Tdéréré be Jou le, ma ttalko kyat ta rcólé né na
12
Waktu ta néi, kyaté-kyaté né tadélé félé, reni caléné ta rwómé se rfajólo si po Yesus ni né, sogado rfasésiséné se rfakteglo sóori. Pocé tabóngo Yesusé nfasodoto si né, nfamdié po ni motemote nesté ni ntubé, se nécegé si faje, “Fpe mew fafié, po kyat Yahudi ta rdéréré dodoto Farisi nesté ni, ma sogado ftalko keé riri tabeat ta lé né na. Sababta rfaftulo po kyaté-kyaté né, cogo si ma rdéréré be Jou Lahatala le, mayta bo témnawé né rlól bóto. Ya kfatailo si né tadolo ragi ta masike cuci le, mayta iga tcapu keé po tarigu lo né, nawété se ndadi pélóyé. 2 Mayta sói ta lé se répiné né, nase kyaté bo runé keé. Re férimé ta répiné né, nase bo ncópéné le, se kyaté-kyaté né nase runé keé ndimé. 3 Bóngo sói ta fépiné mewé se fécegé né, nase kyaté né bo runé keé po kyat ta félé né usnori lo. Re sói ta ffagayaso po kamaré wlólo né ma, nase kyaté né réféténé keé yama um papo lo, bo kyat félé rlongé keé ndimé.”Jou tadélé nmasié kyaté
4 Yesusé nécegé nóté, “Flongé fafié nik dél ta mewé, ma fémtaté kyat na, sababta kyaté né maduga réfené rpuné nimi badané le, mayta iga bo fsung po soroga wlólo né, réfen pa bo rfaketé mewé né. 5 Se nte, Ya bo kfaftulo mewé, pai ta nase mewé bo fémtat i. Mewé mare fémtat maduga Jou Lahatala le. Sababta I ro ta reni kawasa bo npuné nimi badané, bóngo reni kawasa nóté ta bisa nwóté keé mew po naraka wlólo né. Ya kécego mewé, mare fémtat maduga Jou Lahatala le!
6 Coba ftarukira be mané gotolo sélim ta kyaté né rwagé keé si né, mulori né maduga cuci le, mayta Jou Lahatala nuné si, se masike isó le ma nfatolén i pa. 7 Néga bo mewé, se ma fémtaté le na. Sababta mewé mulomi né lebe pélóy po mané gotolo ta rémyaku nesté ni. Sogado nimi uté ta po babokomi lo ma, Jou Lahatala nuné ni féléo.”
Iga bo fdéréré Jou né ma fmóé mew na
8 Tabóngo Yesusé nécegé nóté, “Flongé fafié, ta Ya kécegé nte. Pai ta nécegé nfayal Ya po kyat ta félé né usnori lo, kyaté ntu ta Ya I yama soroga wlólo ma, nase kécegé kféyal i po nik Jou Lahatala ni nénan ta si yama soroga wlólo né usnori lo. 9 Mayta pai ta nécegé nfayal Ya pa po kyat ta félé né usnori lo, Ya ma nase kécegé kféyal i pa, po Jou Lahatala ni nénan ta si po soroga wlólo né usnori lo. 10 Pocé iga reni kyat ta réceg sói néli bo rfakotalé rdé Kyaté Ntu ta Ya I yama soroga lo nte, kyat ta njéi nó sélsólé né nase Jou bisa nféyangésé lesu. Mayta pai ta nfalélé Jou Lahatala ni Rohé njé, nó sélsólé né Jou nase nféyangés pa. 11 Bóngo Iga reni kyat ta ruté mewé bo radili keé mew po kyat Yahudi né riri um sambayangé lo pari, po kyat tut re pemerenta né pari, ma fémtat na sói ta bo fécegé né bo runé ta mewé fsól pa. 12 Sababta po waktu ta néi óro, Jou Lahatala ni Rohé njé nase nfaftulo mew sói ta bo fécegé né.”
Kyat ta renó haréta félé njé nféyal Jou pana
13 Tabóngo po kyat ta félé né, reni kyat isó njé nécegé Yesus faje, “Guru, mécego fténog ta nténlóyé njé bo nfanténé keé am dórén luwé mam déluté nesté róri haréta ta rfatoléné né.”
14 Mayta Yesusé nécegé i faje, “Ee, faftén ta awé, isó ta néftul Ya pa kdadi hakimé po mew ni né, se nase kfanténé mew dórén luwé nómi haréta né pa.”
15 Tabóngo Yesusé nécegé kyat félé ta pocé né, “Fpe mew fafié, ma sogado nómi haréta ta féléo i né, fbósémé né nbungé mew pa. Sababta kyat ité nte rir hidupé né, maduga haréta le pa. Masike rór haréta né félé, mayta nase nfafié rir hidupé né pa.”
16 Tabóngo Yesusé néfétno si adeade isó njé, ni glio faje, “Reni kyat isó, reni renó félé. I nó bété njé ma ni hasilé né ta délé félé, sogado nó gudangé né ma re nbaké ndimé. 17 Tabóngo néceg po wlo wlólo, ‘Ya nte re nak géwgów pana, bo kisno nak téntóném bété né, se ni gléo né nase bo kfapelé keé po sói lo? Nte sói ta nase ya bo kpe?’ 18 Tabóngo nanuta, ‘Ta fié né, kégéné keé nak gudangé né bo kpe ta lebe pélóyé nóté. Pocé nase kisén férimé nak bété ni hasilé, re nak haréta ta iglé né nóté. 19 Rewóré ta néi, ga bo kéceg po ya nik diri óro: Ya nte bo kfasanang ya le, sababta re kiséné naké mnóm félé, haréta iglé ta bisa kpake sogado reni tauné. Se nte bo kó re kinémé naké le.’
20 Tabóngo Jou Lahatala nécegé i faje, ‘E, awé nte muné nim gélesó pa. Sababta po dorém pésénte óro, awé nase bo mmóté, pocé anim haréta né kyat nésé bo nyó nó.’ 21 Ta dolo faje né nase bo ndadi po kyat ta rfajólo be haréta bo maduga si róri rkumélé né. Bóngo sói ta Jou Lahatala nané i né ndéréré pa. Kyat ta njéi nfayal Jou pa se reni ngalé gélesó pa na.”
Fdélé be Jou Lahatala le
22 Tabóngo Yesusé nécegé ni motemote nesté faje, “Ya kécego mewé, ma fawater be nimi hidupé né na, sói ta bo fó re ta bo fpake po nimi badané lo né. 23 Sababta ménimi hidupé né, lebe penting po sói ta mewé bo fó, re nimi badané né lebe penting po kabaya ta mewé bo fpake né. 24 Coba ftarukira mané gokgoké né. Si rfatóném pa, rfalingét pa, bóngo reróri gudang ta bo risno mnóm pa, mayta Jou Lahatala ndo si mnómé. Ga bo mewé! Mewé mulomi né lebe pélóy po si ni! 25 Se iga ngénngan néya fémtat be nimi hidupé né, masike cuci le ma nase bisa famlóngé nimi umuré né? Bisa pa to? 26 Se iga nimi umuré né ma féfené famlóngé pa, ta fié né ma fawateré le na sói bo fó re kabaya ta bo fpake né.
27 Coba ftarukira bunga-bunga ta rtubé né. Si ma rpe yabé pa, bóngo runé pa réringé riri kabaya né. Ya kécego mewé nte bo funé: Tatubé lima kolano Salomo njé reni renó félé, mayta bo tfatailo i re bunga né, bunga né ta lebe fié. 28 Bunga ta ntub po bété lo né ma, Jou Lahatala npalihara re npe fafié. Bunga ta néi maduga ngénngan pésénte le, móné re mlai se rtapéné keé. Jou npalihara bunga né fié, né ga bo mewé! I nase npalihara mewé né lebe fié nóté. Néga fpe sói se fdélé I né maduga cuci le! 29 Se ndél pa bo fémtaté sói néli ta bo fó re finémé né. 30 Sababta, maduga kyaté-kyat ta rdélé Jou Lahatala pa né, ta rémtat be ta néi. Mayta mewé ma fémtat na. Sababta I re nuné ndimé, sói le ta bo fperlu né. 31 Se ta fié né fayówé be Jou Lahatala bo nkawasa po wlomi wlólo. Iga fpe fajé né, sói le ta mewé fperlu né, nase ndo mewé ndimé.”
Yesusé nfasodoto tpe fawa bo tisén haréta né
32 Yesusé nécegé nóté, “Mew ta fdéréré Ya né maduga cuci le, kfatailo mewé né tadolo domba séfis néli ta rfajólo si né. Mayta masike félé pa, ma fémtat na! Sababta nimi moke Jou Lahatala ta nkawasa po farimé mewé né, I ma nase npo mewé nóté. 33 Se fwagé keé nómi haréta né, bo ni pipisé né fpo keé kyaté-kyat ta reriri reróri pa né! Iga fpe fajé, necé ta dolo fisén haréta po soroga wlólo, se nase abis pa né. Po soroga wlólo né, reni kyat ta rmafeléwés pa, bóngo kakaléy ta bo nfajakémé né ma tiso si pocé. 34 Ya kécego mewé, pua ta nómi haréta né pocé, wlomi né ma pocé.”
Jou ni kyat ta rfaléléy si bo rdéréré I né
35 Yesusé nécegé nóté, “Mewé mare faléléyé mew fafié, bo fdéréré be sói ta Jou Lahatala mgo wlo né, kfatailo dolo kyat ta ngénngan néya réngalno si re kabaya bo rfané rpe yabé, iga dorémé résting logaloga bo rpe yabé nóté. 36 Se mewé ma mare fpe ta dolo kyat ta raftóné riri tuangé njé néléy lima fafsówé lo né. Iga dorémé ga néléyé se ntok ngówéné, mare famlale bo répilo I. 37 Pocé iga néléyé ga ndótlé si réftón I lesu, nase tadélé séngséngé bóto si. Ya kécego mewé, I nase néngalno I re kabaya yabé su, ga nané si rtoléné bo rémnómé, pocé I ta bo nléléyané si. 38 Ya kécego mewé: iga riri tuangé njé nwóm dorém fapéluno pari, rebo malówé ga ndótlé si raftón I lésu ta dolo fajé, si nase tadélé séngséngé bóto si.
39 Mayta mewé ma mare fatélolmo mew fafié, reni adeade isó nóté: iga kyat ta ni umé njé nuné ta nfalewésé njé bo ncungé, nase nfamól i pa. 40 Fajé nóté re mewé, mare ffaléléyé mew fafié, sababta Kyaté Ntu ta I yama soroga lo njé, iga bo nwómé nmulé nase po ngénngan ta isó nuné pa.”
Bo Yesusé nwómé nmulé, nase reni ta re rfaléléyé si, re ta rfaléléy si pa
41 Rewóré ta néi, Petrusé nutné Yesus faje, “Jou, adeade ta i péséwé njé mpé i po pai ni? Maduga po am ni le pari, po férimé kyaté?”
42 Tabóngo Yesusé ncóngélé né néfétno si adeade se néceg faje, “Iga reni kyat ta fatuw-fatuwé npe yabé re npande, ni tuangé njé nase nélóngé i bo ndadi kyat tut po férimé ni dél ta i re si nesté, bo néfay si po waktu ta si bo rémnómé. 43 Pocé iga ni tuangé njé nwómé ga ndótlé ni kyat yabé njé npe ni yabé né nmétegélé, ni kyat yabé nje nase séngséngé bóto i. 44 Se flongé fafié ta Ya kécegé nte, nejé ni tuangé njé nase nélóngé i nóté bo nfaménawé férimé nó haréta sói le ta pocé né.
45 Mayta kyat ta npe yabé njé ga ni wlo njé nlé, pocé nase nanuta, ‘Nik tuangé njé nase mnuwé lesu ga néléyé.’ Pocé tabóngo nfaspésé keé kyaté-kyat ta rpe yabé pocé né, i ni món sogado mépiné. Rewóré ta néi, ga némnóm re ninémé nó sogado némse. 46 Mayta télél be ni tuangé njé nwóm po waktu ta isó nuné pa. Iga re nwómé, nase npun i sogado nfamót i. Ta i nduké né, nase nfamgo re kyaté-kyat ta rdélé Jou Lahatala pa né.
47 Pocé iga kyat ta npe yabé njé ga re nuné sói ta ni tuangé njé mgo wlo mayta npe pa, necé nase nduk pénpuné né sogado nbung i. 48 Mayta bo kyat yabé faisó nóté ga nuné ni tuangé njé ni wlo pafule, iga ncólé i ma nase nduk pénpuné mayta cuci le. Sababta kyat pai le ta Jou Lahatala re nfaftulo i sogado nuné re npe félé, nejé mare npe. Re kyat pai ta Jou re nfaftulo i sogado re nuné re npe lebe félé, mare ndéréré re npe né lebe félé nóté.”
Kyat ta rdélé Yesus pa né rfakotalé re kyat ta rdélé I né
49 Yesusé nécegé nóté, “Ya kwóm po dunia nte, ta npe sogado kyat ta rdéréré Ya re ta rdéréré Ya pa né rfakotalé, necé kfatailo dolo ktéo lutén po dunia wlólo. Se ta fié né, luténé njé nbablob i óro! 50 Ya ma nase kduk kangelangéa nóté, se wlegé njé nase tadélé nkangelang sogado rewóré ndimé. 51 Ya kwómé né, ma fécogoma nase kyaté-kyaté né bo rfatut fié na. Sababta kyat iglé nase rdéréré Ya, iglé né ga riri lé keé Ya, se nase rfakotalé. 52 Nte re ndadi i ro, se pote se néli, po um faaysó ga reni kyat fasélimé, pocé sételé né nase rdéréré Ya, séluwé né ga rdéréré Ya pa, se rfakotale. Bo tisé, séluwé nesté rfakotale rdé sételé nesté. 53 Pote se néli, isó re isó nase rfakotale: riri moke njé i re ni ntu móné né, riri neke njé i re ni ntu mépiné né, re kmori mépiné njé i re ni mélófé njé ma, necé nase rfakotalé ndime.”
Ffatélolmo mewé fafié ta Yesusé nécegé né
54 Tabóngo Yesusé nécegé kyat ta félé né, “Iga fémnaw met ta nbaptité njé ga nawét po ngénngané ncepé né, nase féceg faje, ‘Bo félé,’ necé fatuwé félé. 55 Bóngo iga reni moré timélé gaméné njé re nufé, necé nase féceg faje, ‘Pésénte nase bo ngénngané,’ necé nase fatuwé. 56 Necé mewé funé fié bóténé nje bo nfié pari nlé. Mayta mewé nte ffmalólé, sababta ta Jou Lahatala npe po usnomi lo né funé re fsaé, mayta fdéréré pa!”
Ité mare tfafio it re rir réwé né
(Mat. 5:25-26)
57 Yesusé nécegé nóté, “Iga mew re kyaté ffakotale, mare famlale bo féyfio mewé. 58 Sababta iga reni kyat ta récegé mewé fsólé, nase bo ruté keé mew po hakimé lo, se ta fié po yéféné lo lésu re féyfio mewé ro. Sababta iga fpe fajé pa, nase ruté keé mew néli, bóngo rfasungé keé mew po bui wlólo. 59 Se fatélolmo mew fafié, iga mew po bui wlólo, mare fiwéné keé pipis ta rfalutno mewé né, bo tisé nase rcópné mew pa.”