Waktu ta Yesusé ncung po kota Yerusalemé né, farimé kyaté rcéngé I
21
Waktu ta Yesusé I re ni motemote nesté re rérakén po kota Yerusalemé, se re rwóm po pnuw Betfage ta po Métét Zaituné né. Bóngo Yesusé nané ni motemote séluwé, 2 se nfaftóto si faje, “Ftubé néli po pnuw ta tagbono i njé ni. Néli, nase fémnaw keledai pégelo isó i re ni ntu njé rpitné si pocé. Fésupété riri wólé né bo fut si lima po Ya ni nte. 3 Bo reni kyat ta rutné mewé, fécegé si faje, ‘Jou bo npake si.’ Iga re npake si pana, ga tagare nfamul si lima nmulé.’ ”4 Ta mulo Yesusé nané ryó keledai é né, sababta tatubé lima lesu Jou Lahatala re nécegé rewóré ta bo ndadi i né. Se ni nabi né re nlefo po ni Buké wlólo né, ni glio faje,
5 “Ffabingo kyaté-kyat ta rtolén po pnuw Yerusalem, ta kyaté rfangósno Sioné né bo féceg faje: ‘Coba fémnawé,
‘Nimi Kolano njé re nwóm po mew ni,
I nuné pa bo nfamóge wlo né.
Se maduga ncaplo ni keledayé ni ntu isó.’ ”a
6 Rlongé ta néi rewóré, tabóngo Yesusé ni motemote séluwé nesté rfané se rpe ta dolo Yesusé nané si né. 7 Néli tabóngo ryó keledai pagelo njé i re ni ntu njé se rut si lima po Yesus ni. Lima ga ryéfo tóori né re riri juba né tabóngo Yesusé ncapél néya po keledai é lo né. 8 Waktu ta Yesusé ndé po yéféné lo né, kyaté né ta délé félé résaéne riri juba né nóp yéfén papo lo né. Reni Iglé né ga rfatwetcé ay séngsóngo né se résyapé nóp yéféné lo bo Yesusé ndélo pocé. 9 Kyat félé ta rdéréré Yesusé né, iglé réntubé, iglé réismo I bóngo rarén, gagélay faje,
“Jou Kolano, ksuba Awé.
Aw ta mdé lima kolano Daudé ni ntu re gbu.
Mwómé nte mut Jou Lahatala
ngósno,
se amé ktail be maduga le!”
10 Waktu ta Yesusé re nwóm po kota Yerusalemé né, férimé kyat ta pocé né rkayówéné se rfatuténé, “Kyat ta njé pai?”
11 Tabóngo kyat ta félé né rcónglo, “Nejé Yesusé, Nabi ta I lima Nazaret po bótén Galilea njé!”
Yesusé nfaungé kyat ta rakalé kyat po Um Sambayang ta npélóyé njé ni mabe lo né
(Mrk. 11:12-19; Luk. 19:45-48)
12 Rewóré ta néi, Yesusé ncung néli po agama Yahudi né riri Um Sambayang ta npélóyé njé ni mabé lo né. Pocé reni kyat félé ta rfalwagé re rfalgoné, se Yesusé némnaw si bóngo ncungé néminé se nfaungé keé si ndimé. Bóngo nfalpólné keé kyat kyta ta rénlal pipisé nesté riri meja meja né, re ta rwagé mané pombo né riri bangko bangko né. 13 Bóngo nécegé kyaté-kyat ta pocé né, “Po Jou Lahatala ni Buké wlólo né, rlefo faje, ‘Ya nik Umé njé, géwgów ta kyaté né bo rméiténé rdé Ya. Mayta mewé ga fpeé keé i géwgów ta fépiné mewé bo fakalé kyaté né!’ ”b
14 Rewóré ta néi, kyaté-kyat ta rébyaf re ta rkafé né rwóm po Um Sambayang ta npélóyé njé ni mabé lo né. Se Yesusé nfafié keé si. 15 Mayta waktu imam-imam ta rpélóyé né, re guru-guru agama Yahudi ta runé fié Musa ni kitab abén limé nesté rémnaw ta Yesusé nfafié keé kyaté-kyaté né tabóngo rcawané. Pocé rlongé ta yomya-yomya né rtail Jou Lahatala se rgagélayé, “Hosana! Tail I kolano Daudé ni ntu re kbu I nje!”, Bóngo re rcawané nóté. 16 Se récegé Yesus faje, “É, mlongé pa, ta yomya-yomya né récegé né?”
Bóngo Yesusé ncónglo, “Klongé. Se mewé fbaca pafule, ta Jou Lahatala néceg po ni Buké wlólo ta ni glio faje, ‘Jou re nfasodoto
‘Yomya-yomya ta rgélól re ta rémyaku lesu né bo rtail I,’ ” Se nete ta re ndadi i né.’ ”c
17 Rewóré ta néi, Yesusé nfatóléné keé si pocé. Se ncópén po kota Yerusalemé, bóngo nfan néli po pnuw Betania, se nyénfé I dorém esó pocé.
Bo tdélé ta fatuw-fatuwé, sói le ta téror po Jou Lahatala ni né, nase ndadi i ndimé
(Mrk. 11:20-26)
18 Ni tamémóné né, Yesusé I re ni motemote nesté rpólén si néli nmulé po kota Yerusalemé. Ta nénfan néli né, nbósémé ntélóté. 19 Né ga némnaw reni ay ara isó po yéfén lapo. Tabóngo nfan néli se néyówé ni pyono né, mayta nduk fapusó le ma tisé, maduga ni wlu bóto. Se pocée bóngo nécegé ayé njé faje, “Awé nase mapyon pana sogado fajé néli le!” Po waktu ta néi óro, ayé njé némlayé se nmót i.
20 Waktu ta Yesusé ni motemote nesté rémnawé né rfawgiwé bébokori, bóngo rutné Yesusé, “Tabeu! Pe sói se ga ayé njé télél be nmót i?”
21 Tabóngo Yesusé nécegé si faje, “Ya kécego mewé, iga fdélé Jou Lahatala ta fatuw-fatuwé, taga wlomi né ma nfatutén pa, mewé nase ffadadi ta dolo Ya kpe po ayé njé ni né, necé le pa. Mayta mewé ma nase féfené fécegé métété njé, ‘Terélóngé awé bo tertéo aw nélaw po wolété lo!’ Necé nase ndadi i. 22 Re, iga fdélé ta fatuw-fatuwé, sói le ta mewé féror po Jou Lahatala ni né, nase ndadi i ndimé.”
Agama Yahudi né riri kyat tut ta rkawasa né rutné Yesusé, “Ta mpe po um sambayangé lo né, pai ta nané Awé?”
(Mrk. 11:27-33; Luk. 20:1-8)
23 Pocé re rwóm po Yerusalemé, tabóngo Yesusé ncung némin po Um Sambayang ta npélóyé njé ni mabé lo né, se nfasodoto kyaté-kyat né. Se waktu ta Yesusé nfasodoto né, imam ta rpélóyé né re agama Yahudi né riri kyat tuté nesté rwóm néli se rutné I, “Ta féléo ta mpe nte, pai ta nané Awé? Pai ta npo Aw fié?”
24 Tabóngo Yesusé nécegé si faje, “Ya ma bo kutné mewé. Mare fsóngél sói Ya kutné mewé nte, gatagare Ya ma nase kfébingo mewé pai ta nané Ya sogado kpe férimé ta néi né. 25 Wóré fébingo Ya. Ta Yohanesé nbaptisé kyaté né pai ta nané i? Jou Lahatala pari, kyaté ta rané i?” Rlongé ta Yesusé néceg fajé né, tabóngo rfalécego, “Iga ité técegé Jou Lahatala ta nané i, I nase nécegé it faje, ‘Néga fpe sói se fdélé Yohanes pa?’
26 Mayta iga ité técegé kyaté ta rané i, témtat be kyat ta félé nte rcawané, sababta si runé, Yohanesé nje nabi ta nénfawómo Jou Lahatala ni faftóté njé.”
27 Se récegé Yesusé faje, “Ayo, amé kuné pa pai ta nané i!”
Bóngo Yesusé nécegé si faje, “Pana fajé, Ya ma kfébingo mew pa, férimé kpe né pai ta nané Ya.”
Yesusé nfatailo kyat Yahudi né dolo yomya isó ta ndéréré ni moke ni sogaro né pa
28 Yesusé nécegé agama Yahudi né riri kyat tuté nesté faje, “Flongé Ya bo kéfétén adeade isó nje su, rewóré tanéi ga bo kutné mewé. Reni légaé isó, ntu món séluwé. Nuéncó nfan po ntu ta ntélóyé njé se nécegé i faje, ‘Ngénngan ta nte i, mfané bo mpe yabé po bét angguré njé ni su.’
29 Mayta yomya njé ncónglo ni moke njé faje, ‘É, kfan pa moke.’ Fajé-fajé, wlo njé npólén i, se nfané npe yabé po bét angguré njé ni.
30 Rewóré ta néi, légaé njé nfan po ntu ta téwyóyé njé nóté se nécegé i faje, ‘Nte mfané bo mpe yabé po bét angguré lo.’ Mayta Yomya njé ncónglo ni moke faje, ‘Iya moke.’ Nópé ga nfan pa.
31 Se nte bo Ya bo kutné, iga mewé, yomya séluwé nesté, ta i pua ta ndéréré ni moke ni sogaro né?”
pocé bóngo agama Yahudi né riri imam ta rpélóyé nesté rcónglo, “Ta nténlóyé njé.”
Bóngo Yesusé nécegé si faje, “Pana fajé flongé ta Ya bo kécego mewé nte, kyat léo ta riri yabé né rénfalutno pajaké, re mépin-mépin léo né, si tané ta rngali si rtubé se rdadi Jou Lahatala ni kyat si bo nkawasa dolo Kolano po riri hidupé wlólo. 32 Sababta waktu Yohanesé ta nénbaptisé kyaté njé nwóm po mew ni né, re nfaftulo yéféné bo fpe ta nfamgo re Jou Lahatala mgo wlo né, mayta mewé fdélé pa sói ta i nécegé né. Coba fémnawé, waktu kyat ta rénfalutno pajak re mépin-mépin léo nesté rlongé ta Yohanesé nécegé né rdélé. Mewé ga masike re fémnaw ta si rdélé né, mayta wlomi pa bo fngali mewé, bóngo fdélé pa le ta i nécegé né.”
Yesusé npe adeade dolo kyat ta réjaga bété né
(Mrk. 12:1-12; Luk. 20:9-19)
33 Yesusé nécegé nóté, ‘Flongé bo kéfétén ade ade isó nje. Reni légaé isó npe bété, se ntónmo i angguré, bóngo néjelo i re pagaré. Angguré né pyon pafule, re nóléy lop ta bo npeo anggur géo né. Pocé bóngo npe ni umé mlongé isó po bété lo né bo kyat ta réjaga bété né rtolno i. Se npe rewóré ndimé, tabóngo néyówé kyaté bo npólso si rpe yabé po nó bété lo né. Rewóré ta néi bóngo nfan i po bótén nésé. 34 Sogado angguré né re pyoné se bo ringét óro, bóngo légaé njé nané ni kyat sétel néli bo réyó nó téné né.
35 Mayta waktu ta re rwómé ntéli né, kyaté-kyat ta réjaga bété njé rwókfo si, se isó njé rfatétité i, isó njé ga rpuné keé i, re isó njé rtéo nó lóy sogado ga rfamóté keé i nóté.
36 Rewóré ta néi, légaé njé nané ni kyat iglé néli nóté, nesté lébé rfélé re ta rtubé nesté né. Mayta si ma rpe si dolo ta faiwóbno nesté nóté. 37 Ni wóré nópé, légaé njé nénuta, ‘Ta fié né, kané ntig tuo njé ro. Néli bo rémnaw i, nase rémtat i se rpo i nak ténténé né.’ Bóngo nané ntu njé i néli nóté.
38 Mayta waktu kyat ta réjaga bété nesté rémnaw i, tabóngo rfalécego faje, ‘Neje ta npe lima njé, légaé ta nó bété njé ntu i. Pote se néli, iga légaé njé re nmóté, yomya ta njé i ta nase nyó bété njé. Se ta fié né, tpuné keé i bo tyó róré nó bété nje!’ 39 Bóngo rwókfo yomya njé se rwóté i nétó bét lapo, ga rpuné keé i.”
40 Pocé bóngo Yesusé nutné si agama Yahudi né riri kyat tuté nesté faje, “Se iga mewé, légaé ta nó bété njé ga nwóm néli nase bo npe si fawa kyat ta rejaga bété nesté?”
41 Si rcónglo Yesusé, “Nesté kyat léo si, se nase npuné keé si! Rewóré ga nané kyat nésé nóté bo réjaga nó bété njé, iga sogado re nwómo ni waktu ta rfalingété, kyat ta néjaga njé ma nase nduké nó ténténé nóté.”
42 Bóngo Yesusé nécegé si faje, “Mewé nase re fbaca ta re rlefo po Jou Lahatala ni Buké wlólo ta bo rpe po Ya ni né ni glio faje,
‘Reni lóy pusó,
kyat ta rpe umé né réngóto i dolo reni ngale pa
se rpaké i pa ga rwóté keé i,
momongo lóy ta njé óro ta Jou Lahatala nyó i
se npeé i lóy ta faywóbno ta nfamatué umé njé.
Jou Lahatala npe ta né i, tamulo ga
témnawé né fié re birahi!’d
43 Yesusé nécego si nóté, “Se nte fatélolmo mew fafié é, Jou Lahatala bo nyó kyat Yahudi mewé bo fdadi ni kyaté mewé bo nkawasa dolo Kolano po nimi hidupé wlólo. bóngo nase nyó keé ta re npo mewé né ga npo keé kyat nésé, bo riwén mewé, rdadi Jou ni kyat si bo rpe ta I mgo wlo né, si tané i tadolo ay ta pyono fié né.” [ 44 Se pai ta némnap po Lóy ta kéfétén i péséwé njé ni, nase rémjakémé le, mayta bo lóyé njé ta ntón si, nase dolo géyap si.”]
45 Waktu kyat Farisi né riri imam-imam ta rpélóy re kyaté kyat ta rdéréré dodoto Farisi nesté rlongé Yesusé ni adeade njé né, si re runé ta Yesusé néceg si né. 46 Pocé bóngo réyówé yéféné bo rgó I. Mayta rémtaté kyat ta félé né, sababta kyat ta néi runé ta Yesusé njé nabi ta nénfawómo Jou Lahatala ni faftóté né.