Boasé néfsówo Ruté
4
Boasé nfan po gerbang kota, géwgów ta kyaté né rérénfajólo si né. Fajé-fajé reni mon isó nwetco pocé, ni wlo télno né Elemilek fténo i ta délé rakéné. Se Boasé nkakém i, “Fténog ta awi, lima mtolén pote.” Pocé bóngo, kyaté njé ncungé bóngo ntoléné. 2 Pocé bóngo réftul kyat tuté né si dórén yofésó ga récego si, “Ftolén pote.” Se si ma rtoléné. 3 Pocé Boasé nécego kyat ta Elimelek ni fténo njé, “Naomi re néléy lima bótén Moabé né, se nte bo nwagé ni légaé Elemeleke nó bétbété né. 4 Se amé mare kfabingo awé sababta aw ta renim hak bo mgoné. Se bo aw wlemé, awé mgoné keé bétbét ta néi. Ndé fafié, aw méceg pote su po kyaté-kyaté re po kyat tut-kyat tut usnori lo. Se bo mpólés, mpólésé keé ro. Iga wlemé mpólés pa, mécego ya bo kuné, sababta iti dórén luwé né ta rir hak bo tgóné. Awé rewóré ga ya.”Se kyaté njé ncónglo i, “Ya nase kpólésé.”
5 Boasé nécegé, “Pana fajé, fié. Bo re mpólés bétbété né po Naomi fao wlólo, aw ma re mduk Rut mépin Moabé njé. Awé méfsówo i bo rentumi, ni légaé Mahlon ta re nmóté njé nase tetap i ngósno po nó bété njé ni.”
6 Pocé fajé kyat ta bo npolésé njé nécegé, “Pana fajé, ya nase kpólés pa, sebabta bo ya kpólésé né, antigé nesté nase rduk gélesó pa. Ndé fafié, awé ro ta mpólés bétbété né.”
7 Tatubé lima, iga kyat Israelé né bo rpólés pari bo rfaiwno riri sói néli né, kyat ta nwagé ni sói néli né nésólé keé ni tarupa faspalé ga npo keé néli po kyat ta bo npolésé njé ni, i ni ngale né npo keé kawasa néli po kyat ta bo npolésé njé ni.
8 Se ta bo npolésé njé nécego Boasé, “Awé ro ta mpolésé.” Bóngo fatoléné keé ni tarupa né, ni ngale né kawasa re po Boas ni. 9 Pocé bóngo Boasé nécegé po délut-délut re kyat farimé ta si pocé né, “Mewé po ngénngan pésénte fdadi saksi, sói néli ta Elimelek nó re sói néli ta Kilyon re Mahloné róri, ya ta bo kpolésé keé po Naomi fao wlólo. 10 Ruté mépin Moab njé, ta Mahloné ni balo. Ya bo kyó i, kpe nik pégelé i. Pocé bo kyat ta re rmóté né, ngósnori né ma po ya róri wódólé né, myangés pa. Ya kpe fajé né, bo kyat ta re rmóté né ngósnori né ma myangés pa po ni fténo re rémó re hali re karabe po kota lo. Mewé ngénngan péséwé nte fdadi saksi.”
11 Kyat tut-kyat tut re kyat nésé pocé, si farimé réceg fajé, “Amé kégbon pocé. Amé kéroré bo nim pégelé Ruté njé ntu né félé ta dolo Rahel i re Lea. Mépin séluwé nesté ta nturi né félé sogado ndadi bangsa Israel. Amé ma kéroré bo farimé ta awé mpe né ndadi fié ndimé po nim kyaté-kyat Efrata né usnori lo, re kyaté-kyat ta si po Betlehemé né ma rfayal awé ndimé. 12 Tmasodoa né, Rut mépin wóbno njé Jou npo i ntu né félé, bo ité tdadi kyat félé ta dolo Peresé ntu né ma félé. Peresé, i Yehuda i re Tamar ntu i.”
Boasé re Ruté réfsówé
13 Bóngo Boasé néfsówé Ruté. Pocé Jou npo barakat po Rut ni se npe lapo, bóngo nmawyóyé né, nturi njé món i. 14 Mépin-mépin ta pocé né récego Naomi né fajé, “Amé ktail Jou! I ro ta re npo aw gbim i isó, món i ta bo ngawéne awé. Masédoa né yomya njé kyat Israelé né rfayal i ndimé. 15 Yomya njé nase bo nfasang aw wlemé njé, i ma nase n-gali [npaliara] awé né sogado nim uté né mfusé.”
16 Naomi nyo yomya njé lima, bóngo npe po fyólo, se i ta n-gawéné i. 17 Pocé riri um lapo lo né, reni mépin-mépin nésé ta rfangósno yomya ta njé, si réceg fajé, “Naomi renduké gbu isó, món i.” Pocé mépiné nesté rfangósno i Obed. Obété ntu njé Isai, Isai ntu Daud.
Daudé ntu re gbu