Yakobé nfabarakat Manase i re Efraimé
48
Ni ngané fis néli nóté ta rfabingo Yusufé, “Anim papa ntéli npisé météwé.”Pocé bóngo i re ntu séluwé Manase i re Efraimé, rfan néli bo réflengén i. 2 Rfabingo Yakobé ta ntu Yusufé nwómé, bóngo nfatinfé i néya se ntolén po ni róngété lo né.
3 Bóngo Yakobé nécego i faje, “Jou Lahatala, I ro ta ni kawasa né pélóyé. Ya i po bótén Kanaan, po pnuw Lusé né, I re nwómo ya se nécegé bo nfabarakat ya. 4 Néceg faje, ‘Ya nase bo kfabarakat awé bo ntim re gbimé né fafélé, sogado nim wes re félbaw nópé né ndadi suku ta félé. Bótén Kanaané nje, bo kdo nim wes re félbawé né riri i sogado fajé néli le.’”
5 Yakobé ntómé ni méiténé né nóté, néceg faje, “Yusufé, awé ntim séluwé nesté, Efraim i re Manase, ya kwóm lima aw ni pafule, si re rtub pote Mesiré. Kécego awé, ya kyó si dolo antig tuo si, dolo Ruben i re Simoné. 6 Iga mduké ntimé nóté, nesté ga taga anim si. Iga ya re kmóté, ntim ta nesté si riri téntén ta po ya ni né, wóré ga rduk po Efraim i re Manase ni. 7 Ta mulo ga kyó ntimé nesté dolo ntig si né, sababta ya klolémé nim mama Rahelé. Ta amé kfan Mesopotamia se kéléyé né, nim mama nmót po bótén Kanaan, nfawlówo pa re pnuw Efrata. Pocé, wlegé njé ta délé nkangelangé. Bóngo kput i ntéli po yéfén Efrata lapo lo.” (Nte Efrata ngósno né Betlehem).
8-10 Yakobé némnaw Yusufé ntu nesté, mayta dolo nfayal si pa, sababta re nlégaé se mtó né re pésposé. Pocé bóngo nutné, “Nesté pai si?”
Yusufé ncónglo i, “Ya ntig si, papa. Yomya ta Jou Lahatala ndo nik si, ta ya i pote Mesiré né.”
Pocé, Yakobé nécegé Yusufé, “Mfarakno si lima, bo kéroré riri barakaté se.”
Yusufé nfarakno yomya nesté néli Yakob ni, bóngo nékbi si se nfótén si.
11 Pocé bóngo Yakobé nécego Yusufé, “Ta ya i po Kanaané lesu, kécogoma re mmóté. Dolo kénuta néli pa ta bo kémnaw awé nóté né, mayta nte Jou Lahatala re npo ya fié se, awé le pa, mayta ntimé nesté ma re kémnaw si.”
12 Yakob néceg ta né rewóré, Yusufé nyó yomya nesté nmulé, bóngo i ma nétig nóp sogado nóp bétbété lo né se ncuba ni papa.
13-14 Rewóré ta né, Yusufé nfamul yomya séluwé nesté po Yakob lapo lo: Efraim ta téwyóyé njé i po faspal balété; Manase ta ténlóyé njé ga nfawoslé i po faspal wónéyé. Mayta Yakobé nfasaliwola fao né se fao ta wónéyé né nétéwlé néya Efraim béboko lo, fao ta balété né ga, nétéwlé néya Manase béboko lo. 15 Bóngo Yakobé néroré Yusufé ni barakaté, néceg faje, “Jou Lahatala, Awé ro Jou ta nik gae Abraham i re nik papa Ishaké rdéréré Awé né. Awé ro ta mfaménawé ya tatubé lima lesu sogado ga nte. 16 Awé ro, Jou Lahatala ta mwómo ya yama soroga lo. Msomaya pa se bolito sói le ma mgo ya pa. Se kéror po Aw ni, Jou Lahatala, bo mpo nim barakat po wyóyé nesté ni. Kéror po Aw ni, yomya ta nesté nase renturi re gburi, bo ya re nik gae Abraham, re nik papa Ishaké, ngósnomamé né ma myangés na. Kéroré bo nturi re gburi, re riri wes re félbawé né fafélé.”
17-18 Yusufé némnaw ta ni papa fao wónéyé né nétewlé néya po ta téwyóyé njé béboko lo né, mgo wlo pa se néceg ta, “Fajé matiné, papa!” Pocé nétané ni papa fao né bo nlué néli po Manase béboko lo, bóngo néceg faje, “Ta njé i yomya ta ténlóyé njé, se métewlé faom wónéyé né néya i béboko lo né, papa!”
19 Ni papa ga wlo pa, se néceg faje, “Antig ta awé, Ya kuné njé ta ténlóyé njé. Manase ni wes re félbawé né nase ndadi bangsa esó ta pélóyé, ni kawasa po bótén wlólo né ma nase pélóyé. Mayta fténo ta téwyóy i njé ga, lébé npélóyé; ni wes re félbawé né nase rdadi bangsa ta pélóy tuwé.”
20 Pocé bóngo Yakobé néror yomya nesté riri barakaté. Néceg faje, “Jou Lahatala, kéror po Aw ni bo mpo yomya nesté riri barakat ta félé, sogado pote se néli, kyat Israelé né ga bo réroré kyaté né riri barakaté, nase rfatailo dolo si. Si nase réceg faje, ‘Kéror po Jou Lahatala ni né, npo mew barakat ta dolo Efraim i re Manase rduké né.’” Yakobé nfapélóy Efraim po Manase ni né, i ni fénfané né ta dolo né.
21 Rewóré ta né, Yakobé nécego Yusufé, “Mnuw pana, ya bo kmót ya ro, mayta Jou Lahatala nase ndéréré awé. Pote se néli, I nase nelee mew néli po nimi gélé re gae nesté riri pnuwé lo. 22 Yusufé, ya kfafolóy aw po fténomé nesté ni, né kdo nam bétbét esó ta fié ta po métété lo. Bétbét ta né ya kyó né, ktingés re ktipélé kyat Amori né.”