Matius 23

Guru agama re kyat Farisi ta réyówé ngósnori né, ma ftalko si na

(Mrk. 12:38-40; Luk. 20:45-47)

Rewóré ta néi, Yesusé néceg po kyat ta félé né re po ni motemote nesté ni, 2 “Guru-guru agama Yahudi ta runé fié Musa ni kitab abén limé né, re po kyaté-kyat Yahudi ta si lima aliran Farisi nesté, riri yabé né tadolo tatubé lima se nabi Musa ntebo aturan ta po ni kitab abén limé ni ngale po kyaté-kyaté né. 3 Ta mulo né, mewé mare flongé bo fdéréré óro farimé ta rfasodoto mewé né. Mayta ma ftalko ta si rpe né na, sababta masike rfasodoto mewé mayta si rpe pa. 4 Si rpe aturan agama né félé re tadélé météwé, ga rané kyat ta félé né rdéréré, sadangta si rdéréré facuci le ma tisé aturan ta néi.

5 Farimé ta si rpe né, maduga bo rfaséngé si po kyaté le. Necé tadolo riri pétpitén ta rlefo Jou ni méitén po bébokori re po faori lo né rfamsóyé-msóyé. Riri juba ni lawe-lawe né ma rfamlóngé bo kyaté né runé si ta cogo rdéréré Jou fié. 6 Iga rcung po rameang re po um sabayangé lo né, wlori ncuka rtolén si po karapesa ta mare kyat ta rpélóyé né réntolno lo né, po géwgów ta po tó po kyat ta félé né rakbono lo né. 7 Si ma wlori ncuka bo kyaté né horomat si bo kyat ta félé né rkakmé si, ‘Moke guru’.

8 Mayta mewé, ma flomi ncuka bo kyaté né rhoromaté mew sogado rkakmé mew, ‘Moke guru na’! Sababta nimi guru né maduga isó le, se farimé mewé faftén re farémóné. 9 Re ma fkakmé kyat nésé ‘moke na’, sababta nimi Moke né maduga isó le, I ta njéi Moke ta I po soroga lo njé. 10 Bóngo ma sogado kyaté né rhoromaté mewé bo récegé mewé fdadi kyat tut po sini na, sababta nimi Kyat tuté njé, maduga isó le. I ta njé i, Mesiasé, Kolano ta Jou Lahatala néjaji nwómé bo nfasalamaté kyaté njé. 11 Kyat pai ta npélóy po mew ni, njé mare ndadi nimi béyak i bo nleleyané kyat nésé tadolo kyat yabé ta rleleyané kyaté né. 12 Sababta, kyat pai ta nfamóge wlo njé, Jou Lahatala nase ntebo i se tadolo kyat ta reriri ngale gélesó pa né. Mayta pai ta nfamya wlo njé, Jou nase nélóngé i se ndadi kyat ta pélóy i.”

Pai ta ndéréré Jou, mare re wlo ta fatuw-fatuwé

13 Yesusé nécegé nóté, “É, fkangélang óro mewé, guru-guru agama Yahudi ta funé fié Musa ni kitab abén limé né, re kyat Yahudi ta mew lima aliran Farisi né! Mew farimé né fmalólé. Sababta fpe nimi diri dolo fdéréré Jou Lahatala fié, momongo fdéréré ta fatuw pa. Mewé ffasodoto kyat Jou Lahatala ni méiténé né ffabóngo keé re ménimi ta sólé né, se ffaketé keé kyaté kyat ta bo rpo wlori néli po Jou Lahatala ni bo rdadi ni kyat si né. Se mew re si ma fdéréré Jou pa se fdadi I ni kyaté mew pa. Mewé, Jou Lahatala nase bo nfasólé mewé né ta délé météwé.”

[ 14 Guru-guru agama re kyat Farisi ta mewé, fkangelang óro! Sababta férimé né fmalólé. Mewé re flólé keé mépin mépin balo né bo fyó keé riri umé né, bóngo iga bo fméiténé fdé Jou Lahatala né famlóngé bo kyaté né runé ta kyat féyfio mewé bo rtailé mewé, momongo be flólé. Se mewé nase bo fduk sélsól ta délé météwé.]

15 Guru-guru agama Yahudi ta funé fié Musa ni kitab abén limé, re kyaté-kyat Yahudi ta mew lima aliran Farisi né! Fmalólé ndimé. Sababta, fsobél po wolété lo sogado féjel po bótén néli re lima né maduga bo fayówé kyaté bo rdéréré nimi dodoto né, mayta fduk be isó le. Se re ndéréré mewé sogado npe sélsólé né nliwé keé ménómi né nuén luw néli. Se i nase bo ncung naraka.

16 Se fkangelang óro kyat tut kyat tut ta mewé! Mew ta néi, tadolo kyat ta rébyafé se rtuda ta rébyafé nóté! Sababta mewé ffasodoto kyaté-kyaté né, tadolo faje, ‘Kyat pai ta ncasi re Um Sambayang ta npélóyé njé ngósno, sasi ta njé i nase mgo i pa. Mayta bo rcasi po guraci ta po Um Sambayangé njé ni, sasi ta njé i nase mgo si. 17 Mew ta ntei funé nimi gélesó pa! Sababta Um Sambayang ta npélóyé njé i re guraci njé, guraci njé ta reni ngale pa. Sababta Um Sambayang ta npélóyé njé ta npe sogado, guraci ta po ni wlólo njé ma reni ngale ta fié. 18 Dodoto esó nóté ta fasodoto si né ta dolo faje, ‘Pai ta ncasi po sadaka góo lo né, sasi ta njéi nase mgo i pa. Mayta bo ncasi po haiwan ta rtapén po sadaka góo lo né, sasi ta njé ta nase mgo i. 19 Eh, sené mewé, fébyaf re funé nimi gélesó pa. Bo tfatailo haiwan ta tpeé sadaka re ni géwgów ta réntapéné lo né, haiwané njé reni ngale pa. Mayta sadaka góo njé reni ngale ta fié, ta mulo haiwané njé ma reni ngale ta fié nóté. 20 Ta mulo né, bo kyat pai le ncasi po sadaka góo njé ni, necé ncasi po góo njé ni le pa, mayta re ncasi po farimé sadaka re ni góo njé ni ndimé. 21 Fajé nóté bo kyat pai le ta ncasi po Um Sambayang ta npélóyé njé ni, necé ncasi po Um Sambayangé njé ni le pa, mayta re ncasi po Jou Lahatala ta ntolén pocé njé nóté. 22 Fajé nóté bo kyat pai ta ncasi re soroga ngósno, necé ncasi re soroga ngósno le pa, mayta re ncasi po Jou Lahatala ta ntolné ni kawasa po góo njé ni nóté.

23 Eh, guru-guru agama Yahudi ta funé fié Musa ni kitab abén lim re kyat Yahudi ta mew lima aliran Farisi né fkangelang óro! Mewé nte fmalólé ndimé. Sababta, fanpo nimi perpuluhané, sogado nómi rampa-rampa ta délé myaku né ma fpe ta dolo né. Momongo, Jou ni méitén iglé ta lébé pélóy po Musa ni kitab abén limé né ga fdéréré pa. Re mare fpe be ta métegél po kyat pai le, bóngo faftulo nimi mésié né po si ni nóté. Se iga fatuw-fatuw ta fdéréré Jou Lahatala, mare ma ftébné na. Sababta necé ta mare fpe né, ma fpe be ta iglé né na, mayta fdéréré ndimé bo fpo nimi perpuluhané né. 24 Kyat tut kyat tut mew ta mewé né, kfatailo dolo kyat ta nébyafé se ntuda ta nébyafé njé né! Sababta ffasodoto kyat yabé ta myaku, mayta ta Jou Lahatala nané mewé fpe né ga fdéréré pa. Kfatailo ta dolo bobéi ta po nómi wóé lo né, féftaké keé ga finémé nómi. Mayta unta pun lóy ta i po nómi wóé wlólo né ga ftolmé nómi.

25 Eh, guru-guru agama Yahudi ta funé Musa ni kitab abén limé né, re kyat Yahudi ta mew lima aliran Farisi né! Mew ta néi fmalólé ndimé. Sababta iga bo tangóto po tó néliké né tacogo kyat féyfio mewé, momongo po wlomi wlólo né fmalalim re wlomi né tadélé lé ndimé. Kfatailo mewé né dolo kyat ta réusé róri gów re galasé né se po tó njé nberési, po miné njé ga nkakóné ndimé. 26 Kyat Yahudi ta mew lima aliran Farisi né, mew ta néi dolo kyat ta rébyafé né! Se faberesi wlomi wlólo ta lé né su, bo sói ta fpe re ta fécegé né fié ndimé, tadolo tfaberési galas re gówé ni ta po miné né, bo ta po tó néliké né ma nberési.

27 Fkangelang óro mewé, guru-guru agama Yahudi ta funé fié Musa ni kitab abén lime, re kyat Yahudi ta mew lima aliran Farisi né! Fmalólé ndimé. Kfatailo mewé nte dolo kuburé ni po tó ta ttésao re yafé se mfusé, mayta po miné ni wlólo lo né pépu lé re nbékbako be kyat ta rmóté né riri momé. 28 Necé ta dolo mewé se téngóto po tó né dolo kyat ta fmétegél po Jou ni, momongo wlomi wlólo né, tadélé fmalól re lé ndimé.

29 Fkangelang óro mewé, guru-guru agama Yahudi ta funé Musa ni kitab abén limé né, re kyat Yahudi ta mew lima aliran Farisi né! Mew ta néi fmalólé ndimé. Sababta re fakéwelo keé nabi-nabi tatubé lima nesté riri kuburé né se fié ndimé. Re kyat ta wlori métegélé né ma mewé re ffafié keé riri kuburé ni béboko né nóté. 30 Bóngo féceg faje, ‘Iga amé kdótlé mam gélé re gaé tatubé lima ta rpuné keé Jou Lahatala ni nabi nesté né, amé nase kdéréré si pa.’ 31 Mayta masike féceg fajé ma, necé mewé re ffabingé ta fatuwé, mewé ro kyat ta rpuné keé Jou ni nabi tatubé lima nesté, si nturi re gburi né ta mew ta ntei óro. 32 Se ta fié né fpe be ta sólé né le, bo ftalko nimi gele gaé ta tubé lima nesté wlori ta lé se rpe be sélsólé né!

33 Ceh! Mew ta néi kyat léo mewé. Tadolo guw ta nbisa i né. Mew ta néi, kyat léo né riri nturi re kburi mewé, dolo guw ta nbisa i né nturi re kburi né. Se Jou Lahatala nase nwóté keé mew némin po naraka wlólo, se bisa fówés pa na. 34 Flongé fafié. Ya nase bo kané nabi nabi, re kyat ta runé félé né, re guru guru agama Yahudi ta runé fié Musa ni kitab abén limé nesté. Bóngo reni kyat séfis néli ta nase mewé bo fpuné keé si né. Reni iglé nóté ta bo fsalipé keé si, ta iglé né ga si po nimi um sambayangé lo bo waswako róri wólé ta tubo mdalémé né, bóngo reni iglé nóté ta ffajalé si bo fakangelangé keé si po kota faisó ga rfan po kota ta iglé nóté. 35 Se Jou Lahatala nase bo nfasólé keé mewé, sababta nimi gele re gaé tatubé lima nesté re rpuné férimé kyat ta si po dunia njé ni wlólo né, kyaté kyat ta néi rcól gélesó pa. Po faiwóbno né fpuné keé Habel ta wlo métegél po Jou ni njé sogado Barekha ni ntu Zakharia, po lóy ta rputé rpe sadaka góo njé, re Um Sambayangé ta npélóyé njé ni fapéluné né. 36 Flongé fafié ta Ya kécegé nte. Mewé kyaté-kyat ta isémé nte nase bo fduk sélsól ta météwé, sababta fpe be ta lé ndimé.

37 Rewóré ta néi, Yesusé nécegé nóté, “Sené mewé, kyaté-kyat Yerusalem né! Jou Lahatala nané ni nabi tatubé lima nesté rfawómo ni méitén po mew ni, mayta ftéo róri lóy sogado ffamóté keé si. Masike fajé ma re nuén fis néli ro, bo kfajólo mewé bo férakén Ya, tadolo mané pégelo ta nfajólo ni ntu né lima se nobo si po nó naék pópo lo né. Mayta mewé wlomi pa. 38 Se ftarukira fafié, Jou Lahatala nase ntoléné ndé mew pana se nimi Um Sambayang ta npélóyé njé nase béklingéné. 39 Bóngo flongé fafié e, po ngénngan ta ntei ro, mewé nase fémnaw Ya pafule, sogado ni ngénngané re nwómo i ga taga nase féceg faje, ‘Tsuba re tail I, sababta mwómé nte, nut Jou Lahatala ngósno.’”