Rut 3

Boasé i re Ruté si po géwgów ta rtófé gandumé / Boas néjaji bo nyó Rut bo npe ni dél pégelé

Dolo mnuw tuw pa, bóngo Naomi nécego Rut, “Antig ta awé. Ya nase kéyówé yéfén sói le bo mduké nim món faisó bo néfsów awé. I ta nase bo ngawéné awé. 2 Awé mpe yabé re mépin ta si po Boasé nó bété lo, fajé pa? Boasé njé ité rir farémoné i. Dorém péswéné nte i nase nfané ntófé gandumé ni ngaé po nó bété lo. 3 Se nte msepéro, mepo aw yégét ta pépu mnó. Mduo awé kabaya ta birahi, bóngo mfan néli po géwgów ta Boasé ntófé gandumé né. Nfaeo gandumé ni ngai ta po gégeolo. Méfton pocé su sogado i némnóm re ninémé rewóré. Ndél pa bo i nuné ta aw i pocé. 4 Awé mfaléngóto i po sói lo sogado re nyénéfé. Ga mémnaw i re nyénéfé, mfané néli pocé bóngo mépilé ni ulété bo myéféf po sóo lapo lo né. Nase i nfébingo awé sói ta bo mfakéwelo né.”

5 Pocé Ruté nécego i, “Sói ta awé mécegé né, ya ma nase kdéréré ndimé.”

6 Pocé bóngo Ruté nfan néli po gégow ta kyaté rtófé gandumé né. Ntéli, ié npe farimé dolo kmo njé nfaftóto i né. 7 Boasé némnóm re niném rewóré ndimé, ié nbósémé né fié re birahi, bóngo nfané se nyénéf i nérakén pétput gandumé né. Ruté nfaténténgén i, ga nétané Boasé ni ulété njé, nélóngé i néya ga nbó i nopé po Boas sóo lapo. 8 Dorém fapéluno, Boasé télél i se npangéné nélolét i. Ié ntélél i némnaw mépin isó nyénéf po sóo lapo lo né. 9 Ga Boasé nutné i, “Pai awé?”

Ruté ncóngélé, “Moke, ya nte Ruté. Aw re amé tfarémoné ta rakén, se ta fié mare mgali ya [ta ya re kbósém pote fajé né awé ta mgali ya]. Se bo mmésié ya, moke, myó ya bo mpe ya nim pégelé ya.”

10 Pocé Boasé nécegé, “Kéroré bo Jou nmésié awé, arémag ta awi. Anim tétut re géwgéwét ta fié re mpeo po kmém pépin njé né, fajé nóté ta re mpo ya ni nte ta délé fié. Bisa saja awé méyówé nim légaé faisó po kyaté-kyat ta reriri reróri félé, mayta aw mpe ta dolo fajé pa. Se awé mfié! Ta awé mpe né nfaftulo mmésié kmémé mépiné njé. 11 Se ma wlemé njé nkangelang na. Ruté farimé ta méroré né nase ya kpo. Sababta farimé kyat ta po kota njé re runé awé mépin isó ta wlemé fié. 12 Fatuwé, ya nase kgawéné awé bo mfié, sababta ya rémam ya rakén. Masolo reni kyat isó nóté ta bo nfafié awé. Awé re i rémam ta délé rakéné, iga fasomisil re ya. 13 Dorém pésénte awé mtolén pote su. Moné tómémóné ya nase kutné, ie bo nfafié bo nyó aw pari tisé. Bo i wlo, gélesó pa. Mayta bo i wlo pa, ya kéjaji re Jou Lahatala ni ngósno, ya nase kfaréné ndimé bo kéfsow awé. Se myénéf aw pote ro sogado tamémoné.”

14 Se Ruté bóngo nyénéf i pocé nérakén Boas sóo sogado tamémoné. Moné dérorémi lesu, Ruté npangén bo kyaté né rémnaw i matiné. Ruté npe fajé né, sababta Boasé wlo pa bo kyaté né runé Ruté nwóm po géwgów ta rtófé gandumé né.

15 Pocé Boasé nécego Ruté nóté, “Mété nim ngalépé njé lima pote.” Bóngo Ruté nété ni ngalépé njé néli Boasé ni. Boasé nyo ngalépé njé bóngo néfrai gandumé ni ngai ni météo kilo yoféluwé. Bóngo nélóngé néya po Ruté jéjololo.

16 Malibe Ruté nwóm po umé lo, ni kmo mépiné njé nutné, “Sói ta ndadi i antig ta awé?”

Pocé Ruté néfétén farimé ta Boasé ngawéné i né.

17 Bóngo Ruté néfétén ndimé, farimé né i ta npo gandumé ni ngaé nté. Boasé nécegé i wlo pa bo ya kéléy po Neke kmegé mépiné njé ga kut gélesó pa.

18 Bóngo Naomi nécego i, “Méftón le antig ta awi, sogado méngóto fanfawa nopé né. Boasé nase nfatéténgén i pa. I nase n-gawéné ngénngan ta njé i le.”