Lukas
Habar ta Fié ta Lukas nlefo
Méitén ta nfatebé
Habar Ta Nfié njé, ni ngale né faje: kyat ité nte rór sélsólé né félé. Mayta ité rir Jou njé tadélé nmétegél re nbirahi, I renó sélsól pa. Se it ta re tpe sélsólé né, ité rir hubungan re Jou né re mwetésé. Mayta, reni Habar Ta Nfié nje Yesus Kristusé. Yesus Kristusé nwóm po dunia nje né, bo nfasodoto re nfafié kyaté, nmót po salibé lo, rewóré ga npangéné nmulé sogado térélóngé I néya po soroga lo. Rewóré ta néi, nané ni motemote nesté bo rfané rkakémé kyaté-kyat ta po férimé suku ta po dunia nje ni wlólo nte bo rdéréré Jou Yesusé. Se ta Jou ni Rohé njé nwómo si né, réfétno kyat pai le ta ndélé Jou Yesus re npo wlo njé néli po I ni, Jou nase nfayangésé keé nó sélsólé né, re nase npe kyaté njé bo wlo nmétegél po I ni.
Kyat ta nlefo kitab Lukasé nje: Kitab ta njei, Lukasé ta nlefo i. I ta njéi sousou i (Kol. 4:14). I re Paulusé rfaljil fié. Se nuéncó, Lukasé ndé Paulusé nfafané ni yabé ta kedua né (Kis. 16:9-10; 2Tim. 4:11; Flm. 24). Lukasé njé kyat Yahudi i pa, mayta re ndélé Jou Yesusé. I ta njéi nuéncó pafule bo némnaw Yesusé. Mayta reni kyaté-kyat ta rfébingo i, pai Yesusé njé. I ta njé i tadélé néyówé fafié bo nuné férimé ta réfétno i né. Pocé ntoléné ga nlefo se nfarén fafié po faiwóbno ta Yesusé ntub, sogado ta téralóngé I néya po soroga lo né (Luk. 1:1-4).
Légaé Lukasé nlefo kitabé njé po pai ni:: Lukasé nlefo kitabé njé po kyat isó ta ngósno Teofilusé. (Luk. 1:1). Kyat ta njéi iga po Buké wlólo né, dolo tuné i pa, kyat ta njé i pai? Mayta i ta njé nihalé kyat Roma né riri kyat ta palóy i, bóngo nihalé i re Lukas rfaljil fié. Masike fajé ma, Lukasé nlefo kitabé nje po férimé kyaté nóté, ni foloi po kyaté-kyat Yunani ta récegé kyat Yahudi si pa né. Lukasé nlefo kitab ta njé i bo runé ta fatuwé, Yesusé njé Kristus óro, Kolano ta Jou Lahatala néjaji nwómé bo nfayangésé keé kyaté-kyaté róri sélsólé né. Necé tadolo Yesusé nécego Zakheusé né, ta I ni maksuté né I nwóm po dunia wlólo né bo néyówé kyaté-kyat ta re róri sélsól félé né bo nfasalamaté keé si (Luk. 19:10).
Dodoto ta po kitab Lukasé ni wlólo né:: Ta po kitabé njé ni wlólo né, Lukasé re nfarén fafié, méitén ta po faiwóbno, sogado rewóré ndimé. I néféténé né nfamdié po waktu ta Jou ni nénan yama soroga wlólo rwómo Maria, i re Yusufé, re kyaté-kyat ta réjaga domba nesté, re fanfawa ta Jou Lahatala ni Rohé njé npe yabé sogado Yesusé ntubé né (Luk. 1–2). Lukasé néféténé nóté ta Yesusé nfaftén re Yohanes ta nanénbabtisé kyaté njé. Bóngo néfétén ta Yesusé npe mujizaté se nfaungé setan-setané, re adeade félé nóté ta Yesusé néfétno si né. Po Kitab ta njei, Lukasé néfétén fanfawa Yesusé ni mésié ta pélóy po kyaté-kyat ta reriri reróri pa né (Luk. 4:16-19), bóngo fanfawa re mépin-mépin ta rdéréré Yesus sogado ta rgali po I ni yabé ta nfafané lo né (Luk. 8:1-3). Faje nóté, reni kyat tut agama Yahudi ta réyówé yéféné bo rpuné keé Yesusé né. Se Lukasé néfétén ta rgó Yesusé, bóngo radili keé I, mayta ta rpe né nmétegél pa ndimé. Si rcalibé keé I sogado nmóté se rput I, mayta ngané telé né re npangéné nmulé sogado nfaftulo I ni diri néli po férimé ni motemote nesté ni. Rewóré ta néi, tabóngo térélóngé I néya po soroga lo (Luk. 22–24).