Adeade kyat ta rpe yabé po bét angguré lo
20
Yesusé nécegé nóté, “Jou Lahatala njé nkawasa dolo Kolano I, kfatailo né dolo adeade isó nje. Reni légaé isó ta renó bét angguré. Se rebo malówé néya lesu re ncópéné se néyówé kyaté bo rpe yabé po nó bété njé ni. 2 Po waktu ta re nduk kyat séfis néli né, tabóngo i re si rfalécego yabé né mulo, ngané esó kyat isó pipis salaka pusó. Si rcónglo i, ‘Iya, bóngo rfan néli bété lo se rpe yabé.3 Nihalé tok nuén popét tamamóné né, légaé njé nfané nóté po pasaré lo. Néli faje, némnawé kyat séfis néli réntolén si po pasaré lo re riri yabé gélesó pa se. 4 Bóngo nfano si néli se nécegé si faje, ‘Iga re nimi yabé gélesó pa, ta fié fpe yabé po nak bét angguré lo, ya nase kpólso mewé né ftéwtéwno ya pa. Pocé rlongé ta néceg fajé né tabóngo rfané se rpe yabé po bét angguré lo né. 5 Néli faje, nihalé tok nuén yófésó re nuén luw, ngénngané nfapéluné né, re tok nuén tel mérimé né légaé njé nfan po pasaré lo néyówé kyat ta bo rpe yabé po nó bétélo nóté npe tadolo péséwé né. 6 Rewóré ta néi, nihalé re tok nuén lim mérimé né, ncópéné nóté se némnaw po pasaré lo né reni kyat iglé ta re riri yabé gélesó pa nóté. Pocé nfano si bóngo nutné, ‘Pe sói se nganesó wlólo nje ga fpe yabé pa se fanwosélé mew be pote?’
7 Bóngo si rcónglo i, ‘É, amé nte isó ta npo am yabé pa se fanfaje amé le.’
Pocé tabóngo nécegé si faje, ‘Pana fajé, ffané bo fpe yabé po nak bét angguré lo se.’
8 Bóngo ta rebo dorémé né légaé njé nécegé ni mandoré njé faje, ‘Mkakémé kyaté-kyat ta rpe yabé né, bo mpólso si ro. Kyat ta rcungé rpe yabé réisémé nesté mpólso si ntubé, ga tagare ta rcung ngénngané nfapéluné né, rewóré ga tagare ta rcung tamémóné nesté.’
9 Pocé kyat ta rpe yabé réisémé nesté rwómé, bóngo npólso si kyat isó pipis salaka pusó. 10 Po waktu kyaté-kyat ta rpe yabé ta tamémóné lesu nesté rwómé ryó riri pipisé né, si ranuta, ‘Ité nase tduk pélpólés lebe pélóy cuci, sababta ité tpe yabé ntubé se.’ Momongo, si ma rpólso si né kyat isó pipis salaka pusó, dolo ta iglé né nóté. 11 Waktu ta ryó rori pélpólésé né ta délé rtawtéwno légaé ta nó bété njé. 12 Se réceg faje, ‘Tuangé, bisa mpe fajé pa, pe sói se kyat ta rcungé rpe yabé réisémé né, maduga tok nuéncó le. Mayta róri palpólésé né nfamgo re amé, padahal ta amé kpe yabé né re météwé, tagare kafeé am tamémóné sogado mérimé.’
13 Mayta légaé njé nécegé riri dél ta isó njé faje, ‘Deko, ma msawan na, ya ksól po aw ni pa. Sababta ta faywóbno né ya kécegé bo kpólso aw pipis salaka pusó, mayta awé msóngél iya. 14 Se ta fié né, fpe yabé rewóré se myó nim pipisé né mséngé bo méléyé ro]. Mayta ya mare kpólso kyat ta réisémé né tadolo awé nóté. 15 Sababta necé ya nik pipisé. Se bo kfarén fawa le, ndé po ya ni? Ya wlegé fié po si ni, se ni hale mtélengén si né.’
16 Yesusé nécegé nóté, “Po adeade njé le ité bisa tuné, kyat ta réisémé né nase bo rtubé, ta rtubé né ga nase bo réisémé.”
Yesusé nfabingé ta nase bo nmóté né re nuén telé ro
(Mrk. 10:32-34; Luk. 18:31-34)
17 Nuéncó Yesus I re ni motemote yófésó re séluwé nesté rfan néya po kota Yerusalemé. Se po yéfén fapéluno lesu, bóngo nkakémé ni motemote nesté se rfara si néli cuci ga nécegé si faje, 18 “Flongé é! Nte bo tfan néya po kota Yerusalemé. Ntéli nase rgó , kyat ta I yama Jou Lahatala ni njé, se rut I néli po imam-imam ta rpélóyé, re guru-guru agama ta runé fié Musa ni kitab abén limé nesté ni. Néli, nase sumori be esó ta récegé I mare kmóté. 19 Se nase rpo keé I néli po kyaté-kyat ta Yahudi si pa né, bo rfaméymóy I re réswako nó wólé ta tubo mdalémé né, gataga re rpaku keé I po salibé lo sogado nmóté. Mayta télapés néli ngané telé le, nase re npangéné nmulé.”
Iga bo tpélóy po farimé Jou ni kyaté né, mare tdadi béyak po farimé kyaté
(Mrk. 10:35-45)
20 Rewóré ta néi, Zebedeusé ni pégelé, i re ntu Yakobusé re Yohanesé, rfan po Yesus ni. Néli bóngo pégelé njé nétig nóp po Yesus usno lo né, se ncuba I bo réror gélesó po I ni.
21 Bóngo Yesusé nutné pégelé njé, “Neke, bo méror sói?”
Bóngo pégelé njé ncónglo I, “Guru, kéroré bo pote se néli, iga re mdadi Kolano se mtolné nim kawasa né, mané ntigé nesté bo rtolén po Nim faspalé, faisó i po nim faspal wónéyé, faisó po nim faspal balété.”
22 Yesusé nlongé ta néi, tabóngo nécegé si faje, “Ta mewé féroré né, funé ni ngale pa. Iga bo ftoléné fdé Ya, mare ffiném wóé ta nmaréy ta dolo Ya bo kinémé nte. Féfené, mewé?”
Si rcónglo I, “Iya amé kéfené?”
23 Pocé bóngo Yesusé nécegé si faje, “Fatuwé, mewé nase finém wóé ta nmaréy ta dolo Ya nase bo kinémé né. Mayta pai ta bo ntolén po nik faspal wónéy pari faspal balété né, necé Ya pa ta bo kfaréné né. Mayta nik Moke njé, ta bo nfasadia kyaté kyat ta I re npili si né góori.”
24 Waktu Yesusé ni motemote ta iglé né rlongé riri dél séluwé nesté riri réroré né, tabóngo ta délé wlori piso si. 25 Pocé Yesusé nfajólo si lima ndimé, bóngo nécegé si faje, “Mewé re funé, kyaté-kyat ta rkawasa ta si lima bangsa-bangsa ta rféyal Jou Lahatala pa né rkawasa keé riri bala re kawasa né, fajé nóté kyat ta rpélóy po si ni né, rfasoyabé kyaté555 né ta délé météwé! 26 Mayta mewé, ma ftalko si na! Sababta iga bo tdadi kyat ta pélóy po Jou Lahatala ni né, mare tfamya ité, bóngo tatan-gali kyaté. 27 Fajé nóté, iga pai ta bo npélóy po farimé Jou ni kyaté né, mare ndadi béyak po farimé kyaté. 28 Necé ta dolo Kyaté ntu ta I yama Jou Lahatala ni njé, nwóm po dunia nte ni wlólo né bukan ta kyaté rdadi béyak po I ni pa, mayta I ta bo ndadi béyak po kyaté, bóngo nase npo ni diri bo rpuné keé I, bo npólésé kyat ta félé róri sélsólé né bo rduk salamaté.”
Yesusé nfafié kyat séluw ta rébyafé nesté
(Mrk. 10:46-52; Luk. 18:35-43)
29 Waktu ta Yesusé I re ni motemote nesté rfané se rcópén po kota Yerikho né, reni kyat félé ta rdéréré si. 30 Se pocé fajé reni kyat séluwé né rébyafé se réntolén si po yéfén lapo lo né. Se rlongé ta Yesusé nwetco pocé né, tabóngo rgélayé, “Moke, kolano Daudé ni ntu re gbu ta Awé, masié amé nte!”
31 Se kyat ta félé né rlongé si rgélayé né, rcawané se réceg faje, “É, ffaténgténgén mewé, ma fpe gégliné na!”
Si ga ta délé rbóng ta rgélayé, “Moke, kolano Daudé ni ntu re gbu ta Awé, masié amé nte!”
32 Pocé tabóngo Yesusé nwoslé, se nkakém si lima bóngo nutné si, “Fkakém Ya né bo féror sói?”
34 Yesusé nlongé ta réceg fajé né tadélé nmasié si, se nétané mtóri né tabóngo ta néi ro, re bisa rémnawé. Rewóré ta néi, bóngo si ma rfané rdéréré Yesusé nóté.