Yunus
Yunus ndéréré pa ta Jou Lahatala nané i né
1
Reni kyat isó ngósno Yunusé, Amitai ntu i. Nuéncó Jou Lahatala nané Yunusé, néceg faje, 2 “Yunusé, mfan néli po Niniwe, kota ta npélóyé njé ni. Ya re kuné si riri sélsólé né félé. Se mfané mécego si, si riri sélsólé né ta délé félé.”3 Masolo Yunusé wlo pa, i nfan néli po Yafo bo nélówo re JOU. Se Yunusé nfan po Yafo, pocé nduk yel ta pélóy isó bo nfané nélaw Tarsisé. Npólésé yelé ni mulo rewóré, bóngo ncapél i nélaw yel ta npélóyé njé ni. Si bo rcobél nélaw Tarsisé, Yunusé ga bo nówésé nélówé JOU.
4 Mayta JOU npe moré re méwruw ta pélóy po wolété lo, bóngo re méwruwé nawét nfaspésé yelé njé se re bo némléné né. 5 Kyaté-kyat ta si po yelé lo, si rémtaté ndimé. Si rén-gégélay rkakémé riri fógé né bo rgali si. Si ma rwóté keé riri gina-gina ta rénuté né, bo yelé njé nmanonéy se némdiré pa.
Waktu ta néi, Yunusé i nóp yelé ni kulété lo né, nénbóy i se némtólé. 6 Pocé bóngo saihu njé ntebé nóp kapalé ni kulété lo né, ga némnaw Yunusé nénbóyé. Pocé bóngo nécego i, “Beé, ga mpe sói se myénéf awé? Mpangénéro, bo méroré néya po nim jou njé ni, solo ma ga n-gali ité bo tmót na.”
7 Yomya kapalé né rfalécego, “Limaro, bo twóté undi facuci, bo tuné pai ta nó sélsólé sogado tduk bolito moré re méwruw.” Rewóré ta néi, si rwóté riri undi njé, se mgó Yunusé.
8 Pocé bóngo kyaté né rutné i, “Coba mécegé, pai ta ncólé sogado ité nte bo tbolito? Anim yabé né sói? Awé nte fawa lima? Kyat sói awé?”
9 Yunusé ncónglo si, “Ya nte kyat Ibrani ya. Ya kémtat JOU Lahatala. I ro ta nkawasa po soroga lo. I ta npe wolét re bétbété.”
10 Rewóré ta néi Yunus néfétno keé si sói ta i re npe né, sogado i nówés po JOU ni. Rlongé ta i nécegé né, rbóng ta rémtaté. Si récegé i, “Mpe sói se mpe fajé né?”
11 Pocé fajé moré re méwruwé né nbóng ma nbóng i. Bóngo kyat kapalé né rutné i, “Se amé nté bo kpe aw fawa, bo moré re méwruwé ntébéné?”
12 Yunusé ncónglo si, “Ya ta ksólé, ta mulo reni moré re méwruwé nte. Se fwóté ya nóp wolété lo né, bo moré re méwruwé ntébéné.”
13 Masike Yunus néceg fajé né, kyaté kapalé nesté réyaté bo si nélew po bóténé lo. Mayta moré re méwruwé nbóng ma nbóng i nóté, se réfen pa bo rdimo riri kapalé njé nélew bóténé lo. 14 Pocé si rgégélayé néya po Jou ni, “Ya JOU, amé bo kwóté keé kyaté njé nélawé, se amé kéroré bo mati mfamóté keé amé su na. Kyaté njé reni sélsól gélesó-esó pa po am ni. Se iga amé kwóté keé i nélawé, mati mfasólo am su na. Amé re kuné, moré re méwruwé né ndadi sebabta JOU wlo né fajé.”
15 Rewóré ta néi, rwóté Yunus nóp wolété lo, tabóngo moré re méwruwé njé ma ntébéné i. 16 Pocé fajé yomya kapalé né ta délé rémtat JOU. Si ryó haiwan diréncó, tabóngo rwetés i ga rpe riri sadaka po JOU ni, re réjaji sói le po JOU ni.
17 Pocé JOU nané in isó npélóyé bo ntolém Yunus, tabóngo Yunus i po iné njé ni sno wlólo ngané telé re dorém telé.