Jou Lahatala npo fié pa bo tfatélaké
(Mrk. 10:1-12)
19
Yesusé nméiténé rewóré, tabóngo nfatoléné keé bótén Galilea se nfan po bótén Yudea, po wóé Yordané ni faspalé. 2 Pocé ma reni kyat félé ta rfadéréré re Yesusé nóté. Se Yesusé nfafié keé kyaté-kyat ta rpisé né.3 Se kyat agama Yahudi séfis néli ta Farisi si né, rfano Yesusé bo réyówé nó sélsólé se rutné I faje, “Iga bo tdéréré ité rir aturan agama, bisa pari tisé, iga món ta re réfsówé ga riri pégelé né re róri sélsól sói le se ttélaké keé si né?”
4 Mayta Yesusé nécegé si faje, “Se ta mulo futné fajé né, hale fsaé pafule po Jou Lahatala ni Buké wlólo ta rlefo, se ni glio faje, ‘Jou Lahatala ntulada kyaté né, faywóbno món re mépiné.’a 5 ‘Necé ta mulo móné né ga réfsówé, nase rfatoléné keé riri neke re moke né, bo si re riri pégelé né rdadi be esó.’b
6 Se ni ngale si re rdadi kyat séluw pana, mayta esó le. Se ta mulo ga kyat séluw ta Jou Lahatala re nfajólo si rdadi esó, ndél pa bo kyat ité ta tfatélako si.”
7 Pocé rlongé ta Yesusé néceg fajé né, tabóngo kyaté-kyat Farisi né rutné I nóté, “Pana fajé, pe sói se ga Musa nané pai ta bo ntélak ni pégelé, npo be ni surat télaké njé po ni pégelé njé ni?”c
8 Tabóngo Yesusé nécegé nóté, “Sababta lénglongomi lé, ta mulo Musa ndéréré be mew wlomi, sogado npo mew fié bo ftélaké nimi pégelé né. Mayta faywóbno ta Jou Lahatala ntulada món re mépiné né, wlo pa bo fpe fajé. 9 Se flongé fafié ta Ya kécegé nte: kyat pai ta ni pégelé njé nyó sól pa, ga ntélak i bo néfsóo nó mépin nésé, necé i re nyó sólé.”
10 Pocé Yesusé ni motemote nesté rlongé ta néceg fajé né, tabóngo récegé I faje, “Alli, iga tfatélaké né ndadi i pa, ta fié né ma téfsówé le na.”
11 Mayta Yesusé ncónglo si faje, “Kyat farimé pa ta réfené se réfsów pa né, maduga iglé le ta Jou nfakwaté wlori se réfsów pa né. 12 Sababta reni món iglé né rtub nétó sogado rpélóyé né, wlori néli fsówé lo pa. Re iglé nóté réfsów pa né bo wlori né be néli po Jou ni bo rleleyan ta nkawasa dolo Kolano I né. Pai ta wlo néfsów pa, fajé bo ma néfsówé le na.”
Yesusé ncéngé yomya-yomya né
(Mrk. 10:13-16; Luk. 18:15-17)
13 Pocé reni kyaté-kyaté né ruté nturi ta rémyaku lesu né po Yesus ni, bo nétewlé fao né néya babokori lo né bo néroré riri ta fié po Jou Lahatala ni. Mayta ni motemote nesté rcawané keé kyaté-kyaté né.
14 Se Yesusé nécegé ni motemote nesté faje, “Ma ffaket yomya-yomya né na, fajé le bo rwóm lima Ya ni, sababta kyat ta wlori mya ta dolo yomya nesté, si ta rpo wlori se rdadi Jou Lahatala ni kyat si bo nkawasa dolo Kolano po riri hidupé wlólo.” 15 Rewóré ta néi, Yesusé nétewlé fao né néya po yomya né bébokori lo, se néroré riri barakaté. Rewóré ta néi, ga nfatoléné keé gawggów ta néi se nfané nóté.
Móné mya isó ta nkayangé
(Mrk. 10:17-31; Luk. 18:18-30)
16 Nuéncó, reni mónémya isó nfan po Yesus ni se nutné I faje, “Guru, faifié sói ta mare ya kpe bo khidup re Jou Lahatala sogado fajé néli le?”
17 Bóngo Yesusé nécegé i faje, “Pe sói se mutné Ya sói ta fié né’? Ta nfié njé maduga Jou Lahatala le. Se iga wlemé bo aw re I sogado fajé néli le, awé mare mdéréré sói le ta I nparenta né.”
18 Pocé bóngo móné njé nutné Yesusé nóté, “Jou Lahatala ni parenta ta fanfawa ta mare kdéréré né?”d
Bóngo Yesusé ncónglo i, “Ma mfapun na, ma myó sól na, ma mfalewés na, ma mmalól na. 19 Bóngo mare langlongomé fié po nim déluté nesté ni, re mésié kyaté né ta dolo mésié anim diri nóté.”e
20 Bóngo móné mya njé nécegé Yesus faje, “Ta féléo i ta mécegé né, ya re kpe ndimé. Se góli sói nóté ta kpe pafule né?”
21 Yesusé nécego i nóté, “Iga wlemé ncuka bo mdéréré Jou Lahatala ta fatuw-fatuwé, mare mfané bo mwagé keé nam haréta né ndimé, tagare ni mulo né mfanténo keé kyaté-kyat ta reriri reróri pa né. Iga sogado npe fajé, ga tagare nase mduk haréta ta fié po soroga lo. Rewóré ta néi, ga aw lima bo mdéréré Ya.”
22 Móné njé nlongé ta néi, wlo njé ta délé nkangelangé, sababta i nó haréta né tadélé félé.
23 Rewóré ta néi, Yesusé nécegé ni motemote nesté faje, “Fatalolmo mew fafié ta Ya kécego mewé nte, kyat ta reriri re róri félé né ta délé rkangelangé bo rpo wlori né néli Jou Lahatala ni bo nkawasa dolo Kolano po riri hidupé wlólo né. 24 Se fatélolmo fafié nóté ta Ya Kécegé nte, Ya kfatailo si né dolo unta ta pélóy isó bo ncungé ndé po smo ni mdóké lo né, tadélé kangelangé. Mayta ta lébé kangelangé né, kyat ta reriri reróri félé né, bo rpo wlori néli po Jou Lahatala ni bo nkawasa keé si né.”
25 Ta Yesusé nécegé né, ni motemote nesté ta délé rtélélé se récegé I faje, “Pana fajé, pai ta nase bo nduk salamaté?”
26 Pocé Yesusé néngóto si, bóngo nécegé si faje, “Bo ndé be po kyaté le nase fécogoma fduk pa salamaté, Mayta iga Jou Lahatala bo nfasalamat mewé, nase ndadi i.”
27 Pocé bóngo Petrusé nécegé Yesus faje, “Amé nte re kfatoléné keé mam sói néli né se re kdéréré Awé! Se sói ta nase amé bo kduké?”
28 Yesusé nécego si nóté, “Flongé fafie ta Ya kécego mewé nte, “Pote se néli, iga Ya kwóm po Jou Lahatala ni se yama ga ktolné nik kawasa po dunia wóbno lo, nase mew dórén yofésó re séluw ta fdéréré Ya né bo ftoléné fdé Ya, bo tkawasa Israelé né riri suku yofésó re séluwé né. 29 Se kyat pai le ta rdéréré Ya, sogado rfatoléné keé riri um pari fténori re ramóri pari, riri moke re neke nesté pari, nturi pari róri bété, kyat ta néi Jou Lahatala nase nfamulo si riri ta fié né ni féléo nuén witéncó. Ta rduké né né le pa, mayta nase si re Jou Lahatala sogado fajé néli le. 30 Mayta kyat félé ta réngóto si rpélóy po dunia né nase bo rémyaku, kyat ta réngóto si rémyaku po dunia né ma nase bo rpélóyé.”