Yunus néfétén JOU ni faftóté taga kyaté-kyat Niniwe rngali si
3
Jou nméiténé ndé Yunusé ta nuén luwé, nécegé fajé, 2 “Yunusé, mpangéné bo mfan néli po Niniwe, kota ta npélóyé njé ni. Awé mécego kyat ta si pocé né, Ya nik faftóté.”3 Rewóré ta néi Yunusé nfan néli po kota Niniwe, ta dolo JOU re nané i né. Niniwe njé kota isó ta npélóyé. Iga bo téjel i né mare ngané telé wlólo. 4 Yunusé ncung némin kota njé ni, bóngo nganésó wlólo nfané néli re lima kota njé ni. Pocé fajé Yunusé nfamwómo si, néceg faje, “Étlé ngané yóféfóté, Niniwe nase némjakémé ro.”
5 Kyat Niniwe né rdélé Jou Lahatala ni faftóté ta Yunus re nécego si né. Se farimé kyaté wlori pusó, bo kyat ta pélóy re mya né rcaumé ndimé, bóngo re risno riri karongé né rfaftulo fatuw-fatuwé si re rngali si.
6 Kolano Niniwe njé ma nlongé Habar ta néi, bóngo ntebé po ni géwgów ta mógélo né, nésólé keé ni juba kolano njé, se nisno ni karongé, tabóngo re nékómsé i nóp géyapé lo né, nfaftulo ta i re nngali i. 7 Kolano njé, i re ni dél ta mógé-mógé né rfabingé bo farimé kyaté re riri haiwan: sapi, kabéné, re haiwan ta iglé né bo ma rémnóm re ma riném na[, facuci ma tisé]. 8 Kyat re haiwané né farimé, mare tisno it karongé, necé tfaftulo re tngali ité. Ité mare fatuw-fatuwé téror re télal po Jou Lahatala ni. It farimé mare tpe be ta fié le, ndél pa tpe ta lé. 9 Solo ma ga Jou Lahatala ncawan it pana, nase I nmésié ité se ité tbolito pa.”
10 Jou Lahatala némnaw ta re rngali si, rpe ta lé pana, pocé bóngo Jou Lahatala nmésié si se nfasól si pa.