50
Yakobé nmóté, bóngo Yusufé néspóko i nópé se ntangso re nfótén i. 2 Rewóré, Yusufé nkakémé kyat ta rfasung urém po métmóté njé ni bo métmóté njé ma némjakém na. Se rfasung urémé né 3 ngané yóféfóté wlólo, sababta i mnuwo né mare ta dolo né, ta rénpe po Mesiré né. Bóngo kyat Mesiré né rtangso métmóté njé, i mnuwo ngané yóféfité wlólo.4 Rtangés ngané yóféfité né re télapésé, pocé bóngo Yusufé nécego kolano njé ni kyaté-kyat ta po kadatongé wlólo né, “Bo fmasié ya né, ffawómo nik faftóté nte po kolano njé ni. 5 Ta nik papa re bo wlo mwetésé né, nfaftóto ya bo kput i po géwgów ta re nfaléléy po bótén Kanaané né, sogado nané ya ksasi. Se fécego i npo ya fié kfan néli, bo kputé nik papa su. Rewóré ta né ga kéléy lima nmulé.”
6 Kolano njé nlongé faftóté ta né bóngo néceg faje, “Pa na fajé, mfané bo mputé nim papa su, ta dolo awé re méjaji i né.”
7 Pocé bóngo Yusufé nfané bo nputé ni papa. Kyaté-kyat ta pélóy po kadatongé lo re ta po bótén Mesiré né ma félé ta rdé Yusufé. 8 I fténo re rémó re farimé kyat ta po ni papa ni umé wlólo né ma rdé. Masolo yomya-yomya re haiwan-haiwané né ga rfatolén si po bótén Gosyené. 9 Rfané né, rcaplo riri bendi, re kuda ta tentara né ruté né, rfatébtubo si ta dolo rtawlé wólé se ta délé mlongé. Ta rfané né bo rput légaé njé.
10 Rwetés nélaw wóé Yordané né, rwóm po géwgów ta réntok gandum po Goren-Haatadé, pocé wlori né mjakémé se rtangés re rdodora né ta délé gégli né i. Pocé Yusufé npe ni papa ni ngénngané né, sogado ni ngané fité wlólo. 11 Kyat Kanaané né rémnaw ta rtangés po Goren-Haatade né, bóngo réceg faje, “Sen si, kyat Mesiré nesté, ta rtangso kyat ta nmóté njé, wlori né i ni kangelangé!” Necé ta mulo ga géwgów ta né, rfangósno keé Abel-Mizraimé, ta ni ngale Géwgów Téntangésé.
12 Pocé Yakobé ntu né rpe ta dolo Yakobé re nfaftóto si né. 13 Né, rcib i se rut i néli Kanaané, bóngo rput i po fénóf Makhpela, po Mamre faspal nélaw ngancóo. Bétbét ta né ni gae Abraham re n-gon tatubé lima lesu po Efron kyat Heté njé ni bo rpeé géwgów ta rénputé riri dél ta rmóté né.
Yusufé nfakuaté fténo nesté wlori bo rémtat i na
14 Yusuf i re fténo né re kyat farimé ta rdé i néli Kanaané né, rputé ni papa rewóré, tabóngo réléy si ndimé po Mesiré. 15 Pocé bóngo Yusufé fténo nesté réceg faje, “Nete rir papa re nmóté. Fawa ité nte? Ité rir ta lé tatubé ta tpe po Yusuf ni né, ma ga nisno ité wlo né lesu ga nfasémulo ité!” 16 Pocé bóngo rfaftóté néli Yusuf ni faje, “Ta rir papa nmót pafule né, 17 papa nané bo kécego awé, mam sélsól ta kpe po aw ni tatubé né, ma misno wlem na. Amé nte ma kfapélóy Jou Lahatala, ta dolo rir papa nfapélóy I né. Se amé kéroré bo mdéréré ta dolo papa nécegé né, ma misno wlem nóté na.”
Pocé Yusufé nlongé faftóté ta né tabóngo ta délé ntangésé, néceg ta, “Sen si, ga récogoma kfaisno si wloné lesu né!”
18 Rewóré ta né bóngo fténo nesté rwóm néli Yusuf ni se rcuba i, bóngo rméiténé, “É, ksuba awé. Ma mpe am gélesó na. Mpeé nim beyak amé le.”
19 Yusufé ga ncónglo si faje, “Ma fémtat ya na. Ya nte Jou ya pa bo kfasólé mewé né. 20 Tatubé mewé rewlomi lé po ya ni se fwagé ya, mayta né, Jou Lahatala re nfaréné bo ya i lima pote Mesiré sogado kyat félé ma rmóté mnóm na. Necé ta Jou Lahatala re niwno keé ta lé né se ndadi ta fié. 21 Se mati fémtat na. Mew re ntumi né, nómi mnóm re iném re sói néli le, wóré ga ya kdo mewé.” Yusufé nméiténé ndé si fafié bo wlori né ma kangelang na.
Yusufé nmóté
22 Yusuf i re fténo né rtolén si be po Mesiré. Sogado ni umur taun nuén witéncó re yófésó, 23 sogado Efraimé gbu re ni wesé né ma ndótél si lesu. I ma ndótélé nyépéné ni wes, po Manase ntu ta ngósno Makhiré njé ntu.
24 Pocé bóngo Yusufé nécego fténo nesté, “Ya nte nihalé mnuw pana bo kmóté ro, mayta pote se néli, Jou Lahatala nase ndéréré re ntébtubo mewé sogado fsópén po bótén ta njei ni, se féléy néli po bótén Kanaan ta Jou Lahatala néjaji po rir wes Abrahamé, rir gae Ishak re rir papa Yakobé né.” 25 Pocé bóngo Yusufé ntómé ni méiténé né faje, “Ta mewé bo féléy néli Kanaané né, ya re kmóté ro, se fsasi po Jou Lahatala usno lo ta mewé nase ffauto ya bo fput ya po Kanaané.” Bóngo rcasi.
26 Pocé ta Yusufé ni umuré né taun nuén witéncó re yófésó, bóngo nmót po Mesiré. Nmót nópé bóngo rfasung urémé bo ma némjakém na. Rewóré ta né, bóngo réfray i nópé ni bakélé njé wlólo.