Yesusé nmóté npangéné
28
Ngénngan Sabaté re télapésé, mgo po ngénngan minggu. Ngénngané njé tagare bo ncó né, Maria kyat Magdala njé, i re Maria ta iglé né, rfané bo réflengén Yesusé ni kuburé njé.2 Télél be ga suy ta pélóyé. Ga réngóto, Jou Lahatala ni nénan isó ntebé yama soroga, nfalilese keé lóy ta i po kuburé gbono lo njé, se néntolén I po lóyé njé pépo lo. 3 Usno né ménano dolo lémlémé. Ni kabaya njé ma tadélé némfusé ndimé. 4 Tentara ta réjaga pocé né, rémtaté rémnaw i né, se rwéwewé, sogado terfabóy si nóp dolo kyat ta rmóté.
5 Pocé Jou Lahatala ni nénané njé nécegé mépiné nesté, “Ma fémtat na. Ya kuné, mewé féyówé Yesus ta rsalib I njé. 6 Mayta tiso I pote, I re npangéné nmulé, ta dolo tatubé re nécego mewé né. Lima fsung néminé bo fémnaw góo ta rfabóy I lo né. 7 Nte, famlalé fpóléné mewé ro, bo fébingo ni motemote faje, Yesus ta nmóté njé re npangéné nmulé. Se re ntubé po bótén Galilea.’ Se fatélolmo é, férimé ta Ya kécegé nte!”
8 Pocé tabóngo mépiné nesté rfatoléné keé kuburé njé. Rémtaté rémtaté, mayta tadélé séngséngé bóto si. Se rcéreré né rbable bo rfébingé férimé né po Yesusé ni motemote nesté ni.
9 Fajé-fajé, po yéfén fapéluno, Yesusé nwómo si bóngo nécegé si faje. “Nimi tabea. Tabóngo rférakné si néli po Yesus ni se régbi sóo né bóngo rcuba I. 10 Pocé, Yesusé nécegé si faje, “Ma fémtat na. Ffan néli bo fébingo ftenog re rémag ta rdélé né, fécegé Ya re kpangéné nmulé se bo ktubé néli po Galilea, ntéli ga nase rémnaw Ya.”
Kyat tut ta rkawasa po Agama Yahudi né rpólso tentara né bo récegé Yesusé npangén pa
11 Po waktu ta mépiné nesté si yéféné lo lesu né, tentara-tentara ta réjaga Yesusé ni kuburé njé rfan néli po kota Yerusalemé. néli ga rfébingé po agama Yahudi né riri imam-imam ta rpélóyé né ni férimé ta re ndadi i né.
12 Tabóngo imam ta rpélóyé né re kyat tut-kyat tut po agama Yahudi né rfajólo si se rfalécego ta bo rpólso tentara nesté bo ma réfétén néli re lima na. 13 Se récego si faje, “Iga reni kyat ta rutné mewé, féceg faje, Dorémé lo ta amé kyénéfé né, Yesusé ni motemote né rlewésé keé ni Mayaté njé.’ 14 Bóngo iga gubernur Pilatusé nlongé ta néi, ma fémtat na, nómésta amé kméiténé kdé i, bo ma npe mew gélesó na.”
15 Rewóré ta néi, nesté ryó pipisé né, bóngo rfané réfétén ta dolo rfaftóto si né. Necé ta mulo ga habar ta njéi kyat Yahudi né re réfétén néli re lima sogado ngénngan pésénte né.
Yesusé nfaftóto ni motemote nesté bo rut Ngósno né
16 Yesusé ni motemote yófésó re isó nesté, rfan po Galilea, po métét isó ta Yesusé nané si nfano i njé. 17 Re rwómé ntéli faje, néga rémnaw Yesusé, tabóngo rcuba I. Mayta po si dórén yófésó re isó né, reni séfis néli ta dolo bo rdélé pafule ta fatuw- fatuw nejé Yesusé.
18 Pocé Yesusé nérakén si néli, bóngo nécegé si faje, “Kawasa ta po soroga re po dunia njé ni wlólo né re po Ya ni ndimé. 19 Se nte ffano kyat po férimé bangsa né bo rdadi Ya niké kyat si ndimé. Bóngo fbaptis si, bo rfaftulo ta si re rdéréré rir Moke Jou Lahatala, re Ntu Ya, re Jou ni Rohé njé. 20 Bóngo ffasodoto si bo rpe farimé ta Ya re kané mewé né. Ffatélolmo mewé fafié, Ya nase kdéréré mew sogado ga fajé néli le.”