Rut 1

Rut

Elimelek i re Naomi rduk kangelang po bótén Moab

1-2 Tatubé lima, po bótén Israelé né re riri kolano pafule, maduga re riri kyat tut séfis néli ta rfaméteglo kyaté. Pocé reni món isó ngósno Elimeleké, ni pégelé ngósno Naomi, nturi séluwé né, isó ngósno Mahlon, isó ngósno Kilyon. Kyaté nesté si lima Efrata, rtolén po pnuw Betlehem bótén Yehuda. Pocé fajé po si riri bótén Kanaan mfónés ta mnuwé sogado reni mnóm pana, se si dórén fóté né rlué si po bótén Moab. 3 Pocé bóngo Elimeleké nmóté, se góli Naomi re ntu séluwé nesté. 4 Ntu séluwé nesté réfsów mépin Moab si. Mahloné néfsów mépin isó ngósno Orpa, ga ta ga Kilyon néfsów Ruté, bóngo rtolén si pocé rakno mnuwo taun nuén yófésó. 5 Pocé Mahlon i re Kilyon rmóté, se Naomi ni légaé re nturi séluwé né rmóté ndimé.

Naomi npólén i po Betlehem, Ruté ndéréré i

6 Naomi i po bótén Moabé lesu, i nlongé Jou re nmésié ni kyat Israel né sogado róri téntónémé né pyoné ndimé. Pocé bóngo Naomi i re ni mélófé séluwé né rfalélé si bo rlué si rfatolén bótén Moab. 7 Bóngo Naomi i re ni mélófé séluwé nesté rfané rdéréré yéfén ta néli bótén Yehuda. 8 Mayta po yéfén fapéluno, Naomi nécego ni mélófé nesté faje, “Ta fié né, mewé dórén luwé né nae ta féléy po nimi Neke ni umé lo. Kéroré né JOU nmésié mewé, ta dolo mewé re fmésié ya re antig ta re rmóté nesté. 9 Kéroré né JOU nmésié mewé sogado fduké nimi móné, bo féfsówé nóté.”

Pocé Naomi nécegé rewóré ndimé, bóngo Naomi nfótén si re nfawasé i, masolo Orpa i re Ruté rtangésé.

10 Si récego Naomi fajé; “Neke, tisé, amé nase kdéréré aw po nimé pnuwé lo.”

11 Masolo Naomi ncónglo si fajé, “Antig ta mewé, ta fié féléyé ro. Fpe sói se bo fdéréré ya? Sababta ya nte nase re ntig món pana bo fpe nimi légaé si. 12 Antig ta mewé, se féléyé ro. Ya nte re kpégelé, se nase kéfsów pana. Adeade [fngongano ya, se] dorém péséwé nte renik légaé se rentumam móné lesu, 13 mewé bo féftón si sogado móné mya si? Na féfen pa féftón sogado móné mya si né. Nimi légaé né re rmóté né, ya kbósémé né i ni lé. Ta ya kuné né, Jou ncawané ndé ya.”

14 Rlongé ta néi, Rut i re Orpa rtangésé nóté sogado rgagélayé. Pocé bóngo Orpa nfótén kmo mépiné nje, ta nfawasé i, masolo Ruté ga négbi ni kmo mépiné nje se nfan pa. 15 Se pocé Naomi nécegé Rut faje, “Nim tiopo nje re néléy i po ni pnuwé lo, re po ni tófél-tófél nesté ni. Ta fié né, awé ma mdéréré i bo méléy.”

16 Masolo Ruté ncónglo i, “Neke, ma mané ya kéléy na, re ma mané ya kfatolén aw matiné. Iga aw mfan po sói lo le, ya ma yai pocé. Aw bo mtolén po sói lo le, ya ma ktolén pocé. Nim kyaté-kyaté né nase ndadi aniké kyaté nóté, re Jou ta awé msuba I njé né, ya ma nase ksuba I. 17 Awé mmót po sói lo le, ya ma nase kmót pocé, se iti dórén luwé rir kubur pocé. Iga ya kfatopo keé awé, ta fié Jou nyó keé ya. Sababta masolo métmóté le ta nfaeo keé ité.”

18 Naomi némnaw Ruté nkotalé bo ndé i le, bóngo néceg gélesó pana.

19 Pocé bóngo si dórén luwé rfané sogado rwóm po Betlehemé. Malil be kyaté-kyat Betlehemé rémnaw si, bóngo mépin-mépin ta po pocé né rtélélo si, bóngo rfatutén, “Neje Naomi ó?”

20 Pocé Naomi ncónglo si, “Ma fkakmo ya Naomi na. Fkakmo ya Mara, sababta Jou Lahatala re npo ya kangelang ta félé. 21 Ta kfané né Jou ndéréré ya re npo ya barakat félé, masolo ta kéléyé nte re nik gélesó pana. Se ta mulo fkakmo ya Naomi nóté na, sababta Jou Lahatala ta nkawasa ncawané ndé ya se nfasól ya sogado kduk kangelang nte.”

22 Se Naomi néléy lima Moabé né, i re ni mélófé njé. Si rfané sogado rwóm po pnuw Betlehemé, pocé kyaté-kyaté né rfalingét róri gandumé.