Yunusé i po iné njé ni sno wlólo ga nméiténé ndé Jou
2
Yunusé po min iné njé ni sno wlólo. Pocé nméiténé né ndé JOU, 2 néceg faje, “Ya Jou, ta ya kkangelang po wolété lo, re bo kmóté, pocé ya kéror néya po Aw ni, ga Awé msónglo ya. Ya kgagélayé ga Awé mlongé ya, pocé ga Awé mgali ya se kmót pa.3 Ta yai po yelé lo lesu, JOU [Awé] mtéo keé ya po wolét ta nbésbisé njé ni, sogado kémdiré nópé wolété njé ni mdi. Wolété njé ni bébelésé nfaljelé keé, ta ga JOU Awé mfaawét moré re méwruwé né nfaspésé keé ya. 4 Po wlegé wlólo ya kécegé, ‘Jou, Awé re mfaungé ya po usnomé lo, se ya re kélowé Awé. Ya nase kémnaw pena JOU ni Um Sambayang ta npélóyé njé ni, po nim géwgów ta fié njé ni.’ 5 Wolété njé bébelésé nfaljelé keé ya sogado bo kbolito. Wolété njé bo nfabos ya, nawét sogado sumo pérogé lo. 6 Ya re kémdiré sogado kwómo bétbét ta nawét re ntebé po wolété fapéluno. Yai po wolété lo né, dorémé njé néyém ya lima, kfakduko ksópén pa sogado fajé néli. Masolo Jou Lahatala ta ya ksuba i njé né, Awé msopné ya wolét fapéluno ta bo ndadi nik kuburé njé né. [Ya nik Jou Lahatala!] 7 Ya kékénuta nase ya bo kmóté, ya kngongano isó pana. Masolo kfatélolmo ya ta Jou Awi pocé lesu. Se kéroré néya po Aw ni, pocé ga Awé mlongé ya po Um Sambayang ta Npélóyé njé ni.
8 Reni kyat ta rdélé be riri fógé re tulada, mayta ta si rdélé né reni ngalé facuci ma tisé. Si rfatoléné keé Jou Lahatala, momongo Jou Lahatala nmésié si le. 9 Maduga ya, ya kpe fajé pa. Ya nase kpe anik sadaka, sogado ksuba re ktail Awé. Ya nase kpe ndimé ta ya re kajaji Awé Jou. Ya maduga kngongano Awé le Jou, bo kduké ta fié sogado fajé néli le.”
10 Pocé fajé Jou nané iné njé bo néwé keé Yunusé nélew bóténé lo né.