Yesusé nfabingo kyaté-kyaté né bo rngali si
13
Waktu ta néi, reni kyat séfis néli rwómé se rfébingo Yesus ta kyat Galilea séfis néli rfané bo rfatebé riri sadaka po Um Sambayang ta npélóyé njé ni, ga gubernur Pilatusé npuné keé si. 2 Se Yesusé nlongé ta rfébingé né, tabóngo nécegé si faje, “Kyaté-kyat Galilea ta npuné keé si tadolo fajé né, mewé facogoma róri sélsólé né lebe félé po kyat Galilea ta iglé né? 3 Tisé! Mayta Ya kécego mewé, iga fngali mew pa, mewé nase fmót tadolo si né nóté. 4 Reni nóté kyat yófésó re séwal ta menara po Siloamé némopé se nfatóné keé si sogado rmóté. Se mewé facogoma róri sélsólé né lebe pélóy po kyaté-kyat iglé ta si po kota Yerusalemé né? 5 Tisé! Mayta Ya kécego mewé nóté: Iga fngali mew pa, nase fmót tadolo si né nóté.”Adeade ay ta re pyono pa
6 Rewóré ta néi, Yesusé npe adeade isó nóté, ta dolo faje, “Reni kyat isó, po nó bét angguré lo né reni ara aysó. Nuéncó nfané se néyówé ni pyono né, mayta nduk fapusó le ma tisé. 7 Pocé tabóngo nécegé kyat ta néjaga nó bét angguré njé faje, ‘Mémnaw ay ara njé, re taun nuén telé ro kwóm lima bo kéyówé ni pyono né, mayta kduk fapusó le ma tisé. Se ta fié né tcélépé keé i ro, sababta i pocé ma reni ngalé gélesó pa!’
8 Mayta kyaté njé néceg faje, ‘Lawlów su moke, fajé su bo sogado fataun nuéncó su. Wóré ga kpacol néli re lima po ni lapo lo né, ga kpeo re pupuké. 9 Solo maga taun ta tagbono i néli nje, népyoné. Iga népyon pa, ga tcélépé keé i ro.’ ”
Yesusé nfafié mépin isó po ngénngan sabaté
10 Nuéncó, Yesusé nfasodoto po kyat Yahudi né riri um sambayangé lo né mgo po ngénngan Sabaté, po ngénngan ta néi si bisa rpe yabé pa. 11 Pocé reni mépin isó njé, setané nkawasa keé i se npisé sogado npuké ni mnuo taun nuén yofésó re pawalé. 12 Pocé Yesusé némnaw i se nkakém i bóngo nécegé i faje, “Neke, re mfié se mpe gélesó pana.” 13 Néceg fajé rewóré, tabóngo nétewlé fao né néya po mépiné njé ni, se nosélé né re bisa nmalolé né, tabóngo mépiné njé nfatarima kase po Jou Lahatala ni.
14 Pocé kyat Yahudi né riri kyat tut ta i po riri um sambayangé lo njé némnawé se ncawané, sababta Yesusé nfafié kyat po ngénngan Sabaté. Tabóngo nécegé kyat félé ta si pocé né, “Reni ngané wonémé ité tpe yabé. Se iga wlomi bo fié, mare fwóm po ngénngan ta néi óro. Ndél pa bo po ngénngan Sabaté.”
15 Tabóngo Yesusé nécegé kyat Yahudi njé faje, “É, mew ta néi fmalólé! Sababta masike po ngénngan Sabaté, mewé ma fsópné né keé nimi sapi, domba re keledai ta po kandangé wlólo né, se fut si bo fainmo keé si wóé. Necé ni ngale né re fpe yabé! 16 Mépin ta njei ma Abrahamé ni ntu re gbu i, tadolo mewé nóté. Re taun nuén yófésó re pawalé, roh léo ntolno keé i sogado npisé, se gélesó pa bo tfafié i po ngénngan Sabaté né.”
17 Rlongé ta Yesusé néceg fajé né, tabóngo férimé kyat ta ranfakotalé rdé I né, rmóé si. Mayta reni félé nóté ta séngséngé bóto si, sababta ta Yesusé npe né ta délé fié.
Adeade géy pusó ta rtóném i po bété lo
(Mat. 13:31-32; Mrk. 4:30-32)
18 Tabóngo Yesusé nécegé nóté, “Pote se néli, Jou Lahatala nase nkawasa dolo Kolano po ni kyaté-kyaté né. Ta I bo nkawasa si né, bo kfatailo né dolo sói? Necé tadolo adeade isó nje: 19 reni géy pusóa ta nalus se kyaté né ryó i ga rtónémé keé i po bété wlólo. Pocé masike tadélé nalusé, mayta iga ntubé né nase ndadi ay ta pélóy i, se mané ta ranopé né rwómé ga rpe riri pup po ni séngsóngé lo né.”
20 Tabóngo Yesusé nutné si nóté, “Jou Lahatala nkawasa dolo Kolano po ni kyaté-kyaté né, bo kfatailo né tadolo sói? 21 Nase ta dolo mépin ta nyó keé ragi cuci, ga ncapu keé po tarigu liter yóféfóté lo, se nawét sogado tadélé npalóyé.”
Yesusé tadolo ngówén ta bo tcung po soroga wlólo né
22 Rewóré ta néi, Yesusé nfané né nfalów I po Yerusalemé, se nfasodoto kyaté-kyat ta si po kota re pnuw re pnuw ta pocé né. 23 Pocé, tabóngo reni kyat isó nutné I, “Jou, kyat ta bo rduk salamaté né maduga cuci lé?”
24 Tabóngo I nécegé kyaté-kyat ta si pocé né, “Fayówé yéféné bo fsung po ngówén ta némoté njé ni, sababta kyat félé bo rcungé rde pocé, mayta bisa pa. 25 Sababta ta si rwóm néli né, kyat ta ni umé njé re npangéné se nakété keé ni ngówéné njé. Se po waktu ta néi, mewé nase maduga fanosél be po tó néliké se ftoké ni ngówéné njé. Bóngo nase féceg faje, ‘Moke, mépilo am ngówén su?’
Pocé nase ncónglo mew faje, ‘Ya kuné, re kféyalé mew pa.’
26 Tabóngo mewé nase fécegé I faje, ‘Am re Awé né tfadéréré se tamnóm re tinémé, bóngo re mfasodoto am po mam kota njé ni yéfén-yéféné lo né!’
27 Mayta po waktu ta néi, I nase nécegé mew faje, ‘Ya kuné re kféyalé mew pa, se fówés pocé! Sababta mew ta néi ta fpe be ta lé!’
28 Pote se néli, nase fémnaw Abrahamé, Ishaké, re Yakobé, sogado farimé nabi ta si po géwgów ta Jou Lahatala nkawasa dolo Kolano po ni kyat ta rdélé I né. Mayta mewé nase ftangés be po tó néliké, re fbósémé né tadélé kangelangé, sogado ffakékikto be ngangomi né. Sababta nase bisa fsung pocé pa, bóngo rwóté keé mew po tó néliké. 29 Iga dunia nje bo nkiamat óro, nase reni kyaté-kyat ta si po géwgów pua le rwómé. Nase rwóm lima po ngénngané cóo re ngénngané ncepé, si ta néi ta nase rcung pocé bo rtoléné rémnóm po Jou Lahatala góo ta bo nkawasa dolo Kolano po ni kyat ta rdélé I né. 30 Ftarukira fafié, sababta pocé nase reni kyaté-kyat ta po dunia nje ni wlólo nte, ta réngóto si dolo reriri ngale gélesó pa né, si ta néi ta nase bo rtubé, mayta kyat ta réngóto si dolo rtubé né ga, si ta néi ta nase reriri ngale gélesó pa.”
Yesusé nmésié kota Yerusalemé
31 Po waktu ta Yesusé nméiténé lesu né, reni kyat Yahudi séfis néli ta rdéréré dodoto Farisi nesté, rwómo I se récegé I faje, “Ta fié né, mfan Aw po géwgów nésé óro, sababta kolano Herodesé bo npuné keé Awé.”
32 Mayta Yesusé nécegé si faje, “Fané bo fécego kolano Herodes ta nuné akal fié tadolo yaw banga i njé, bo fécegé i faje, ‘Ngénngan pésénte sogado móné, Ya bo kfaungé setan, re bo kfafié kyat ta rpisé lesu. Sogado ngané telé, necé nik yabé né nase rewóré ndimé.’ 33 Se pésénte, móné sogado ga epluwé, Ya mare kfan sogado kwóm po kota Yerusalemé, sababta Jou Lahatala ni nabi njé, mare nmót pocé, bisa nmót po géwgów nésé pa.
34 Arii, sené mewé, kyaté-kyat Yerusalem ta mewé nte! Re fpuné keé nabi-nabi ta rfawómo Jou Lahatala ni faftóté nesté! Mewé re ftéo róri lóy sogado ga ffamóté keé si. Re nuén fis néli, klolémé mewé. Ya bo kfajólo mewé bo lebe férakén Ya, tadolo mané pégelo ta nfajólo ni ntu né se npe keé si po nó naék pópo lo né, mayta mewé wlomi pa. 35 Fatélolmo mew fafié: sababta Jou Lahatala nase nélówé keé nimi kota njé se nbéklingén i, Ya kfatailo i né tadolo um ta isó ntolno pa né. Se Flongé fafié, mewé nase fémnaw Ya pafule, sogado po waktu ta bo kwómé nmulé, ga taga re nase féceg faje, ‘Lima bo ttail I, sababta I nwóm lima nte nut Jou Lahatala ngósno.’ ”