Kejadian 49

Yakobé ni faftóté po ntu nesté ni

Rewóré, bóngo Yakobé nkakémé ntu né, “Ffajól lima pote bo férakno ya. Ya bo kfabingo mewé pote se néli sói ta nase bo ndadi i po mew ni.” 2 Rfajólo si néli ndimé bóngo nécego si, “Antig ta mew, flongé ta nimi papa ya bo kécego mewé nte.

3 Rubené, awé ya ntig ta ténlóy awé, ta ndadi nik ngongano po umé wlólo nte. Awé ro ta faywóbno mfapélóyé wlegé njé. Farimé ya ntigé né masolo awé ga kyaté rtail awé mfié re mkuaté. 4 I ni wóré nópé né ga, mpe nimé wlem ta nlé njé se mlófé nik pégelé, ta nim mama bao njé né. Kfatailo aw dolo wolét ta reni méwruwé, wlemé njé nténgén pa. Awé re mfakékóné nik róngété njé se awé nase mdadi dolo ta faywóbno né pana.

5 Simon, aw re Lewi, mewi dórén luwé wlomi né nfamgo, fmafépuné. 6 Se bo fsogaro mewé bo fpe sói néli né, ya nase kdéréré mew pa. Bo ffajólo mew po géwgów pua le ma, nase ya re mew pa. Sababta mewé ga re fsawané, ffapuné le. Mewé ta délé fénuta gélesó pa, masolo bo ffasénang be wlomi, se haiwan ta rtuda gina né ma ffaptiplé riri wétwuté bo ffanao si ta rfané né. 7 Bo nimi séwsawané né ga renawto mewé, reni kyat pana ta dolo ménimi séwsawané né, se Jou Lahatala nase nfasólo mew sogado fajé néli le. Mew re ntumi re gbumi né nase nae ta msakomi néli re lima po bótén Israelé né se nase nae ta ftolén mewé.

8 Yehuda, aw re ntim re gbimé né, nase isó pa ta bo néfené npuné mewé. Se afténom re nturi re gburi né nase rtail re rcuba mewé. 9 Kfatailo mewé dolo singa ta bo npuné nó mnómé né rewóré néléy po góo lo nmulé. Iga nétigé se bo nyógo nó mnómé, isó pa ta bo ncélok i. Fajé nóté re singa pégelo ta re ntu, iga nénbóyé, isó pa ta bo nérakén i nóté. Se mewé ma, kyat ta bo rpuné mewé né, nase réfen mew pa.

10 Yehuda, awé nase mkawasa kyat ta félé. Nim kawasa ta né nase mnap néli re lima pa. Awé ntim re gbimé né rétané kawasa né sogado kyat isó ta bo nwómé, I ro ta ni kawasa njé. Bangsa néli re lima nase rlongé i re rcuba po usno lo.

11 Yehuda, aw re ntim re gbimé né, nómi téntóném ta po bété lo né nase fabékboko i, pyono né ma fié-fié. Se masike fpitné nimi keledai po bété wlólo bo ró róri faiglé, ma fbósém gélesó pafule. Nómi angguré né ma félé tuwé se masike ftotfo nimi kabaya ma, iglé né reni félé lesu. 12 Mtómi né mamékót i le, finém be nómi angguré se, taga finém be nómi susu sogado ngangomi né ma mfusé.

13 Zeblumé, aw re ntim re gbimé né nase ftoléné né férakno wolété, se nimi yelé né nase fawsowlo i po law bobané lo né. Nimi bóténé njé ni lóo né, nase sogado nélew pnuw Sidoné.

14 Isakharé, aw re ntim re gbimé né kfatailo mew dolo keledai ta nkuaté, ta nut gina né météw po karanjangé lo npe po wónéy re balaté, se nénbóy nóp karanjangé ni fapéluné né. 15 Ni ngale, nimi bótén ta bo ftolno lo njé nase féngóto né fié re birahi, se pote se néli kyaté rwóm lima bo rayé nimi bóténé njé ma, mewé nase fówés pa se fdadi riri béyaké mewé, asal ta ftolén mew be pocé le.

16 Dané, ntim re gbimé né, iga rcól pa, ga kyaté réyówé bo rfasól si, awé ta nase mfaméteglo sogado rduk sélsól pa. Ya Israel, ntig yófésó re séluwé farimé re riri suku ndimé. Dané, awé ntim re gbimé né ma suku esó ta dolo ntig ta iglé né. 17 Aw re ntim re gbimé né kfatailo mew dolo guw ta nbisa i po yéfén lapo lo. Kyat ta rcaplo kuda né rwetco, guwé njé nté kuda né sóori, sogado kyat ta rcaplo kuda né ma tertéo si. Mewé nase dolo guwé njé. Ni ngale, kyat ta riri lé mewé né, masike runé mew pa, télél be fpuné keé si.”

18 Yakobé ni faftóté né nwóm pocé ga nbósémé dolo nkangelangé se néceg faje, “Alli, Jou Lahatala! Salamat ta re méjaji ya né, kéroré bo ntebé po ntig re gbigé né ni.”

19 Pocé ga Yakobé ntómé ni faftóté né po ntu ta iglé né nóté, néceg faje, “Gad, aw re ntim re gbimé né nimi sói néli né, kyat léo né nase rayé keé ndimé, mayta mewé ga nase fpóléné mew néli se fayé keé si róri né nóté.

20 Asyeré, aw re ntim re gbimé né nase fduk be bétbét ta fié, sogado ffanaté kolano-kolano né mnóm ta mnó.

21 Naftali, kfatailo aw dolo manjangan ta ni pétpiténé ntéfsalé se myóg aw néli re lima, ntimé né nase fié-fié.

22 Yusufé, kfatailo aw dolo wólé isó ta ntub po wóé ta nbiblé i lapo lo se ncaléy néya téptepé lo sogado nfabkabé néli re lima. (Ni ngale né, awé nase ntim re gbimé né ma félé sogado résyapé si néli re lima po farimé bótén.) 23 Ta afténomé né rpe awé né, kfatailo dolo kyat ta rfafajalé róri mnómé bo rtingésé. Riri lé awé se rfaséloké awé ga rwagé keé awé. 24 Mayta awé mfaténténgén awé le. Ya Yakobé, nik Jou Lahatala ta nkuaté njé re nfakuat aw dolo kyat ta ntingés fié, ta nétané ni tingésé né nwéwewé pa, fao ma métegélé. Ya Israelé, nik Jou Lahatala njé kfatailo I dolo lóy pusó ta npélóyé, I ta re nfaket aw po farimé ta lé ta bo mgo awé né. Jou Lahatala nfaménawé awé né fié dolo kyat ta nfaménawé ni domba né fié. 25 Jou Lahatala, anik Jou, I nase n-gali aw sogado fajé néli le. I ro ta ni kawasa pélóyé, nase npo aw barakaté, barakat yama langété lo, re barakat ta po bétbété lo se néya, re ntim re gbimé né ma félé. 26 Barakat ta Jou Lahatala npo ya né félé tuwé. I ni barakat ta ndadi i po métét-métét tatubé i lima lesu né, bo kfatailo re barakat ta re npo ya né, aniké né ta félé tuwé. Yusufé, kéroré bo farimé né ntebé nóp po aw ni. Po wyóy faftén mew farimé, awé ta mduk ta fié.

27 Benyaminé, aw re ntim re gbimé né kfatailo mew dolo serigala ta n-ngamo. Bo tómémóné né, serigala njé ntóné nó mnómé ga ncépoké. Pocé ga nó. Re dorémé ga mnóm ta iglé né nfanténé keé néli re lima. Antim re gbimé né dolo serigala njé, isó pa ta nase néfené mewé.”

28 Yakobé ni faftóté po ntu nesté ni né nwóm lóo né. Ntu né riri barakat ta Yakobé néror po Jou ni né nfamgo pa, ndé be po isó-isó ni tabeaté né. Yakobé ntu nesté sogado nturi re gburi nópé né rdadi suku abén yófésó re luwé, rkakmé si suku Israel dolo riri papa ngósno.

Yakobé nmóté se ntu né rput i

29-32 Rewóré ta né, Yakobé nfaftóto ntu nesté faje, “Mnuw pana ya nase bo kmóté ro ta dolo nik gélé re gae nesté né. Se iga re kmóté, féléy ya néli bótén Kanaané, bo fput ya po si lapori lo né, po fénóf ta i po Makhpela njé ni, po Mamre ni faspal nélaw ngancóo. Fénóf re bét ta i pocé njé, nik gae Abrahamé rén-goné keé nuéncó le po Efroné kyat Heté njé ni, se npeé kubur góo. Nik gae re gele, Abraham i re Sara, re nik papa Ishak re nik mama Ribka, ma rput si pocé fajé. Lea ma ya re kput i pocé fajé nóté. Se ya ma, mare fput ya pocé fénóf ta njéi ni.” 33 Yakobé nfaftóto ntu né rewóré ndimé, bóngo nbóy nóp ta wlo mwetésé.