Timotiusé ndéréré Paulusé i re Silasé
16
Paulusé i re Silasé rfan po pnuw Derbe re Listra. Rwóm po pnuw Listra né, pocé reni móné mya isó ta nénéndéréré Jou Yesusé ni dodoto né, ngósno Timotiusé. Ni Neke kyat Yahudi i, i ma re ndélé Jou Yesusé, mayta ni moke kyat Yahudi i pa, kyat Yunani i. 2 Kyat ta rdélé Jou Yesus po Listra re Derbe né rfayal i fié ndimé. 3 Pocé Paulusé nécego Timotiusé, “Amé nte bo kfané, kfafan Jou Yesusé ni yabé nóté. Se ta fié né awé mdé amé, mayta mare ksunat aw su. Bo tisé, kyat Yahudi po géwgów ta bo tfanolo né, nase ryó ni ngale se rcawan ité. Si runé nim moke kyat Yunani i, se bo tcunat aw pa, nase rlongé it pa.” Bóngo si rcunat Timotiusé. Re rcunat i rewóré, 4-5 tabóngo si rfané. Ta rfané né, rut surata ta kyat ta rénut Jou Yesusé ngósno re penatua jemaat rpe i po Yerusalemé. Se Paulusé i re Silasé rfan po pnuw re pnuwé né, rfawómo si surat ta njéi. Kyat ta rdélé Jou Yesus po pnuwé-pnuw ta néi, rlongé suraté njé ni wlólo né, tabóngo rbóng ta rdélé Jou Yesusé, re étné be ngénngané, kyat ta tagare rdélé Jou Yesusé né ma cuci i pa.Jou nané Paulusé nfan po pnuw Makedonia
6 Rewóré ta néi, Paulus i re Silas re Timotiusé bo réfétén Jou ni méitén po pnuwé pnuw ta po bótén Asia bo si ma rdélé Jou Yesusé nóté, mayta Jou ni Rohé njé npo si fié pa, se si rdé néli bótén Frigia re Galatia. 7 Si rwóm po bótén Misia re bótén Bitinia ni fapéluné né, pocé bo rcung po Bitinia, nópé ga Jou Yesus ni Roh njé npo si fié pa nóté, se rfan pocé pana. 8 Se rwetés si néli Misia, rcópén nélaw po pnuw Troasé. 9 I ni dorémé né, télél be Paulusé némnaw dolo légaé isó i lima Makedonia, nénosél i néya, ga nécegé i, “Paulusé, aw lima bótén Makedonia nte su, bo mgali amé se.” 10 Paulusé némnaw ta néi rewóré ga néfétno amé, bóngo amé kfalécego, “Ah, kyat Makedonia nesté, Jou Lahatala re nkakém ité bo téfétno si ni Habar ta Fié né nóté, né Jou Yesusé.” Pocé bóngo amé kbablé kéyówé yéféné, se kfan néli po Makedonia.
Lidia nngali i se, ndélé Jou Yesusé
11 Pocé bóngo amé keé Troasé ga ksobélé kfalów nélaw po wéf Samotrake. Ni tómémóné né, kwóm po bótén Makedonia, kdime nélew po pnuw Neapolis, 12 tagare klongén am nélew po pnuw Filipi. Po bótén Makedonia né, i ni pnuw ta npélóyé njé, pnuw ta nejéi. Kyat Roma né ma rkawasa pocé. Amé ktolén pocé ngané fis néli.
13 Amé klongé reni géwgów esó ta kyat Yahudi né rérénsambayangé, rfapélóy Jou Lahatala ngósno pocé. Géwgów ta njéi po wóé isó lapo lo. Po ngénngan Sabtu né, ngénngan ta kyat Yahudi né rérénsambayangé, pocé amé ksópén po pnuwé njé ni isa ni ngówéné gbono lo, bóngo kfan néli po wóé njé ni, po géwgów ta rérénsambayangé lo né. Néli, amé kéntoléné kméiténé kdé mépin ta rfajólo si pocé né, kéfétno si Jou Yesusé. 14 Pocé fajé né reni mépin isó ta nlongé am fié, ngósno Lidia. I ni yabé né nwagé ngalép hungé, ta i ni mulo né pélóyé. I kyat Asia i, ni pnuwé njé ngósno Tiatira, i ma ndélé Jou Lahatala. Pocé Jou npo i wlo né ta fié, se ta Paulusé nécegé né ta délé mgo wlo, tabóngo ndélé ni Jou Yesusé. 15 Pocé Bóngo rbaptis i, i re ni dél ta po ni um wlólo né ndimé. Rewóré ta néi, mépiné njé nyanget am, néceg ta, “Bo mew funé ta ya fatuw-fatuwé kdélé Jou Yesusé, mew lima bo ftolén po ya ni su.” Mépiné njé nkakém amé né nuén fis néli, bóngo amé ma ktolno i.
Kyaté né rgó Paulus i re Silas po pnuw Filipi, rfasung si po bui lo
16 Pocé po pnuw Filipi reni mépin isó, ndadi kyaté né riri beyak i. Mépin ta njéi, roh léo ntolno i, se nénénfayalé kyaté, nfabingo si sói re sói ta bo ndadi i po si ni né. Se kyaté né rané i, tabóngo rpe riri tóbe né cuci i pa. Mayta tóbe ta néi, mépiné njé ni pa, kyat ta rpe riri beyak i né ryó riri, mépiné njé ga nduké ni gélesó pa. Nuéncó amé kfané kekentélmé agama Yahudi né riri sambayang góo njé, 17 tabóngo am re mépin njé kfabdipéné. Mépiné njé ndéréré am re Paulus néli re lima, re nfayal amé, tabóngo n-gélay faje, “Kyat ta nesté si rfafan Jou Lahatala ni yabé né. I ro ta npélóy po farimé po langét re bétbété. Si rwómé nte né, réfétno mewé bo fduké nimi salamaté.”
18 Mépiné njé ntéptubo amé né re ngané fis néli ro. Masike ta i nécegé né fatuwé, Paulusé nlongé né i ni lé, roh léo ntolno mépiné njé se. Pocé bóngo Paulusé négiwé i néli mépiné njé ni, ga nécegé roh léo ta ntolno mépiné njé, “Ya kut Jou Yesus ngósno, se ya kané awé nte, msópén pocé po mépin ta njéi ni.” Tabóngo roh léo njé ncópén i.
19 Kyat ta riri beyak mépiné njé né, si rémnaw ta néi, tabóngo rfalécego, “Alli, dél ta mewé, pana fajé ité nase tduk pipis pana!” Pocé tabóngo rgó Paulusé i re Silasé, rfaéyaysé si néli po pnuw fapéluno lo né, bo rkélak si po kyat ta rkawasa pocé fajé né. 20 Néli, régbono kyat ta rkawasa nesté, bóngo re récegé, “Kyat Yahudi nesté rwóm lima nte ga, rfarwaé riré pnuwé nje né! 21 Si rané ité tdéréré riri adaté né, mayta nfalcól re ité rir hukumé né. Bo tdéréré ta si récegé né, nase rir pemerintah Roma ncawan ité.”
22 Kyaté né rlongé ta néi, bóngo re rcawané, néli ta rfanpuné si. Kyat ta rkawasa nesté rané riri kyaté né, rfawgawsé Paulus i re Silasé riri kebaya né re résólé keé, bóngo rané tentara né rfaspésé si. 23 Rfaspésé si né sogado rbos re rpik ndimé. Rewóré ta néi, rfaftófé si némin po bui wlólo. Bóngo re rané kyat ta néjaga bui njé, “Mfaménawé si fafié, mati na ga rówésé.” 24 Jojaga njé nlongé ta néi, bóngo re nétóf si némin po bui ni fapéluné, ga npitno si rante. Po sóori lo né ma nelótfo keé re balak ay luwé.
25 Ta re bo dorém fapéluno né, Paulusé i re Silasé rénméiténé rde Jou, rénnyani riri, rfapélóy Jou Lahatala ngósno. Kyat sélsól ta si po bui wlólo né ma, rfaméylongé. 26 Télél be ga mpe nim suy isó ta némya i pa, sogado bétbét ta po bui wlólo né ma n-géwgiwe ndimé. Tabóngo re bui ni ngówéné né tepile ndimé, rante ta rpitno kyat sélsólé nesté ma téfsalé ndimé. 27 Pocé jojaga njé tésib i néya, ga némnaw bui ni ngówéné né tepil ndimé, ga nécegé, “Tabeu, kyaté nte re rówés si ndimé!” Bóngo netóbe be ni yété njé néya, bo netepese keé ni diri. 28 Nópé ga Paulusé n-gélao i, “Alli, ma metepese nim diri na! Am pocé ndimé.”
29 Bóngo re jojaga njé nécegé ni kyaté né, “Eh, logaloga njé, fut i lima su.” Si rut logaloga njé néli, bóngo i ncéreré némin po Paulusé i re Silas ni. Néminé, i némnaw Paulus i re Silasé si pocé ndimé. Pocé jojaga njé némtaté, bóngo nétig nópé ncuba si, 30 rewóré ga ncópné si nétó bui njé ni um pótno lo ga, nutné si, “Légaé ta mewé, ya nte bo kpe fawa bo sogado kuné nimi Jou njé, bo ya ma kduké nik salamaté?”
31 Bóngo si rcónglo i, “Awé mare mdélé Jou Yesusé bo mduké nim salamaté, aw re nim dél ta si po nim umé wlólo né.” 32 Pocé Paulusé i re Silasé réfétno si Jou ni méiténé, bo rdélé Jou Yesusé. Jojaga njé i re ni dél ta po ni um wlólo né rlongé ndimé. 33 Rewóré ta néi, jojaga njé nut Paulus i re Silasé néli, se nfaéuse riri yobété né. Pocé bóngo i re ni délé nesté rbaptis si ndimé. 34 Rewóré ta néi, jojaga njé nut si néya se ncungé si po ni umé lo, nfapelé wlu né se rémnómé róri. Légaé njé i re ni dél ta po ni umé wlólo né, séngséngé bóto si, tagare rdélé Jou Lahatala se.
35 Ni tómémóné né, kyat ta rkawasa po pnuwé lo né rané riri polisi né néli po bui lo. Rfan pafule récego si, “Eh, fécego jojaga njé, bo légaé séluwé nesté, ncópné keé si ro.”
36 Se polisi nesté rfan néli rfabingo jojaga njé, tabóngo i ma nfabingo Paulusé, “Légaé, kyat ta rkawasa né rané ya kfasópné mewé, se fsópéné ro. Légaé ta mewé, ffan fafié!”
37 Paulusé ga négiwé i néli polisi nesté ni, bóngo nécegé si, “Wóré! Kyat ta rkawasa nesté rduké mam sélsól pa, né ga rfaspésé am po kyat ta félé né usnori lo, bóngo re rfasung am po bui lo nóté. Amé nte kyat Roma amé, se ndél pa bo rpe am fajé. Ité rir hukumé né npo fié pa, bo rpe am fajé né. Nópé ga rané kyat nésé rcópné amé né? Nécé rpeé be pénpiné, bo kyaté né runé si na. Jolosi ga kyat ta rkawasa nesté ro, rwóm lima, bo rcópné amé!”
38 Polisi nesté réléy néli po riri kyat ta rkawasa nesté ni, se rfabingo si. Si rlongé ta Paulusé i re Silasé ma kyat Roma si né, tabóngo récegé, “Tabeu, se légaé nesté kyat Roma si-ó? Alli, ité nte, nase rkélak ité!” 39 Pocé bóngo kyat ta rkawasa nesté rfan néli po bui lo, se rfaféwaso po Paulusé i re Silas ni. Rewóré ta néi, rcópné si po bui lo, bóngo rané si, “Fsópéné mew po pnuw ta njéi ni su.” 40 Tabóngo Paulusé i re Silasé rcópén si po bui lo. Rcópén po bui lo rewóré, rfan néli, rtilé po Lidia ni umé lo. Pocé rdipéné riri dél-dél ta rdéréré Jou Yesusé né, rfasungo si méitén ta fié, ta ni ngale nópé né faje, “Fdéréré Jou Yesusé le, ma ftébné na.” Bóngo re rcópén si po pnuw ta njéi ni.