Rut 2

Ruté nfajolo gandum po Boasé nó bété lo po Betlehem

Naomi ni légaé ta re nmóté njé ngósno Elimelek. Elimelek reni fóno isó ta ngósno Boas. Boasé kyat isó ta reni renó félé, se kyat farimé rlongé i fié. 2 Nganesó, Ruté mépin Moabé njé, nécego Naomi, “Neke, ya bo kfan po bété lo. Pocé ya bo ffajólo gandumé ni ngai ta mnap po kyat ta rfalingété né riri faori lo. Nase reni kyat ta rfamól ya kfajólo.”

Bóngo Naomi ncónglo i, “Antig ta awé, mfané ro.”

3 Pocé bóngo Ruté nfan po bété lo, se nfajólo gandumé ni ngai. I nfajólo né ndé po kyat ta rfalingété né touri lo. Rut nuné pa ta i nfané lo né, mgó po Boasé nó bété lo. Boasé njé mgó Elimeleké ni fóno i.

4 Ruté npe yabé pocé lesu, mnuw pa, Boas nwómé, i lima Betlehemé. Bóngo nécego ni kyat ta rfalingété né, “Kéroré bo Jou ntéptubo re ndéréré mewé.”

Kyat yabé né rcónglo i, “Awé ma, Jou ntéptubé re ndéréré awé.”

5 Bóngo Boasé nutné móné mya ta i ngongano re ndélé i njé, “Mépin pai ta njé?”

6 Móné mya nje ncónglo i, “Mépiné njé taga nwómé. I ndéréré Naomi, si lima bótén Moabé. 7 Péséwé tómémóné, mépiné njé nwómé ga néror po ya ni faje, ‘Kéroré bo mpo ya fié, bo kfajólo gandumé ni ngai ta mnap po ta rfalingété né faori lo.’

Se mépiné njé nwóm tómémóné lesu, ta nfajolo gandumé ni ngai ta mnape né. Masolo nte nfatóné i cuci po folaigi lo.”

8 Pocé Boasé nécego Rut fajé, “Mlongé nte su. Mati ma mfan mfalingét po kyaté nésé róri bété, re mdél pa mfatolén bét ta nejé i. Bo mfalingété né, mdéréré mépin-mépin ta rpe yabé po naké bété lo. 9 Awé mémnaw pua ta mépin-mépiné rfalingété né po bété lo. Pocé awé mdéréré si po tóori lo, mdél pa bo mélowé si. Ya re kécego món ta si rpe yabé pocé né bo ma rfarwaé awé na. Bo glimé njé némangé né, mfan néli po lubélubé ta ya niké kyat yabé móné nesté re rfaréné né, bo miném wóé pocé.”

10 Ruté nlongé ta Boasé nécegé né, bóngo nétig nopé ncuba i. Ruté néceg faje, “Moke, mpe sói se mut ya fié ta dolo fajé? Awé muné ya nte kyat pote ya pa, mayta awé mgali ya né dolo kyat ya pote. Ya nte maduga kyat wémwóm be lima.”

11 Boas ncónglo i, “Fatuwé ta mécegé né. Mayta ya re klongé po kyaté-kyaté né fajé: ta nim légaé njé nmóté né, sogado nte mut kmemé njé fié. Ya ma klongé nóté awé mfatoléné keé nim moke re nim Neke re nimé pnuw ta mtubé, se mwóm aw lima mtolno kyat ta aw mfayal si pa. 12 Awé re mut kmémé njé fié se kéroré bo JOU nfamulé nim fafié né. Jou Lahatala ta kyat Israelé rcuba I né, kéroré bo ni féyfié re pélóy po aw ni, re kéroré bo wlemé njé nténténgén po Jou lapo.”

13 Rewóré ta néi Ruté ncónglo i, “Légaé ta awé, aw ta délé mut ya fié. Masike ya nte dolo nimé kyat yabé né pa, mayta aw ta délé mpe ta fié po ya ni, se nte séngséngé bóto ya.”

14 Ta kyaté né bo rémnómé né, ga Boas nkakém Rut faje, “Aw lima bo témnómé ro. Myó roti, msowlé po ge cuka njé ni.”

Pocé Rut i re kyat ta rfalingété né rtoléné, bóngo Boas ndo Rut gandum ta rfamósé. Ruté némnómé nó sogado nmésé, mnómé né rfarimé pa se reni lesu. 15 Pocé Ruté nosél néya nfané nfalingété nóté. Bóngo Boasé nécego ni món ta rpe yabé nesté, “Iga re ffelingét gandumé se re fpiténé, iga ni gégeo téfsalé, fpo fié bo Rut nyó nó. Ndél pa bo mewé fsawan i. 16 Ta fié pétpiténé fésólé facuci-cuci, bo fanape keé bo Ruté nfajólo nó. Ma fsawan i na.”

17 Pocé bóngo Ruté nfané nfajolo gandumé ni gégeo né sogado mérim i. Gandumé ni gégeo né néimésé keé. I nfajolo ni ngai né, ni méteo kilo yofésó. 18 Rewóré ta néi i nyó nó gandumé, ga néléy néli po kota lo. Ni kmo mépiné njé némnawé sói ta i nuté né. Pocé fajé Ruté ma ncópné mnóm ta i nuté né, se npo ni kmó njé.

19 Bóngo Naomi nécegé Rut fajé, “Antig ta awé, awé mpe yabé pua sogado mduk ta féléo nte? Awé mfajólo gandumé ni ngai po sói lo? Ya kéroré bo Jou ntéptubo re ndéréré món ta nut aw fié njé.”

Pocé Ruté néféténé ndimé ta i npe yabé po Boasé nó bété lo. I nécegé ni kmo njé faje, “Ya kpe yabé po kyat isó ta ngósno Boasé.”

20 Rewóré ta néi, Naomi nécego ni mélófé njé, “Kyat ta njéi mgó nik légaé ni fóno i, se ndé fafié, i mare n-gali it. Ya kéroré bo Jou ntéptubo re ndéréré i. Jou nmésié kyat ta rhidup re ta rmóté né, nfatopo keé si pa.”

21 Se Rut mépin Moabé njé néceg faje, “Neke, fajé nóté légaé Boasé nécegé bo ya kpólén ya, kdéréré i ni kyat yabé né sogado ringét gandumé né ndimé.”

22 Bóngo Naomi ncónglo Ruté, “Antig ta awé, necé fié ta i nécegé né. Se awé mare mdéréré mépin-mépin ta rfalingét gandumé né po Boasé nó bété lo. Mdéréré si né sogado fawóré. Sebabta po kyat nésé nó bété, nase kyaté né rfarwaé awé, mayta po Boasé nó bété, nase isó pa ta bo nfarwai awé.”

23 Se pocé Ruté ndéréré mépin-mépin ta rfalingété né, Ruté ga nfajolo gandum sogado rfalingété né rfawóré ndimé. Ruté ma ndéréré si sogado rfalingété róri gadum diréncó nóté né ma fawóré ndimé. Ta mnuwo ta néi, Ruté ntolno ni kmo mépiné njé.