Ya kécego mewé, iga rfaténténgén si, lóy-lóy ta ntéi ta nase rgélayé bo rcéngé re rtail Jou.”
Yesusé némnaw kota Yerusalemé bóngo ntangésé
41 Po waktu ta Yesusé re nérakén kota Yerusalemé né, némnaw i se ntangésé. 42 Bóngo néceg faje, “Arii, sené mewé, kyat ta ftolén pocé né! Ya kngongano nase re fsaé óro, sói ta mewé bo fpe bo wlomi né séngséngé bóto. Mayta nte re bisa pana, sababta necé re répiné keé. 43 Sababta nase reni waktu nóté, ta nimi réwé né rwómé bo rfaketé keé kota njé, ga rpuplo mewé bóngo rpe sogado re bisa fsung re fsópén pocé pa na. 44 Bóngo bo rfajakémé nimi kota njé, ga rpuné keé mew ta ftolén pocé né. Se ni lóy fapusó le ma tis ta bo ratewlé i pocé nóté, sababta ta Jou Lahatala nwómé bo nfasalamaté keé mewé né, mewé ftarima I pa.”
Yesusé nfaungé keé kyaté-kyat ta rfélwagé po Um Sambayang ta npélóyé njé ni kintalé lo né
45 Yesusé ncung po Um Sambayang ta npélóyé njé ni kintalé lo, se nfaungé keé kyaté-kyat ta rfalwagé pocé né. 46 Bóngo nécegé si faje, “Po Buké wlólo né, Jou Lahatala néceg faje, ‘Nik Umé njé géwgów ta bo tméitén re Jou Lahatala. Mayta mewé re fpe keé kyat ta rmalólé né góori.’ ”
47 Étné be ngénngané, Yesusé nfasodoto kyaté né po min Um Sambayang ta npélóyé njé ni wlólo. Pocé ma reni imam ta rpélóyé nesté, guru-guru agama ta runé Musa ni kitab abén limé, re kyat tut ta iglé nóté, réyówé yéféné bo rpuné keé I. 48 Mayta runé pa, bo rpe fanfawa. Sababta férimé kyat ta rtolén po kota ta njéi né, tadélé wlori ncuka rlongé I ni dodoto né.